Tuailai hun i chih mihing hinkhua a dia i hun poimoh penpen ahi chi leng hon pompih lou om ding in a gintak huai kei hi. Naupang hun leh teek kun a pai hun kikal a hatlai hun genna in a ki zang tangpi hi. Thugen siam leh lai gelh siam khenkhat in “Naupangte’n a tuailai hun uh ding ngaklah ua, teek kun a paite’n tuailai hun ngai uh” chi sek ua, dik mahmah hi a theih in om hi.
Tua bang ahih kawmkawm in Kristian hinkhua ah Pathian limsakna sang a poimoh zaw bangmah omlou hi, tua ding mah a Jesu Kris a tatkhiak leng i hi uhi. Piangthak diktak, Kris batna neite a ding in tuh Pathian limsak leh A thupiak zuih val a poimoh zaw om ding in a gintak huai kei hi. Pathian limsakna i chih in a khang a khang daih a, Pathian limsaklouhna in leng a khang a khang daih veve hi. Tua mah leng a chetna i Laisiangthou mun tampi ah muh theihna ding om hi. A khang a khang a phu la thei Pathian ahihmanin amah i limsak a, Amah i suk lungkim leh i hinkhua, i saptuam, I khotang leh i namsung mahmah a ding in, i tu-le-ta’ khang tan a ding in vualzawlna hi mahmah ding hi. Tua banah, I Laisiangthou in, “Lungkimna toh kithuah Pathian limsakna punna thupitak ahi” ana chi hi. (I Timothy 6:6, BSI). Hiai Laisiangthou ah, Pathian limsakna a chih kia hilou, lungkimna toh kithuah hon chih khelkhel na ziak leng ngaihtuah tham ching mahmah sak in om hi. Bang ziak pentak in ahia chih i ngaihtuah leh, lungkim hetlou a leng Pathian limsak theih ahi chih hon musak mahmah hi. Tua kia leng hilou, lungkim hetlou a Pathian limsak theih ahih dan mahni hinkhua ah leng muh theihna tampi om hi. Biakna kikhop hun ahih ziak a kikhawm, ahihkei leh laa sak hun ahih ziak a sa lel, biakna hun a mi soisel thei lel a pang a, lungkim hetlou a Pathian leng ana limsak theih ana hi mawk hi.
Sam laibu ah, “Hatlai tate tuh mi hat khut a thal omte bang ahi uhi” ana chi hi. (Sam 127:4) Khovel pailel a thahatna khawlpi (engine) tuailaite i hi ua, ei pi na lamlam a khovel pai ahi mai hi. I Laisiangthou a i muh bang in, tua hatlai khut a thal omte’n kap puk lah a nei kei a, melma douna ding in a zat theih a, a huchih kawmkawm in ei mahmah leng hon leh dou thei hi. A kawk na lam a dik kei leh innkuan, saptuam leh nam sung leng kap chim lah hetlou hi. I khotang a innkuan tampite’ lak ah leng muh theih hunkhop omta hi, poi mahmah! Tua ahihman in tuailai hatna saptuam ah saptuam a hat a, tuailai hatna khotang ah khotang a hat hi. I saptuam, i khotang leh i gamsung maban ding tuailaite khut ah kinga lian mahmah a, i maban kum 50-100 kikal amau thupukna lakte leh amau gamtat dan in kinga lian mahmah ding hi. Amau khut a kinga phetlou in, tunung kum 10-20 a vaihawmtu ding tuailaite mah ahi uhi. Gen sau leng, tulel a i gam buaina toh kisai bang ah, tuailaite’ poimohna theih thakthak in om hi. Sa-le-gaal a delh leh thah a i omna gam ah, thauvui-thautang a gaal douna hitaleh, social media tungtawn a gaal douna hitaleh, tuailaite’ ah kinga vek phial hi.
