Tangthu khat kigenna ah, saw ltak Paul hunlai in mi hausa khat in amah thu ana zakha a, thupi salua in kimuhpih sawm tinten hi. Huaiziakin, Rome khopi tawna a khualzinna khat ah, Timothi toh kihout uak in su angkulh a om Paul toh kihou na hun lemtang khat ana sai hi. Amun atuntakin, mihausapa’n Sawltak Paul amuh in a gintak banglou takin upa mahmah leh a upat ziaka hatlouh mel asa mahmah masa hi. Himahleh ahong kihou taktak chiang un Paul in Khris ah a kingakna ziaka tha aneih mahmah dan leh amel vaak zotdan lamdang mahmah khat ana mu hi. Hun bangtan hiam akihou nung un huai mi hausapa apawt khia hi. Suangkulh paw lam atun takin mihausapa’n Timothi kiangah Paul thahat dan lamdang asak mahmah dan genin, athahatna thu guk ana dong hi. Timothi inle amah kiangah, “Na kihou nate uah le theichiang zo u lou nahi mo? Paul in a iit mahmah khat aneih ziak ahi.”chi’n adawng hi. Mi hausapa’n le mak asa mahmah a,“Ku a ahia hichituk a a iit?” chi’n adong nawn hi. Timothi inle,“Khris Jesu ahi Paul in a iit mahmah”chi’n adawng hi. Mi hausapa’n le mak sasem in, “Hiai lel mo a thuguk?”chi’n adong nawn a, Timothy inle nuihmai deuh in, “Hi, Paul adia Jesu Khris a bangkim ahi” chi’n adawng nawn hi. (Leonard Griffith, This is Living [Abingdon], p. 149)
Mihing in tomchik idamsung un thil lunggulh, iit leh deih chi tuamtuam inei den uhi. Ineu lai un school a homework hon kipiaklou h ni bang, ahihkeileh ei nasep ding mikhat in ahon sepsak chihte khawng kipahpih maimaite ihi u hi. Himahleh ilet deuhdeuh dungzui in i lunggulh uh hong tu am deuhdeuh hi. Ei namsung diak bang gen hitalen'g, hamphat huaitakin Khristian innkuan apan piang leh khangkhia vek sim i himai u hi. Laisiangthou ineu uapat in ina sim tou ua, Biakinn ah le Pathian thu iz aden phial u hi. Himahleh khalam-ann sang in salam-ann in hon hip (entice) zaw abat hun tam mahmah hi. Ei tuailaite lakah enle: I tup, I ngim, I deih, I lunggulh te uh Pathian deihdan sang a mimal deihdan, Pathian kipahsakna ding sang a I mihinpihte (ei adia poimoh leh poimohlou zodeuhte) kipahsakna leh amau lemsakpihna (approval) deiha hinkhua zangkha toutou ibat hun uh tam mahmah bangsek hi. Hichibang manphalou hinkhua ana zangkha tuailai hunkhop omkhin, omlel leh omtou laiding ahihziakin I pilvan mahmah uh poimoh petmah ta hi. Huaiziakin hiai thugelh(article) saulou pansan in ei Khris a om Tuailaite adia hinkhua manpha iz at theih nading ua thupi poimoh mahmahte laka khat: 'Pathian limsak tuailai' chih I gensau lai ding.
Pathian limsak hinkhua bang ahia?
Pathian limsakna (Godliness) Greek thumal eusebeia apat kilet ahi a, sakhua (religion), Pathian zahtakna/Sahkhomi-na (piety) ahihkeileh kipumpiakna/ki-aapna (devotion) chih ale let theih ahi. Tanglai Greek leh Romte biakpiakna hunte ah ana kizang den ahi. Huaiziakin, Pathian limsak hinkhua ahihleh Pathian alai a koih (God centered) hinkhua chihtheih ding ahi. (https://www.workingpreacher.org/commentaries/revised-common-lectionary/ordinary-26-3/commentary-on-1-timothy-66-19-3)
Ei Khristian te’n Khristian ihih lam ithei mahmah uh, himahleh bangchi’n omleng Khrist gimnam taktak in ka omthei dia chih pen ana ngaihtuah taktak itamkei maithei uhi. Biakinn kai gige, Sunday school te a kaikimna lawmman (prize) lak ahihkeileh Saptuam vai tuamtuam a kiheltam tan khawng Khristian hihna dan a koihkhak abaihlam mahmah hi. Tuakia hilou a Pathianthu zilna (theology) ah degree sangtak neih bangle Khristian hoih hihna dan a pom bangle omkhak theihmawk hi. Himahleh tuateng mahni pilna, siamna leh thilhihtheihna ah kinga a nasepna chikhat maimai ahi. Hiaiteng zuih leh neih nung ale hawm (empty) tak a omtheih lai ahi hi. Hiai hawmna bangziak a omthei lai hiam ichihleh a tasam khat omlai ziak ahi. Huai tasam pen tuh ‘GINNA’ ahi. Hebrew 11:6 a, “Ginna louin Pathian kipahsak vual ahi kei” chih kigen hi.
Huaiziakin Pathian limsak hinkhua tuh Pathian alai a koih ban ah Ginna leh nasepna tel hinkhua ahi.
