I naupan lai in i nu-le-pate, i heutute, leh ei hon keemtu-te’n lam tuamtuam ah sinsaknate hon na pia uhi. Hiai a sinsakna i donte tunung a i hinkhua a diing a thil phatuam pipi hi ahihman u’n manpha mahmah hi. Huchiin i hong piching deuhdeuh a tuailai i hong hih chiang in mahni khe a i din hun a hong tungta a, i naupanlai a i na sintouh thil tuamtuamte eimah a zatdan kisinsiam hong poimoh ta hi. I nu-le-pate leh heutute’ tung a kinga nawnlou i hihna toh hinkhua a i tuahtouh tamtakte’ tungtawn in sin theih dang tampi hong om hi. Huchi ahihman in i tuailai hun pen salam leh khalam a i khankhiak hun poimoh tak hi a, i thil ngaihnat leh ngaihpoimoh, i ginna, leh i lungsim put dan leh hindante hiai hun in a tamzaw bawl in hong om hi. Huchi ahihman in i tuailai hun pen mihingte’ a diing a kalbi poimoh mahmah ahi i chi lou theikei hi.
Tuailai hun a manphat dan Laisiangthou ah leng muh diing hunkhop om hi. 1 Timothi 4:12 ah Pathian in Timothi kiang ah “Na naupanna kuamah musit sak ke’n; thugen ah, tatdan ah, itna ah, kha ah, ginna leh sianthouna ah, gingtute’ zuih diing hi zaw in” chi in ana gen hi. Huchi mah bang in David, Joseph, Mari, leh adangdangte leng tuailai a hoih hun laitak u’n Pathian in zang chih muh theih in om hi. Hiaite’ tungtawn in i tuailai hun pen manpha mahmah a Pathian in leng hiai hun in hon zang ut mahmah ahi chih muhtheih hi. Huchi ahihna ah ei Kris gingtu kichite’ a diing diak in tuailai hun a poimoh khol diak hi. Eite’n i hinkhua ah deihteelna poimoh mahmah bawl diing kinei a, huai ahihleh i tuailai hun Pathian’ a diing in hia i zat diing ahihkei leh khovel a diing in chih ahi.
Na kiim-leh-kiang a na tuailai pih gingloumite Pathian limsak tuailai ahi uhia chih kidong lehang “hilou” chi a kidawng chiat diing in a gintaak huai hi. Tu in nang-le-nang kidong lechin “Pathian limsak tuailai ka hi” na kichi ngam diam? Na kichih ngam leh bang ziak a kichi na hi a? Hiai thugelh sim suk kawm in hiai dotna kidong kawmkawm le i chi ahi. Kristian tuailai ka hi na kichi a, Amah a diing a kizang mahmah na kichih lai in, Amah enton in hinkhua na zang hia ahihkeileh khovel mite’ pahtaak diing lel zong na hikha hiam? Tuni in na niteng hinkhua zat dan kivel chian thak lechin Pathian limsak tuailai na kichi ngam diam?
Kristian innkuan a pan a khang khia in hinkhua i na zang tou ua, Pathian thu leh la-te i naupan lai apan a i na zaaktouh gige ahihman in theih lampang in bel i thei mahmah uhi. Hichibang a amah theih a, a thu i theih pen Pathian limsakna leh Amah adi’a kipiakna sa kha mi tampi mahmah ki-om hi. Himahleh Pathian limsakna i chih huai kia in hun lou hi. Pathian limsak hinkhua i zatna ah khemna i tuah touh diing tampi om diing a, huaite kizou sak mai lou a haksa mahleh Pathian muangkawm a Amah deihdan hinkhua zat pen Pathian limsakna hipan hi. Pathian limsak taktak tuailai i hi na hiam chih kingaihsut detdet poimoh mahmah hi.
I damsung in khemna i tuah touh diing om gige diing hi. Himahleh tuailai hun mihing hinkhua a diing a khemna a tam hun pen hi diing in a gintak huai hi. I hoih lai leh i hatlai hun pen hi a, lawm-le-vual bang leng i hauh pen leh poimoh pen hun leng ahi hi. Huchi ahihna ah midangte’n hon pahtaak a hon phawk diing uh i poimoh lai tak uh leng ahi. Huai ziak in lawmte apan bang, khotaang thil ziak bang, leh nopsak utnate ziak in khemna a puuk khaak baihlam mahmah hi.
Tulai khovel khangtou hiaihiai ah khemna leng pung in olsam mahmah ta a, ei gingtute’ lak mahmah ah leng thil ngaihzamna bang tam mahmah ta hi. “Hiai khawng khelhna ahihlouh pi” chih theih diing bang kihau mahmah ta a, lunglutna leh etlah bang hau in “Khatvei sunsun bang poi mahmah kei”, “Hinkhua tomchik sung a nuam sak diing” chihte khawng a mahni kikhem a om khaak baihlam mahmah hi. Hichibang lungsim toh tuailai tampi Pathian nungzui kichite theihlouh kaal in khelhna sal a taang in om uhi. Ei gingtu kichite’n i theih diing ua poimoh mahmah ahihleh “heutu nih nna kiseem kop theilou” (Matthai 6:24) chih ahi. Laisiangthou mah ah “Gingloumite toh kituakloupi a haakkol pokhawm in om kei un” (2 Kor. 6:14) bang leng ana kichi a, Pathian limsak hinkhua i zatna ah khovel deihdan in hin theihlouh a, huchi mahbang in khovel deihdan a hin i utleh Pathian ki-limsak theilou hi.