Pathian limsak a poimoh dan bangzah hiam i gen ta a, tua kia hilou in tuailai’ hun a a poimohna leng hunkhop i gen hi. Mihing i damsung a i hinsan, Pathian limsak a pahtawi ding chih leh i damsung a dia i hun poimoh leh manpha penpen i tuailai hun ahi chih tegel gawmkhawm in, I Toupa Pathian a ding in i tuailai hun tengteng pe khe leng bang zahta in i Pathian a kipak dia aw chih ngaihtuah huai mahmah hi. I Laisiangthou ah leng mun tampi ah muhtheih in om hi. Tuailai hun a Pathian ana limsak a khovel sa duhgawlna a kibuallou a taisan teitei Joseph (Gen. 39:7-10), Pathian hatna muang a melma lian penpen dou dia kuan David (I Sam. 119:9), Kumpipa nek-le-dawn a ki hihbuah lou Daniel (Dan. 1:8-16) muh theih in om hi. Amaute banah mi tampi mahmah tuailai hun a Pathian ana limsak mi tampi leng muh theih in om lai hi (Mosi, Joshua, Samuel, Gideon, Paul, Timothy, Tita, adg. adg.). Amaute hinkhua a malmal in sut leng tuailai hun a Pathian limsak a thupi dan leh a namte’ a ding a amau ziak a Pathian in a nasep tampi muh theih in om hi. Joseph in Pathian a limsak ziak in a innkuante leh a omna gamte a ding in vualzawlna tampi tun a, kum 7 sung kial a tun in leng amah vaihawmna ziak in dou zou uhi. Tua bang mah in Joseph bang a Pathian limsak tuailai I gente’ hinkhua ah leng lam chi tuamtuam in Pathian in nasem vek ahihdan i Laisiangthou ah haih vuallouh a muhtheih in om hi.
Tua bang teng ahih nung in bang i genta dia le? Khovel nopsakna i ki hel ut hun, thilthak I chep ut hun leh thilteng a i ki bual ut hun a bang ziak a saptuam a kizang a, Pathian a dia kizang a, a nuamteng taisan ding ka hi mawk di? I Laisiangthou in, “Thil bangkim hih a siang a, himahleh thil bangkim hih a hoih kei” (I Kor 10:23) chi hi. Tuailai hun, mahni ut dan tak a om a, “free” deuh a hin ut hun ahih kawmkawm in i Laisiangthou a i muh bang in i ut bangbang a gamtat leh i ut bangbang hih hoih hetlou hi. A hoihlouh kia hilou in Eklijiasti 12:1 ah, “Na tuailai nite in nang hon siampa leng thei gige in, ni hoihloute a hong tun ua, kumte a hong nai ua, amaute ah kipahna ka neikei na chih hun a hong tun naihlouh lai in”(BSI) chi hi. Khovel a mi pil penpen Solomon in i tuailai hun a Pathian theih ding ahih dan ana gen hi. Khovel a i hin sung ah leh maban khang hong pai dingte ah Pathian vualzawlna nak ahih kia hilou in, tuate tunglam pek ah i sihnung hun ding tanpha genkha hi. Tua lou in, i Pathian neih tuh Pathian hat, thil bangkim hihthei ahih kia leng hilou in, thil bangkim nei ahi a, ei hinna leh i kha mahmah leng Amah bawl leh Amah min thupi na ding a A bawl ahih man in ei tu-le-tu a a kem tu in i sihnung a a neitu’ kiang i tutkik tuh i mohpuak ahi hi.
Pathian limsak a poimohna leh tuailai hun a Pathian limsak ding ahihdan i theih sa ahi ta. Tuate a tangtun theihna ding a poimoh tuh, ‘Pathian bang chi limsak ding?’ chih ahi. A theih nuam leh chiamteh nop pen ding in gen leng, Pathian i limsak taktak theihna ding in ‘taisan’ ding leh ‘delh’ ding thil om ding hi. I Timothy 6:9-11 sung ah taisan ding leh delh ding bangzah hiam ana gen hi. I nek ding le silh ding i neih leh tua teng a lungkim ding ahi chi hi. Khovel a i om sung in hauhsak ut in mi khempeuh ki diang tuah zelzul a, tuate in khemna leh siatna ah hon pilut zel hi. Khenkhat in tuate it zaw in a ginna na tawm uh bangmah mah a simlou in gamtang uhi. Pathian limsak tuailai ihih theihna ding in dangka sum deihtakna leh hausak utnate i paisan poimoh ding hi. Tua tengteng paisan phetlou a, tai a i taimang san ding chi’n Lasiangthou in na gen hi. Tuate banah diktatna, ginna, itna, thuaktheihna, kingaihniamna chihte delh ding chi nawn hi. Diktatna delh a, i ginna lenkip a, itna, thuaktheihna, kingaihniamna chihte toh i hinkhua i zat theihchiang in Pathian limsak taktak ki hi ding hi.
Jesu khovel a hong pai lai in a tuaidawng lai hun sung teng a Pa na sem in pang a, a pallut hun sung mah in thil lamdang tampite hih in a Pa’ thumang in eite khelhna tan ding in hon si hi. Amah sisan a tat a om a eite’n amah bang a i khangdawng hun leh i pallut hun a beima ngei a Amah a ding a ki zang a, pilna, siamna, theihna a hon piakte Amah a ding ngei a zang ding in iki ngen a, tua ding mah in Toupa’n hon pita hen.
