Genesis 39:1-5 Toupa Joseph kiangah om hi.
Ephesate 5:24 Kiniamkhiak ding bangkim ah.
Tuailai hum kichi hun poimoh mahmah,zat khelh leh thil teng kikhel thei ahihman in manpha tak a zat theih I ut chiat ding uh ka lamen hi.Tuailai hun a kigen chiangin ,tua I nute thugen khong bang le tuailai hun nop dan a gen tam pen ua,hun poimoh tak ahihdan theihtheih in a om hi.Khristian gingtute adingin Bible I et chiangin Tuailai hunzang manpha tampi etton ding I mu ua,amasa pen in Jesu Khrist etton masak ding a neih mah poimoh pen ahi chih I thei uhi.A zom in Daniel te lawmta bang le etton tham ching mahmah,lawmta thum ten pilna a sin na ua pat leh omdan khosakdan te a pat in zong sin theih ding tampi I mu hi.Joseph hinkhua apat in leng sin ding tampi a om hi.
Ken tuni a Bible chang kon tel khiak Joseph hinkhua a pat in,Tuailai Pathian limsak kon tel khia ut hi.Joseph tangthu I theih chiat ding uh a lamet huai hi,thumangtak leh thuakhat mi ahi chih zong I mu thei uhi.A pa thu a mang a,a pan zong hawmthoh in a duat hi.A uten a haza ua,zuak in hong om a, Potipher inn ah hong om in,A pu in muanhuai sa in,a innsung a thil tengteng tung ah thuneihna a pia hi.Banghang a a pu in hehpihna,itna leh deihsakna pia hiam I chih chiangin,Toupa amah kiang ah om ahihman in etton huai kasa hi.Haksa tampi a tuak a,a ute zuak bang leng a huat bawl kei hi.Joseph in a siam thu a gen kei a,a pu in jail ah a koih in zong ka pi in hong luppih in chi in dawng kik in ama hih na gen tuan lou in a pu koih bangbang in lungkim tak in jail ah lut top mai,thupi kasa hi,a siamtan na ding thugen a neikei hi.
Tuailai thuakhat leh kingaise lou Joseph ahi,a thuak mualsuah hun tung veve hi.Tuailai hun in mimal ah zong thuakna,gensiatna,engbawlna khong thuak lou ki om lou a,aman Toupa a muh chian luat man in thuak mualsuah zou suak a,a thuguk lian pen hi a ka theih bel Toupa muang khial lou,kiniamkhiak na hinpih ahihman in Tuailai manpha leh Toupa ompih leh Pathian limsak tuailai ahi chih a kimu thei hi. Joseph in Toupa zahtak in a lampi tengteng ah amah ah muanna koih ahi chih a ki chiang mahmah hi. A hinkhua gentheih huai tampi a thuakzohna thuguk bel Toupa a neih man ahi chih I theithei uhi.
Tuni in ‘Tuailai Pathian Limsak’hih theihna dingin mimal kuapeuh ki enpha in I omdan leh gamtat in Khrist tanchinhoih I kituak sak taktak ta uhia?ki vel thak chiat ni.Joseph bel jail sung ah a om in leng Toupa toh om in,haksatna mun tampi ah a tuah hangin,Khrist tanchinhoih theihpihtu ahihna miten mu in, hehpihna, deihsakna te in zui in,hun haksa tampi a tuak te galkai pih zou hi.Tua ahihman in Tuailaite I hat lai un,sep theih na ding hun I neih sung un,a tam theilam in na hoih sep te chimtak lou leh sep zawm kisin a niteng a I Khros uh paw kawm in Pathian limsak ni.Toupan a kisin zou a semkhe zou zel dingin eite ah hatna a omlouh hangin I Toupa Jesu Khrist a hat a,muanhuai lua ahi.Ginna in kalsuan in Toupa muang in Pathian limsakna ah theih tawp suah in pang ni.
