Na tuailai nite in nang hon siampa leng theigige in, ni hoihloute ahong tun ua kumte ahong nai ua, Amaute ah kipahna ka nei kei, na chih hun a hong tun nai louh lai in - Eklisiasti 12:1
Na naupanna kuamah in sit kei hen; thugen lam ah, tatdan lam ah, itna lam ah, siangthouna lam ah gingtute zuih ding hi zaw in. - 1 Tim 4:12
Tukum (2023) a EBC saptuam a i heutu muan te'n thupi dia ahon teel uh – “Pathian Limsakna”- 1 Timothy 6:6 pansan a hong kila khia leh “Pathian Limsak Tuailai” kichi a thutunkibang hi. Tuailai khat a niteng khovel hunzat na a Pathian deihdan a hing, Bible simna leh thuumnahun te zang zel a, khovel buahna a kibual lou a, Pathian thu mang a amah deihdan a hing; huai mi tuh Pathian limsak tuailai a kichi lou theikei hi.
Tuailai i chih mihing a dia naupan leh upat kikal hun khat hi a, saptuam teh na dan in kum 18-40 kikal mi hi a, United Nations teh na dan in kum 15-24 yrs mi hi ahi. Tuailai te adia ni bikhiah ‘International Youth Day’ kichi 12th August ni in khovel in zang gige a, tua banah saptuam tuamtuam in Tuailaite Ni October kha in kumteng in nipini khat zang gige hi. I tuaidawng hun ahihleh i lungsim hita hen aw, i tha leh zung hatlai ahih manin ah I gam solkar leh private organization lam te’n nna sem ding bang in sang tampi pi tuailai te sam gige sek hi. Bible ah Pathian mi zat - Joseph, Danial leh a lawmte, David, Timothy, Mary i chih te tuailai ngen hi uhi. EBC saptuam in 2015 kum in gamsung a diktatna a kilamthakna lunggulh na toh “Tuailai 1434 Pro” kichi tuailai te huaihot na in hon pankhia uhi. 3rd May, 2023 a pat Manipur buaina ngial houh a thu, a laa, a tha leh a matawng a pang, a tamzaw te tuailai te ahih kuaman haih lou ding hi. Hiaibang a phattuam na tamtak nei tuailai te a hih dan theih thak tuak mahmah hi.
21st century khovel ah ki-om ta ahih man in a khovel huihnung khenkhat bang le nidang a te toh kibang lou hi. Tua toh kiton in tulai a tuailai te tuah khenkhat, nidang a te toh kibang gige lou khemna tuamtuam leng om hi. Tu lel in liberal tak a ki sinsakna tuamtuam tam ta a. Etsakna ding in - “follow your heart”, “you are your own God”, “the world is your oyster” chih dan te leh “Gen Z lifestyle” tuamtuam, a tamzaw Pathian panglou a kithuhilh leh tawndan te hong uang hiaihiai in muhtheih a, huaite in tuailai, a diak in khangthak te lak bang luh theih na na ah hon luh in, amau te lungsim ah hichi bang chii te kituh in, Pathian toh a kal uh gamla sak sem sem thei ding khemna hong hi hi. Pathian ana limsak kichi zaw deuh te bang le, hon lunglut sak thei ding, khovel thil - et ut, hih ut, ngaih ut te in niteng in i lungsim, i ngaihtuahna te hon bawm in i theihlouh kal in hiaite in saupi hon na paipih in, i ginna uh kia lou, Pathian toh kal kizopna hon gamla sak thei ahih phawk a, huaite a iki ven gige ding uh hoih ding hi.
Bible ah Genesis laibu ah Joseph tangthu ah mutheih ahih leh, amah Pathian limsak tuailai, a pa’ innsung a pat ana hih touh dan chiangtak in muhtheih hi. Huai in a gah a suangkhiat te tamtak om a, suut tham mahmah ahih man in a nuai ah bangzah hiam te i vualsuk ding hi:
1. Kha gah tuamtuam Galatiate 5:22 a kigen - itna, kipahna, lemna, thuaktheihna, migitna, hoihna, muanhuaina, nunnemna, kidektheihnate a sanggam, nidang a ana bawlsia te tung ah a hun in suahkhe thei hi.
2. Pathian in kokhuk a pat kumpi innsung tan ah taisan ngeilou hi.
3. Khemna liantak i.e. a pi in luppih dia ana zolna a pat Pathian in suakta sak hi.
4. Thugen tu te’n a gensek mah bang un - Khang khat kia sung a Pathian mangngilh theih a chih uh, tua Joseph tangthu ah en le hang, a innkuan pih te Kanan gam a pat Egypt a a kiang a a hong tai ua ana hutkhiak ziak in a Biakna uh leh a nam uh paisawn chih theih hi.
