A tawppen in unaute, thildik peuhmah, thil phathuai peuhmah, thil kilawm peuhmah, thil minhoih peuhmah, ………huai thilte ngaihtuah un (Phil.4:8)
Kithuzakna vanzat (Information technology) hoih ziak in khovel koimun peuh a thiltungte leng i omna munmun ah baihlamtak a theihtheih ahita hi. Hiai bang khantouhna nasatak in thilhoih tampi hon tun a, mite theihna leh siamna lam ah khangsak mahmah hi. Hiai information technology lam a masawnna in thilhoih tampi tulai khovel ah hon omsak hi. Ahihhangin, khenkhat in a suidan in, hiai bang information technology lam a masawnna in i society ah kikhenna leh kituambawlna, polarization i chi diam ah, kipumkhatna susetu ahihna chiang leng om thei hi. Hiai in muanna leh bitna susia in i society adia chidamlouhna tun naknak hi. Huaiziak in, laak diing leh paih diing, etchet diing ban ah, thil peuhmah etdan dik leh lakdan dik neih poimoh hi. Tua bang a i et theih chiang in Pathian khamuanna ngah diing i hihdan Bible in hon sinsak hi. Tuate saulou in kikum le’ng i chi hi. Phillipi 4:8 ah poimohngaih diing leh etchet diing bangzahhiam gen a, tuate tuh -
(i) “THILDIK LEH ATAK PEUH”: Na thuzak leh theihte adik a hina hia, mi kiang a gensawn a phatuam diing ahi hia? Ahihkeileh, mite’ siatna diing leh kinakna diing lel khawng a mi thubawl (propaganda) khawng buaipih a, ni tumtum a hunzang lou diing i hihdan i mu thei hi. Na thuzak, gen leh gensawnte enthak mah dih. Bangzah a dik leh a tang na genkha a! Zuau thu thehzak a panglou diing in Bible ah sinsakna i mu hi.
(ii) “THIL PHATHUAI/ZAHTAKHUAI ( NOBLE/HONEST) PEUHMAH”: I ngaihtuahna leh et diing thil tuh, thil phathuai leh thutak ahi. Paul in Timothy kiang ah (2 Tim 2:16) thubulbal neilou leh kiselna haihuai khawng a panglou diing in thuhilh hi. I thugen leh houlimnate khawng hiamgam leh mulkimhuai, midangte adia mitsiphuai ahih louh diing ahi. Thumanlouh khawng gen a kizang maimai lou diing ei khristiante i hi uhi. Na houlim nop leh na thuzak nopte khawng ngaihtuahthak mah dih.
(iii) “THIL KILAWM (JUST) PEUHMAH”: Na thilhih leh thugente Pathian leh midangte mitmuh in a kilawm na diam; ngaihtuah masak poimoh hi. Niteng hunzatna a, na gendan, hihdan a kilawm leh midangte adia pom theih/theihsiamhuai hi diing in na ngaihtuahkha zel hia? Hiai hi, ei-le-ei i ki-etkikna leh ki-etchetna diing a poimoh mahmah ahi. Ei utdan leh nopsak zawng kia a kizanggai maimah lou a, a kilawm leh hoihzaw diing ngaihtuah kawm poimoh mahmah hi. Hiai bang etdan i neih theihlouh chiang in kitheihsiamlouhna leh buaina i lak ah hong tungkha naknak hi.
(iv) “THIL SIANGTHOU(PURE) PEUHMAH”: Hiai a siangthouna a gen in, polam kizepna siangthou kia gen hilou in, lungsim a ginomna leh chihtakna (purity) gen hi. Tup leh ngim hoihlou leh lunggel hoihlou/siangthou loupi toh hinkhua zanglou diing in pilvang ni hang. “Na vak uh mi mitmuh diing in vak hen,” (Math 5:16). A genthoh mai, a pawlpi/saptuam a member khat hih mai hunlou hi. Nang mahmah in na ngaihtuahna leh tup-le-ngimte a saingthou in pomtaak hina hiam? “Let the words of my mouth and the meditation of my heart be acceptable in thy sight, O Lord,” (Sam 19:14).
(v) “THIL DEIHHUAI (LOVELY) PEUHMAH”: Na kizatdan (conduct) leh midangte na etdan leh ngaihdan na neihte deihhuai leh chidamhuai a hina hiam chih ngaihtuah in. Kampau leh omdan a mitdonhuaipi leh pom theihhuai loupi khawng a omlou diing in Laisiangthou in hon sinsak hi. Ginglou mite’n hon ngaihlouhna uh ziak a tamzaw, Pathian thu-awi, kristian i hih ziak hilou in, i omdan-gamtatdan huathuai leh deihhuai lou ahih ziak hizo naaknaak hi. Abiiktak in khopi a nam tuamtuamte kipolhkhawmna munte ah, Laisiangthou sinsaknate a poimohdan leh limsaktuak ahihdan kilang mahmah ka sa hi.
(vi) “THIL MINHOIH (GOOD REPORTS) PEUHMAH”: Thilhoih, pahtakhuai leh nasep hoih i chihte Laisiangthou a kibulphuh pawlpi tuamtuam YPA, SSPP, addg.-te’n tup-le-ngim dia a na zatte mah uh ahi. Pawlpi minsuang a hiai Laisiangthou sinsaknate a na zangkhialkha i hi diing uam chih khat veivei ngaihtuahhuai mahmah hi. Thilhoih seem dia kisa hinapi midang toh kituak theilou a i omkhak mawkleh Laisiangthou sinsakna kalh, poimohngaih diingte poimohngaihkha lou kihikha diing hi. Pilvang ni hang.
(vii) Hiaite ban ah Paul in, amah thilhihdan a muhte uh leh a zakte uh, tua mah practical a zangkhe diing in hon hasuan hi. Kristiante’n Laisiangthou a kigelh i muh leh zakte genthoh, midangte hilhna a zang lel mailou a, ei mahmah in, midangte muh theih dia i zatkhiak kisam hi. Gen diing leh gen theih a tam mahmahlai in, niteng hinkhua a Khris’ nungzuihna langkhesak thei kitawm mahmah hikha diing hi. Huai ban ah, Paul in amah enton (role model) diing in midangte hasuan hi. Abiiktak in ei society ah aneu hi’n aliante hita lehang, kuamah etton (role model) chih leng neilou a, mahni hoihsak bangbang a gamta chiat kibang hi. Hiai mah tuh society kipumkhatna diing leh chidamna diing a daltu lianpi hikha nak hi.
Atawpna diing in, thildik, thil phathuai, kilawm, siangthou, thil deihhuai leh thilhoih peuhmah lunggulh a, leh ngaihtuah a nei a, Laisiangthou sinsaknate i hinkhua a practical i zatkhiak chiang in, bang ngah diing i hi a le? Muanna Pathian i kiang uah a om diing a, lungmuanna i nei thei diing uhi.
