Minute chih in i lungtang 80vei vel a na ki-pump a. I damsung khawllou in huchi den hi. I lungtang a ki-pump teng in, sisan khiitsiangsa hon phihkhia a; taksa kahiang teng zeelsuak di’n sisan hong kikhohkhia a. Huai mah ah i Blood pressure kinga hi. Huai sisan khiitsiangsate’n i sisan guizamte tungtawn in i taksa kahiang teng ah kitatsat lou in Oxygen leh hinna dia poimoh an a va puak den hi. Laizial hahteep ziak a khezung a sigui bing, khezung a sisan luanglut theilou chih (Buerger’s Disease) om sek a. Huchi bang khezung tuh hong muat (gangrene) in, aattan a paihkhiak ngai maimah sek hi.
I mihing taksa hinna dia i lungtang a poimoh bang in, i mihing lungsim leh i khalam hinkhua ah i ngaihtuahna lungtang poimoh petmah a. Bible ah, ‘Na lungtang pilvang theitawp in kemhoih in. Huai a kipan na thilhih omdan tengteng hong kipan ahi,’ (Paunakte 4:23) chi in, Pathian in hon thuhilh hi. I hihna, i mizia, i lunglutna, i ngaihsang, i deih, i duhte tengteng i lungtang a kipan ngen ahi.
Naupangte omdan, kampau, mizia, laisiam diing, lohchin diing, vual hon eenlouh diing uh chih khawng i awlmoh chiat. Huai awlmoh luat man a, a lungtang uh chiilhoih diing lampang nelhsiahkhak a baihlam. A lungtang uh chiil diing i ngaihsak louh ziak in, Pathian thu limsak lou in hong khanglian ua; Pathian hon itdan bang, Pathian lauh diing ahihdan bang, Pathian biak a poimohdan bang, Pathian phat diing a Khristian hi i hihdan khawng phawk mawngmawng lou, Khristian minpu hi buang in hong khangkhe maimah uhi.
Toupa Jesu’n a sermon masapen ah: Lungtang siangthoute a hampha uh, Pathian mu diing ahi ngal ua (Mathai 5:8) chi in, lungtang siangthou nak poimoh lo petmah ahihdan a na gen pah ngal. Hiai, a poimoh zah in i ngaihven zoukei. Lungtang niinpi toh Pathian muh vual a na hilou ahi chihna a himai a. Ngaihven thak chiat tuak ahi. Lungtang niin a kipan huatna, mi ngaihdam theihlouhna, phuba laak utna, ngaihtuahna gilou chiteng hong pawt ahi. Huatna leh hazatna ziak a, heutu dia chinzaw lo diing kisakna bang leng neih theih a hikhamah-na! Hiaite mah i sikkhop himah lou hia, maw?
Mial thuneihna khovel a om i hi a. Vangtahna, sihna ziak a kikhenna, innsung buaina, namsung buaina, sa-le-gaal chihte i paltou nengnung. Hiai bang hun in, mihing lemtheihna a sukvengsuk mai sawm vial a baihlam. Hiai khah i kichiilkhelh ziak liauliau ahi. Pil i kisa mahmah ua, ei lemtheihna, Babel lungput, in thil i pan sek ua. Lah, i sikkhop hong suah chiang in, Pathian kiang ah beidong in i tulut phiing thouthou! I buainate khah ei lemtheihna a kinga a, muanlouh diingpi i na muan in hon siattut ahi leltak. ‘Na hai man eive,’ i chih sekkha! A poi mahmah tuh, i khalam hinkhua in a gammanloh zawkmah ahi. Hiai teng i pumpelhna diing a lungtang siangthou nei dia Pathian in hon na thuhilh ahi.
Lungtang siangthou Pathian kiang a nget theih hi diing ahi. Kumpi David in leng a na ngen ahi: Pathian aw, keimah ah lungtang siangthoutak siam in… (Sam 51:10)