Laisiangthou a I muh bangin,Tuailai hinkhua pen Setan in le hon hihbuai ut mahmah hun ahihman in,Pathian limsak a amah toh kihou tawm leh hon subuai ding thil tampi om a,Pathian khut sung ah I kikemsak gige ding uh.Daniel telawmta bang le theihpihtu muanhuai ahi ua,Pathian thuman louh ding pen a lau pen uh ahi. Huchimah bangin ei tuailai ten le thudik lou leh zuau hat na te mudah in,amah iit pen in nei thei le chih deihhuai mahmah hi.Siamsinna ah le Pathian limsak hiai Daniel te lawmta bang a le eite le om theih luat ahi.Ahangbel amau Pathian ei Pathian a kidanglou ahihman in,Toupa hatna muang in kisin ni uh kei tel in.
Tuailai Pathian limsak ihihleh khovel nopsaknate nusia in eimah ut leh nopsaknate khelah lou in,Pathian deihlam a hinkhua siangthou leh diktat a gamtat,nek-le-dawn a kidek thei mi mah hih sawm ding ahi.Hon siampa a siangthou a,a diktat hi Joseph in a pu muh louh kal in leng thil hoihlou ahih ngam kei hi, Bangziakin I chih leh aman Pathian mu chian mahmah ahihman in mihing muhna sang in Toupa muhna pan kichian zaw chih theichian in,thil hoihlou hih ding a lau hi.Tuni a ei tuailaite le mihing muh kia tum hilou in,hon en chian gige Toupa muhna pan in bang dinmun in ka om a,chih kivel thak ni uh aw!Toupa mit lah mitengteng tung ah a vak dundun hi,kei leh ka tuailaipihte,sianthouna,diktatna,zuautat louhnate toh hinthak I sawm chiat ding uh,ei a hih zoh louh sep zoh louh,hon zohsak thei Pathian hing bete I hi ua,eilam apat kisin in delh in kalsuan thak chiat ni uh.
Tuailai ni lah bangmah lou ahih khak ding lauhuai ahi,Tuailai nite a hon siampa theigige te mah mi hampha pen ahi.Tuailai nite in kingainiam in Toupa mai ah kun in be ni,kingaihniam na lah Toupa deihlam ahi ngal a,Joseph kiang ah Toupa a omden bang in ei tuailaite lak chiat ah Toupa hong lal pen leh Tuailai nite a manpha in I zang ding uh,Kei a nang a dingin Toupa mansa in omden a,Joseph hinkhua kem pan eite le hon ompih thei gige ahi chih manghilh kei ni.
Tuailaite saptuam te adia le khuam poimoh mahmah I hi ua,insung a ding kia hilou in,limtak a kisin ding in I belh I muan,Toupa in hon makaih in,theihpihtu,thuzuitute,Toupa limsak tuailaite hiding in Pathian in hon makaih chiat leh chih ka duh thu sam ahi a,I hatlai uh,I tha neih hunsung un sit neilou a kalsuan a,I hihtheih uh neu lua lian lua chih omlou in,septheih bang lam peuh ah Joseph bang a ginom thutak a om dingin pang chiat ni,na hoih sep te chimtak lou leh zoh chih omlou,sintouh zel ding omden ahihman in chihtakna,kuhkalnate,I zuih a ,muanhuai Jesu nungzuihna ama hatna muangin kalsuan hunta hi,hun tam omlou pah thei ahihman in.
I hun uh manpha lua ahi chih thei kawm in Toupa ki kemsak in,ama deihlam zong in amah kipi sak chiat ni uh aw.Eite kia in I hihtheih louh a sem ding Toupa muanhuai ahi chih thei in hanchiam in diktatna, siangthouna toh I tuailai nite uh Pathian limsak kawm leh,I maban a hun hong pai zel ding ah mite a ding a vualzawlna tun tu hi ding in leh,Khrist leh saptuam a dia a leh tam zaw a ki zang thei chiat ding in Toupan hatna leh theihna hon pia henla hon vualzawl ta hen aw.