Huai ahihna ah Pathian’ deih bang a hinkhua zang diing a i kisakna u’ah pilvaanna diing tampi om hi. Pathian theihna leh Pathian limsakna i chih kibang lou ahi chih thei kawm in i ngaihtuahna, i gamtat-khohei, leh i lungluutna te Ama’ deihdan toh kituahsak poimoh hi. Pathian limsakloute toh omdan kibang in ki-om thei ngeingei lou diing a, bangchi bang thilte kei’ ginna toh kituak a bang lampangte ka tawpsan a ka nawlkhin ngai hi hiam chihte i khensiam poimoh mahmah hi. Sa-utna bang, neek-le-dawn a kideekzohlouhna bang, sum-le-paai a tatsiatna bang, midangte’ siatna diing a thu-leh-la bawl a genna bang leh adang tamkhop kingaihtuahna diing om hi. Leitung ah hinkhua khat kia nei mah lehang nikhat ni chiang in hiai leitung pawtsan a i tangtawn mun diing zuan diing i hi chih i mangngilh louh uh poimoh hi.
Khemna tamtakte i tuah diing hon phal a, himahleh hiai khemnate douzou diing in leng hon muang hi. Hiaite i douzohna diing in Amah lam i ngat a a panpihna i nget poimoh hi. Huaiziak in haksa mahleh Amah hon siampa’ deih dan in hinkhua zang photphot lehang eimah haatna a i zoh zohlouhte zohtheihna diing in haatna hon pe ngei diing hi. Khovel a i om sung a nuam sak louh diing chihna hilou a, himahleh i hih ut leh i gen utte, i duh leh deihte Pathian’ deih dan toh kituak mah hi hiam chih hoihtak a theih chet poimoh mahmah hi. Pathian limsak hinkhua i zatna ah i taisan diing, i mansuah diing tampi om mahleh Van a i kipahman diing lam mitsuan in huai delh in taai lehang, hiai khovel etlawmnate khen a thupi zaw kipahman in ei honna ngaak ahi chih thei in i hamphatna mangngilh kei ni.
Pathian in mihingte deihteel theihna nei diing in hon bawl a, i deihteelna dungzuui in hinkhua zang thei in ki-om hi. Himahleh Eklijiasti 11:9 ah “Aw tangval, na tuailai in kipak in; na tuailai nite ah na lungtang in hon kipaksak hen, na lungtang lampite ah leh na mitte muh in om in; himahleh hiai thilte tengteng ziak in Pathian in nang vaihawmna a hon pi ding ahi chih thei in” chi in ana geen hi. Huchi ahihman in i deihteelna tungtawn a Ama’n vaihawmna a hon pii diing ahi chih thei kawm a pilvaang tak a hinkhua i zat uh poimoh mahmah hi. I niteng hinkhua ah Amah etton pen in nei in, Amah i lawmhoih pen ahihlam thei gige in i nopsakna leh i haksatnate tengteng Amah kiang tun gige lehang Ama’n i haksatnate hon ngaihkhiaksak mahmah diing hi.
Khovel ah nuamsak utlou kuamah ki-om diing in a gintaak huai kei hi. Himahleh khovel thilte apan lungkimna i muhte’n sawt daih ngeilou hi. Tuni in ei Kristian tuailaite Pathian theite maimai hilou a i niteng hinkhua a Pathian limsak a Ama’ deihdan a hinkhua zangte hithei diing a i kipat thak uh poimoh hi. Pathian’ nna seem zeel, Amah deihlouh daan a khovel thilte a kibual thei zeel i hihleh kua nna peen ahia i sep diing chih kiveel thak hun mahmah ta hi. Amah a diing a hun-leh-ni i zatte a vaal omlou ahi chih thei in i siamna-leh-pilnate, i thahaatna, leh i hoihna leh etlawmna te Amah pahtawina diing leh Amah min thupina diing in zang lehang kisiikna omlou diing a, ginom tak in a gam nasepna ah pang lehang eimah hinkhua tungtawn in midangte’n leng Amah lam hon zuan thei diing uhi. “Lungkimna toh kithuah Pathian limsakna tuh punna thupitak ahi” (1 Tim. 6:6) chih thei gige in lungkimna taktak Amah kiang kia ah zong in Amah lam zuan thei chiat diing in kuapeuhmah i biak Pathian in hon ompih in hon vualzawl chiat ta hen. Amen.
