Tuailai Pathian limsakte tuh innsung mite a diing mahmah in khalam leh salam vualzawlna leh khamuanna poluttu hi uhi. Lawm-le-vual a diing in zong muanhuai in lungkham, dah huna hehnem leh lampi dik kawk muhtu hi zaw uhi. Mite'n deihsak leh hawmthoh mahmah in a kiang ua om nuamsa uhi. Thilhoihlou leh siatna lak apan hotkhiak in omzel uhi.
Bangziaka Pathian limsak ngai a diam chih ngaihtuah lehang a mawkna hilou hi.
Pathian lem bawltawm maimai bia hilouin Pathian hing leh siangthou, iitna a dim kidang ngeilou eite zon masak hilou Pathian zonkhiakte I hihman un hamphat huailua hi. [Jeremiah 10:10, Jeremiah 15:16]
Toupa Jesu Khrist khelhna himhim neilou hondam dingin mihingte(eite) melpu in hongpai hi. Hong iitna ziaka Pathian hihna ngaineu in a hinna hong luikhia hi. Hiai bang iitna hangaa hinna pia chih Pathian dangte ah kimulou hi. Nang leh kei khalam le salam damna dingin a mel mihing melpu zou nonlou khopa sawisak leh zahlakna teng hong thuakin kuhkaltak in a kros puak pua zoulou pipi in pai teitei hi. Tua bangteng a thuaklai in a lungsung ah nang hong ngaihtuah in omkhinta hi. Huai ziakin a hotdamna thei chiang taktakte a dingin a iitna thupi leh lamdang nial vual hilou hi. Amasapen in Pathian limsakloute bang chi uhiam chih en masa leng deihhuai kasa hi. Laisiangthou sunga zong muhtheih diing tampi om hi [Luke6:47-49]. A thu thei a zuilou teitei tuh sehnel tunga innlam bang diing hi. Pathian zongloua I ngaihsak keileh mahni lungkim na ding leh thawmhaunate hihdim tu ding zu , khamtheih, internet, TV, leh thildang tuamtuam ah ki zong teitei hi. Ahihhang tuate in sawt daihlou in lungkimna taktak leh khamuanna taktak hon petheilou uhi. Amah zongloua thildangte zon ziak un a nuntakna uh siatloh in innsung leh midangte a lungkhamna tuntu leh buaina bawltu hi zaw. Midangte a ding khual banlou a ut dandana omin , huai kia leng hilouin mahni sanga upa zawte leh midangte zahtakna leh khualna tawm mahmah hi. [2chro 10:6-14]. A lauhuai mahmah bel a tangtawn mun diing uh mulkimhuailua hi.
Tuailai Pathian limsak hihtheih na diingin suut theih tampi om hi. Tuate lakah a poimoh penpen Pathian iitna theih chet masak kul hi. A iitnate bangci theih chet diing chihleh a thu ah, thuumna leh mi toh fellowship nate ah.
Pathian a masapen a koih ding. Amah na zon masakleh mu ngeingei ding [ matt 6:33]. Huai ban ah na thawmhauna tengteng aman hong hihdim ding[Sam 107:9,amos 5:4] , amah na limsakleh hong lohchingsak thei tu ahi[job8:5] , amah ah I kingak naakleh taksapna omlou hi[ Sam 34:10].
Pathian thupiakte zuihna ah [Luke 11:28] Gentehna diingin amah I lungtang teng, I kha tengteng, I hatna tengteng, I lungsim tengteng a iit ding, eimah ki-it banga I vengte iit ding ahi [Luke 10:27], mi khentuam neihlouh ding [Jakob 2:9], a diktatna, ginna, iitna leh lametnate delh diing[2 tim 2:2] Pathian in kithoihna sangin thuman hoih zaw chi hi. Tua thumanna pen a thupiakte zuih a deihdana omna ahi. Nu-le-pa leh sanga upa zawte zahtak ding ahi.