Hiai ah Joseph tangthu etdan dang in en in Pathian limsak lou leh phawk lou bang ana hileh, khokhuk a paih a a om a kingaisia a a hinna kila thei, Egypt gam a va mangthang mai ding leng hithei hi. Huchi bang hita leh, Israel nam te kial a pat honkhe tu omlou ding a, tuni a Israel min i zakzak uh bang leng Joseph in Pathian ana ginna ziak a manglou in om chi leng kigenkhial lawmlawm lou ding bang hi. Jospeh thu atung a kisuut na a i muhtheih khat ahih leh Pathian a dia a tuaidawng a apat ana kipekhia, Pathian muang a limsak gige tuailai khat hi ahi.
Hichi bang a tuailai hun a hinna Pathian kiang a piak a, Pathian limsak hinkhua; khemna tampi tak lak ah eimah hatna kia a zoh ding vual hilou hi. I doukhop tek ding khemna tam mahmah ahih man in, Pathian limsak lou a hunzat tuh mi, long(boat) a zapna (rudder) omlou, tuipi in a utna na a a sep toh teh theih hi. Pathian limsak lou a hinkhua zat ngaih ngam huai hilou hi. Pathian limsakna mohpuak midang a tuam hilou in, eimah mohpuak tek ahih dan chiang le hang deih huai mahmah hi. Huai ding in eimah lungtang mahmah Pathian a dia kisukawngthawl bang ngai a, Pathian Khasiangthou ompihna i tan theih na ding in hon sudau thei thil te koih khiat bang le ngai ding hi. Mihing tuailai hun tomchik, a om gige ding hilou ahih dan leh hon Siampa phawk ding thu Eklisiasti 12:1, 11:9 leh Jakob 4:14 te ah muhtheih hi. Nna hoih sepna bang, Toupa Jesu in i kiim i kiang a vak ding ah hon thuhilh na te bang, gah gige ding a hon thukhak te bang tuailai hun mahmah a zuih i sawm pah uh hoih ding hi.
Huai kia lou in hiai hun a Pathian a dia iki thunun leh eimah nungchang le I theihlouh kal a kibawl toutou ahih man in, Pathian limsak a, amah ompih theih dia kisin luat ding ahi. Huaiziak in hiai hun manpha tomchik sung hon siampa a ding a zat pilhuai leh pilvanhuai mahmah khat hi ding hi. Tuailai khat Pathian toh kinai a hun a hon zat chiang in amah a ding kia a kikhek na hilou in a innkuan, a gamsung, a saptuam leh khawtang a ding tan in kikhek na hoih tun thei ding hi. Pathian ngaihsak lou tuailai tamna ah siatna tuamtuam te tam in innsung, khotang leh saptuam sung tanpha chidam sak lou thei hi. Mi tamtak in a tuailai hun uh a zatkhelh ziak un a hinkhua uh kisia in sihna liim guam bang ah ana liam pah uhi. Bible ah Canan, Samson, David, i chih te a hatlai uh leh a tuaidawng hun uh ana zatkhelh ziak in melma pa thang ah ana puk uhi. Mihing i tuaidawng lai in khemna chi tuamtuam te hat diak hi. Hiai khemna a pan a suahtak nang lampi omsun tuh Pathian limsak a amah kiah ki lat khiat gige ding ahi. John Piper in hichi in gen hi “the most dangerous thing in the world is the sin of self-reliance and the stupor of worldliness.” “Paunakte 3:7 - Nangmah mit ah pil kenla, gilou taisan in la, thilhoih hih in”. Pathian limsakna leh launa toh hun i zat gige uh, tu khang gilou ngial ah i zuih mahmah ding uh ahi.
Psalm 145 a pan a kila, quote - “Man’s chief is end is to glorify God, and to enjoy him forever” leh Marka 8:36 - Mi'n khovel a pum in a nei henla, a hinna tan zel leh, amah a ding in bang a phatuam dia? chih thu te ngaihtuah detdet in hichi bang a hunhoih mikhat hinkhua a khatvei a tung khit nungtung ngei nawnlou ding hi. Zang hoih in khotang, gam-leh-nam, innkuan leh Pathian a ding in zangthei le salam, khalam banglam peuh ah masawn na kinei hulhul ding in upmoh huai lou hi.Hiai hun Pathian a di’n na zang ding maw? Setan a di’n? Thupuk na nang khut ah om ahi, sanggam!
