Amasa in simtu tengteng navek un i Toupa Jesu Khrist min in itna Chibai ka hon buk hi. Tulai i gam sung dinmun i et chiang in a lungzi’n huai mahmah mai hi. Hichi bang buaina khukpi in hon tuam lai in khenkhat i-it i-ngaih tamtak te’n sihna hanmual ana zawt san mahleh uh eite hoihna omlou hi zen pi Pathian in a hehpihna hon tangsak lai a i kipak ahi. Hiai bang haksatna i tuah lai ua leng tuailai tampi tak te’n maban khosakna ding hoih zaw ahih khak leh chih ngaihtuahna tawh gam thuk lam i zuan ua, adiak in Delhi khuapi ah melthak tampi tak i muhtheih man in i kipak ahi.
Tulai lungsim a hon lian mahmah khat ahihleh Pathian limsak tuailai hih sang in dangka sum- le-pai limsak tuailai ihih khak ding uh alauh huai mahmah mai hi. D. L. Moody in “Thil khat peuhpeuh Pathian sang a na it zawk pen na milem pathian ahi” ana chi hi. Huaimah bangin, lungsim a i ngaihtuah tampen leh hun i piak tamna pen i limsakpente ahi. Hiaia, ‘Limsak’ in sepna neite’n sepna vai tawh kisai a limsak a neih pen leh siamsin laite’n siam sinna tawh kisai a limsak a neih pen gen hilou hi. ‘Limsak’ in a gen bel khovel thilte sang a Pathian limsak zawk a neih pen gen hizaw ahi. Khristian i hihna ah bang limsak pen in i nei a chih lungsim a ngaihtuah kawm in thupi a hon kipia “Pathian Limsak Tuailai” chih enkhawm leng i chi ahi. Pathian Limsak Tuailai chih i theih nadia theih dia poimawh masa ahihleh ‘Pathian limsaklou’ chih i theih masak ngai ahi.
‘Pathian limsaklou’ ichih chiang in Amah (Pathian) thu sinsak zuih utna lungsim neilou, amah thu zuih sang a mahni ngaihdan, mahni thu paipih ut zawk a neih pen Pathian limsaklou te lak a khat ahi. Hiai banah, Exodus 20:3 “Ka ma ah keimah lou ngal pathian dangte na nei ding ahi kei” (BSI). Hiaia, pathian dangte ahihleh, Pathian limsak sang a khovel nei-le-lam sum-le-pai, sa-utnate, mit-utnate, damsung thupina limte limsak zawk a neih pen Pathian limsaklouhna ahi. Huailou in Pathian limsaklou in khovel a ateng sung in Pathian it sang a khovel thilte it zawk, deih zawk, lunggulh zawk a nei, dikloutak a golhgukna lak poisak louhna, dikloutak a sepna lei poisak louhna, Laisiangthou sim a hun piak sanga khovel vai a hunpiak tam zawk a neih pen Pathian limsaklouh na ahi. Pathian limsak tuailai i theih na dia Pathian limsaklou theih kia in a hun kei hi. Pathian limsak tuailai i theihna dia a poimawh nawn ahihleh ‘Pathian Limsakna’ bang hi hiam chih theih ngai nawn ahi.
‘Pathian Limsakna’ ichih chiang in Amah (Pathian) it-te itpih, Pathian huatte huat pih a neih pen Pathian limsaknate lak a khat ahi. Huailou in, gamtat-khohei Khrist Tanchinhoih toh kituak sak a neih pen Pathian limsakna ahi. Huai banah, Pathian limsakna in bel A thupiakte zui, Pathian limsakloute hoihsak bang a om ngeilou, mikhialte lampi a leng dinglou leh musitte tutphah a leng tu ngeilou leh a lungtang tengteng, a kha tengteng leh a lungsim tengteng a Pathian itpen a neihna pen Pathian limsakna ahi (Deut 6:5).
Hiate banah, Pathian limsakna in Joseph bang a dikloutak a thilhih-theihna mun a bangchi’n khelhna khawktak hih in Pathian tung ah thil ka hih khial thei dia? (Gen 39:9) lungsim a chih theih a neihna pen Pathian limsakna ahi. Daniel leh a lawm thum Sadrak, Meshak leh Abednegote bang a milim pathian mai a kunlou, biaklouh leh nek-leh-dawn tungtawn a kikep sianthouna pen Pathian limsakna hi. Pathian limsakna in Job bang a hinkhua a haksatna chiteng atuah hun a leng Pathian gensia lou leh atuah bang Pathian min a pom thei leh Pathian adia sih tanpha a ginom na pen Pathian limsakna ahi.
Awle, thupi a hon kipia “Pathian Limsak Tuailai” i chih te mi bang chi bang mite hi uh hiam? chih i en ding. Pathian Limsak Tuailai i chih te bel ‘Laisasiangthou sim limsak, Thumna limsak, Biakna limsak, Taisan nei leh aneih a lungkim.’ Pathian limsak tuailai chih i gen-ut khatna ah ‘Laisiangthou sim Limsak’: Pathian limsak tuailai in bangziak a Laisiangthou sim limsak hiam? Aziak ahihleh Laisiangthou pen Pathian’ Aw zakna mun, ei gingtu khristiante adia hinna, sianthouna, Khristian gamtat-khohei ding dan hon sinsaktu banah i lampi leh vak ahi. “Na thu ka khe ading in khawnvak ahi a, ka lampi ading in vak ahi” (Sam 119:105).