Pathian a siangthou ziakin amah ompih leh tenna taak hihtheihna dingin pumpi siangthouna poimoh hi. Nek-le-dawn , kivatna leh kampaute ah kikemsiangthou ni. Muanna leh lametna te thildang tampi tungah va kingak baihlam mahmah hi. Thildangte ah lametna I koih chiangin thilhoihlou lamah hon pi zaw hi. Pathian muanga kalsuan kichi thil haksapi ahi. Ahihhangin Pathian muanga lametnate I ngak lebel a hun sawt thu ah buailouin a muanhuainate kimu semsem hi. I khangsawn te tanpha ah a muanhuaina kimu chiang diing ahihmanin thupilua hi.
Laisiangthou thu sunga Pathian limsak tuailai genteh ding tampi omte laka mi bangzah hiamte ensuk ni.
David bang valnou tung ahih akipata Pathian ompih leh Pathian muanga limsak gige mi ahi. Tua hangin Pathian ompih leh ka lungsim bang pu chi hial hi. Belam chinga omlai pekin ganchingte ne dinga hongpai ngia leh vompite Pathian in zohpih zel hi. Israelte dou dinga Philistiate mihat mahmah Goliah kuamahin a sual ngamlouh himahleh Pathianin zohpih ding ahi chia muanna a nei ngam amah chouh ahi. Tua bang in Pathian a muanna zahzahin gualzohpih hi.
Kuamah theih phaklouh belamching maimaia omlai nangawna Pathian a muanna in lungtang enchianpan a nungin kumpi dingin thaunilh hi. Sam laibu a I muhbangin David in Pathian deihdan lampite zongin a nuntakna ah ngai mahmah hi.
Pathian in amah a diingin leh a mite a dingin vanzat manphatak suaksak hi. Amah tungtawn in melmate apan Israelte hotdamin omzel uhi. Huai kia hilouin Pathianin amah khangsawnte mangngilh lou hi. A tapa Solomon hunin a kumpigam ah galmuanna om, Pathian biakbuk ding lam patin om hi.
Tu hun a eite mahbangin David in thilhihkhial khalou hituanlou hi. Ahihhangin bangziaka mangngilhlou hiam chihleh thil a hihkhelh hun inleng Pathian a zon teitei ziakin, I khelhnate ngaidam dia mansa gige I Pathian kianga ngaihdam ngenin ngaihdamin om hi. Pathian toh a kizopna hoihtakin bawlhoih zel hi.
Solomon hun ensuk non chiangin a gamsungah galmuanna Pathianin omsak hi. Kuamah tan ngei nonlouh diing kumpi hihna thupi penpen khuksakin om hi. [2chro 1:3] Kumpi Solomon in Pathian kianga haltum thillatte lan dingin kuantou hi. Hiai ah a bul pandik hi. Pathian mah naiha limsak ziakin vualzawlnate penuamin na deihdeih hon ngen in a chihlaiin Solomon in amah a ding kia khualloua thudik(Justice) a mite tunga vaihawm siamna pilna nget ziakin Pathian lungtang sukha ahihmanin mipil penpen mah bang pil om ngei nonlou ding khopin pilnate piak ahi. Huai kia hilou in a ngetlouhte nangawn leitung hauhsakna tuamtuamte zong piak behlap hi. Hiai hi mwle a thupipen Pathian zon masak a lungkimna hihkhak kana hamphathuai leh kipahhuai omlou hi. Solomon in Pathian be diinga pai masalou hileh hiai bangteng ngah thei tuanlou ding ahihziakin Pathian a masapenpena koih hi nak manphatlua ahi. Himahleh a poi mahmah bel a hun tawplam ah Pathian limsak nonlou a milim Pathian dangte a biak ziakin a tapate hun ah kumpi lalgam kiphelzakin galmuanlouhna ngenin om hi.
