”Hon enzuite hi un, kei leng Khrist enzuipa ka hih mah bang in,” I Kor. 11:1
Thupatna: Toupa’n i ministerial year plan a i guante hon sepsuahpih zel in, Teenage Camp Nov. 10-13, 2023 kikal in Caleb Institute, Gurugram ah manphatak in kizang zou hi. Hiai hun ah Pathian Kha in nna sem in, khelh kipawkna leh ngaihdamna naupang tampite’n ngah ua, kipahhuai i sa hi.
Hiai tan a i nasep uh zou a kihi kei a, naupangte Khrist batna a hong khan theihna diing uh i mohpuak ahi chih i haihkei uhi. Naupang neuchik a piangthak himahleh khalam makaihtu a ginat louh ziak a khalam gammang leng tampi om diing in gintakhuai hi. Huaiziak a tate khalam gammang lou a, mihing deihsak leh Pathian deihsak a, a khan diing uh poimoh petmah hi. Hiai bang ahih theihna dia poimoh tuh nu-le-pate’n ettontak hinkhua i zang uhiam chih dotna lianpi ahi.
Nu-le-pa tampite buaina tuh, naupangte hong piangthak ua, kipahhuai sa kawmkawm in bangchi panlak diing chih hipen mai hi. Hiai hih buaipih thamching leh buaipih tuak mah ahi. Thupiak gol ah, Jesu’n hon thupiak tuh nungzuite bawl diing chih ahihman in i sepsuah diing ua poimoh ahi. Ahihleh nungzui bangchi bawl diing i hi hiam? Jesu mahmah in leng nungzui i bawl diingdan hoihtak in hon sinsak hi.
Jesu’n nungzui a bawldan i et chiang in, Ama’ hinkhua leh nasep pansan in bawl hi. John 13:15 “Na tung ua ka hih bang in, nou leng na hih sam diing un, hihdan diing hon hilh ka hi,” chi hi. Jesu’n ama’ hih ngeilouh hih diing in a nungzuite lamen ngeilou a, sawl leng sawl ngeilou hi. Amah hihdan enton diing in sinsakna leh thuhilhna pezo zel hi.
Paul in leng Jesu Khrist hinkhua leh nasepte pansan in nungzui bawl hi. Ama’ utdan leh hoihsakdan hilou in, Jesu Khrist’ hinkhua enton hi. Jesu Khirst enzui loupi a, kuahiam Khrist’ nungzui dia chiil hithei lou hi. Huaiziak in naupangte Khrist batna nei a hong khanna diing un, nu-le-pate’n Khrist hinkhua i etton uh poimoh mahmah hi.
Thukhitna: I Paunak uah “Sakhi a pi a sanleh a nou leng san,” chih ahi. Nu-le-pate omdan leh gamtatdan bangchihiam in tate’n lakha/suunkha uhi. Huaiziak in nu-leh-pate hinkhua poimoh mahmah hi. Tate, Khrist batna nei a hong khan diing uh i deihleh, nu-le-pate mahmah in leng, i hinkhua a i latkhiaksak uh ngai hi. I phawk leh phawklouh hun in leng tate’n i hinkhua nakpitak in enton uhi. Na hinkhua ah Khrist deihdan, na tate’n a muh diing uh a omna diing hiam? Huaiziak in, tate nungzui diing a chiilna ah, nu-le-pate’n le hinkhua ah patthak diing bang, tawpsan diing bang, sepzom diing tampi kinei diing hi. Laisiangthou sim uau, thuum uau, kikhawm uau chih sang in nang Laisiangthou na sim hiam? Na thuum hiam? Na kikhawm hiam? Hiaite ban ah adang tampi omlai diing hi.