Hiate banah, Laisiangthou in mihing lungtang khek thei, Laisiangthou sim na tungtawn a khial hih lam hon kithei sak semsem ding leh huai tungtawna Pathian limsakna hon neisak ding, Pathian toh hon kichimat sak semsem ding ahi. Huailou in, Laisiangthou sim limsakna tungtawn a sakhi luitui duh a nak hawkhawk bang a Pathian thu lunggulh na hon neisak ding (Sam 42:1) leh khalam khanna dia hon lamkaihtu leng ahi. Laisiangthou sim limsakna in melmapa Satan khemna apat i puk louh na dia lampi hon kawkmuhtu leh khovel a dik loutak a hinkhua zat theih na mun a diktat tak a hinkhua hon zang saktu ahi. “Valnou in, bangchi in ahia a omdan ahihsiangthou ding? Na thu bang zel a a-omdan venghoih in” Pathian thu tamsem theihna in nang leh kei omdan hon hihsianghthou ding” (Sam 119:9).
Pathian limsak tuailai chih i gen-ut nihna ah ‘Thumna Limsak’: Pathian limsak tuailai in thumna a limsak na bel ‘thumna’ ichih chiang in ei gingtu Khristiante adia Pathian tawh i ki chimat na ahi. Banah, “Toupa kei thu hilou Nang thu hi hen” chih theihna pen gen hi zaw ahi. Jesu Khrist leng Gethsemane huan a athum lai in “Pa hoih nasak leh hiai nou ka kiang a pan lasuan in; himahleh kei thu hilou nangmah thu hizaw hen,” a chi hi. (Lk 22:42).
Huailou in, thumna a limsak nawn na jiak uh ahihleh Pathian deih lam ahi. “tawp lou in thum un” (1Thess 5:17). Bangziak a Pathian limsak tuailaite tawplou a thum ngai hi hiam? Aziak ahihleh thumna pen Pathian toh i kihou na, i taksapte i ngetna, i lungkham mangbatna tengteng amah kiang i tut na leh i ki humbitna ahi. ‘Pathian iki humbitna leh i hatna, mangbat lai a huh pahpahpa nai gige ahi” (Sam 46:1). Hiate banah, Pathian limsak tuailai in thumna a limsak na ziak bel melmapa Satan khemna apat a puk louh nadia thumna limsak ahi.
Pathian limsak tuailai chih i gen-ut thumna ah ‘Biakna Limsak’: Pathian limsak tuailai in bangziak a biakna limsak hiam? A ziak bel ei gingtu Khristiante adia biakna mun pen Pathian phat khawmna mun, Pathian thu leh laa a kisinsakna mun leh Pathian pomtak kithoihna siangthou a omna dia kisinsak na mun ahi. Banah, Kumpi David in Sam 84:10 “Na huangsung intual a Nikhat om tuh mun dang a ni sangkhat sang in a hoihzaw hi. Gitlouhna puanite a om sang in i Pathian inn kongkhak ngaktu hih leng ka utzaw ahi” Pathian biakna limsakna in gitlouhna puan-innte a om utna a pat hon pii-khia ding, Pathian mit-siipna thil khoih theih na mun leh nek-le-dawn a kikep siangthou louh theihna mun apat hon pii khe ding ahi.
Pathian limsak tuailai chih i gen ut Li- na ah ‘Taisan nei’: Hiaia, ‘Taisan’ ichih chiang in Pathian tawh ki-chimatna apat hon dal thei thilte taisan a neih pen taisan nei kichi hi. Pathian limsak tuailai in bang chi bang thilte taisan hiam? Huaite ahihleh, Nunglam a thil omte taisan (Phi 3:12), kingaihna, nitna, hukna, utna gilou, huaihamna, huaihamna milim biakna ahi (Kol 3:5), dangka sum deihtakna (1Tim 6:10) hiaite taisan a nei tuailai pen Pathian limsak tuailai kichi ahi. Hiate banah, Pathian limsak tuailai in a nunglam a thil omte a taisan a aneih kawm in lainatna lungtang, migitna, kingaihniamna, thunuailutna a kivan a nei ahi (Kol 3:12) leh a hinkhua a Kha’ gahte a paai gige (Gal 5:22-23).
Pathian limsak tuailai chih i gen ut Nga-na ah ‘aneih a lungkim’: Hiaia, a ‘aneih a lungkim’ in a gen bel sepna hoih taktak neih ziak, sum-le-pai, inn-le-lou ki ningchingtak neih ziak a lungkimna pen gen hilou ahi. Himahleh, huai khenlama Pathian limsak tuailai aneih a lungkimna ziak bel aneih Jesu Khrist tungtawn a tangtawn hinna neite ahihziak a huai a lungkim ahi.
Atawppen a Pathian limsak tuailai in a taksa pen Jesu Khrist sisan a leisa (1Kor 6:20) ahihdan a thei chianlua a, hinkhua a zat lel pen Pathian limsakna leh Pathian pahtawina ding mah a zat a nei ahi. Huailou, in Pathian limsak tuailai in a khovel thil tengtengte sang in Pathian limsak zawk a nei, Amah min ziak a khovel thilte taan ngam, a hinkhua masa te mangngilh/taisan, leh a tatdan tengteng a siangthou na tawh a niteng Khros pua a Jesu Khrist zui ahi.