Nek-le-dawn leh omdan (lifestyle) ah Pathian limsak hihna theihtheih hi. Daniel leh a lawmte in zong Pathian a dingin kikem siangthou uhi. Mi gama om suanlam bawl thei dinmun himahle uh Pathian mah limsak ziakun a kim-le-kianga thil omte ah kihihninlouin kikem siangthou uhi. Huchi banga om ngamna in midangte sanga mel etdan mahmah ah hoih zaw in kilang hi. Pathianin laisiamna leh pilna tengtenga thuamin kumpipa Nebukadnezzar in a gamsunga thu dot te mitkhial dawi leh bummi tengteng sangin hoihsa zaw hi. Kumpipa deihsak leh ngaihnat hongsuak uhi. Abiiktakin Daniel in Pathian toh kizopna hoihtak nei ahi chihleng Chiang mahmah hi[Daniel 6:10, 9:3] neuchik ahih a kipat nikhata thumvei thuum gige mi ahihdan I mu hi.
A sepna mun ah lungsim hoihpen a kumpipan thei ahihmanin heutuliante leh bial heutute tungah kumpipan koih tum hi. Hucihilaiin heutuliante leh bial heututen dem theihna ding teng zongin panla mahle uh Daniel mi ginom ahihziakin a diklouhna a mukei ua, huchiin a Pathian dana demna ding chihlouh ngal omkei chiin kikum in a kumpipa uh chihlouh Pathian dang hiam mihing dang hiam kianga thuum omleh humpinelkaite huangsunga paihlut diing chih thupukna bawl uhi. Huchibanga kumpipa kianga Daniel heka om takin kumpipan humpinelkaite huangsungah khum hi. Huchihlaiin leng Pathian a muanna ziakin humpinelkaite bangmah loh saklou in suakta hi. Hiai ah amah tungtawn in Pathian muanhuainate muhtheih leh amah a dinga ginomtaka sepna munmun a semte a diingin lauhhuaina ding omlou hi.
Daniel lawm thumte Sadrak,Meshak leh Abednego te zong milim Pathian mai a kun utlouh ziakun meipi kuang zuazua laka paihlut in om mahle uh a puan them na ngawn uh kanglou in suakta uhi. Amauten meikuanglak apan hotkhiak in om kei le uleng milim Pathian belou ding chia thupukna a lak ngam a Pathian muangngama kalsuan ziakun hotkhiaka om, amaute tungtawnin Pathian thilhihtheihna thupina leh Pathian hing neite ahihna uh mite kianga puangzak in om hi. Huai kia leng hilou in a sepna ua kumpipa deihsaknate mu in kaisangsak hi.
Pathian thumanna in amah limsak I hihna tanglang hi. Pathian thuman tuh nu-le-pa leh sanga upa zawte thuman leh zahtakna leng ahi. Joseph in zong a Pa thumangin hih ding a chihte hihzel hi. A omdan leh gamtatdan ah Pathian muanga limsakin a sepna bawlna khempeuhah mi inn a omna ah , suangkulh a taangna ah mite deihsak leh hehpih in om hi.
Potipher innsunga thu neihna tengteng piak ahihlaiin Pathian deihna a zon zawk ziakin Potipher zi in ana ngaihbawl laiin zong a sa duhgawlnate taisan ngam hi. Dikloutaka ngoha om in suangkulha khumin om zw mah hi. Suangkulh tanna ah Joseph kiangah Toupa om gige in a vengmi hehpihna tangsakin Joseph khutah suangkulh tang tengteng kemsak hi. [Gen 40:6-7] ah Joseph in mite khualin a haksatnate uh theihpih hi chih theih hi. Pathian in hihtheihna a piakte zangin suangkulh tangpihte kumpipa uain pepa leh tanghou bawlpa mang a hilh chet sak hi. A omna munmun a midangte a diinga phatuam hidingin kizang hi. A hilh chet bangin tangtung hi. Himahleh kumpipa uain pepa suangkulh apat a potkhiakin Joseph a thei gige keia mangngilh pah hi. Huchiin kumpi pharo mang nei in a hilh chian thei kuamah omlou ahihlaiin uain pepan Joseph hong phok khethak hi. Tua phokkhiak ahihtakin Pathian in a thupi zw sem a zangin Pharo mang letsak in a gamsunga kum hoih leh kial Kum 7 hongtung dingte leh niang leh tai kum huna panlak ding dante hilh chetna pia hi. Kumpipa pharo in Joseph tungah Pathian kha om ahi chih thei in a gamsunga heutu diingin bawl hi.