Bangziak a ei tuailaite’n Pathian I limsak uh poimoh ahia? Amasa pen in, Pathian in ei mihing te Ahon siam in Amah toh kizopna hoihtak neidia Ahon siam hi. Himahleh I melma in I biak Pathian hing toh iki gamlat sem nadia salam leh khalam a nasa tak a ahon dou hi. Hichih lai in, ei Kristian sepaih Tuailai te’n itheihlouh kal un a thang kamna ah ina awkkha sek uhi. Matthai 4:1-11 leh Luka 4:1-14 kikal ah kigelh bangin ah Jesu le diabol khem-a om dingin Kha in gamdai ah apilut hi. Hiaimun ah sun sawmli leh zan sawmli an ngawl a aom lai in, khemtu ahong pai a, khemna chituamtuam in pan hon la hi. Laikhaktu (Epistle) Johan in hiai khemnate chithum in hon khen nen hi: mit a khovel thil etlahna (materialism), taksa etlahna (hedonism) leh kisaktheihpihna/kihoihsakluatna/kiletsakluatna (egoism). Ei khemna tuahtele tuadan in khentheih gige ding abang hi. Jesu inle gilkial-dangtak tak a aom lai a khemna te maituah didan ahon sinsak hi. Diabol in Laisiangthou thugente pansan in akhemsawm lai in Jesu inle Laisiangthou mah zang in,”Hichi a gelh ahi…” chi’n hilhchetna ape chetchet hi. Khemnate tung a avualzoh nungin Jesu in a nasep taktak panta hi. Huchi mah bang a enle Pathian in ei adia nna isep di uh sehsa a Aneihte isepsuah ut taktak theih nadua Amah thutak te theichiang a, khemna te idou ua, Pathian limsak hinkhua izat uh poimoh ahi.
Anihna in, Paul in Timothi kiang ah laikhak di agelh lai in Pathian limsakna (Godliness) thumal ngai poimoh mahmah in, alaikhak saulou 1 Timothy sung a athupi hial a zang in, kuavei (9) tak zang ahi. Sawltak Paul in 1 Timothy 4:8 ah hiaidan in agen hi: “Taksa kisawizoina leng a phattuam zeksam a, himahleh Pathian limsakna bel thil tengteng ah a phattuam hi, thamlouin, tu hinkhua a ding leh a hongtung ding hinkhua a dingin thuchiam anei hi.” Huaiziak a ei Khristian te adia I tu dinmun kia lel hilou a, I tangtawn dinmun nasan abitna ding a Pathian I limsak uh kuul mahmah hi. (https://www.bibleref.com/1-Timothy/6/1-Timothy-6-6.html)
Pathian leh A’ tuailaite: Laigelhtu khat, Rev. Charles Seet in hichi’n ana gelh hi, “Khristian hihna zaw nna dang toh kop theihlouh full-time nasepna ahi”. Ei Khris gingtu tengteng in hiai full-time nasepna a panmun neichiat ihi uh. Khristian ihihna in I niteng hinkhua: inn ah ahihkeileh sepna lam ah ahihkeileh kimawlna lamah hitaleh lam chiteng ah hon sukha ahi. Khristian i hihna ah pilvang leh kuhkal tak a panlak gige, salam leh khalam a thadah theilou bangmai a ipan gige kuul hi. I niteng nasep ding uh om gige ahi. Paul mahbang a, I Khristian hinkhua in I Pathian thilhihtheihna leh vangletna miteng muh theih gige dia a taklat ding ahi. I nasep hoih te’n Pathian limsak thuzawhna (Godly influence) ahon piangsak maiding a, Jesu Khris in sepsuah ding thupiak gol Ahon piak penle semsuahtu in kipang theiding hi. (A Christian in a Non-Christian World, Charles Seet)
I Pathian tuh mi naih mahmah ut (intimate) Pathian ahi a, I kongkhak bul a ding in, I minchiat a hon sam in, ei lungtang dawnna ngak in kong A hon kiu hi (Isaiah 43:1, Romte 3:20). Huaiziak a enle I lungtang teng toh Pathian adia I kongte uh I hon chiat uh poimoh ahi. Huchi hileh Amah toh mimal tak a kizopna hoihtak (personal relationship) kinei theiding ihi uhi. Himahleh hiai kizopna daltu tampi omte lak a khat ahihleh Pathian toh ikihou theihna - I laisiangthou te uh iphen mun hetlouhna ahi. Biakin kikhopnate nasan a tawi khalou zen in munkhat ah ikoihdap khanak uhi. Inn ah le Laisiangthou sim nadi hun pezoulou itam mahmah ding uh gintak huai hi. Huchibang I hihkhak leh zaw Joshua 1:8 ah kigen bang a – “Na biakna uah dan laibu sim gige un, thupipen in nei gige un. Sun leh zan a suut unla, a sung a kigelh tapeuh zuih diing thupipen in nei un” kizui zoulou ihi uhi. Taksa hat nadia ann inek zel bang ua khalam ah ihat zawksem nading ua khalam ann (Pathian thu) inek gige uh le poimoh mahmah ahi.
Ban ah I niteng hinkhua Jesu sihna leh thohnawnna hinkhua ahih le poimoh ahi. Jesu sihna tuh ei adia I khelhna lam ah sihna ahi a, Jesu thohnawnna tuh Pathian lam ah Adeihdan a ihing taktak thakna ahi hi. (Rom 6:11)
THUKHITNA: Sawltak Paul, Khristian heutulian leh sawltak masate lak a ana tallang diak leh muanhuai mahmah khat ahi. Mite’n Paul taksalam ah hatmel hetlou a amuh lai un, aman “haatlouhna ah ahi ka thilhihtheihna hihbukim a a-om” (2 Kor. 12:9) chi’n miteng muh theihdia Pathian limsak hinkhua siangthou leh manpha ana zang hi.
Tuni in ei Khristian tuailaite’n Jesu Khris leh Paul khekhap zui a pan la in, Jesu ah om in, Athu limsak kawm a sin in, Ginna toh nasem in, pan lalehang Pathian limsak tuailai ihi taktak ding ua, I hihla lamlam uah Ama’ deihdan takin I gahsuah ding ua, I lohching ding uhi. Huaikia hilou in, mite’n leng Pathian limsak tuailaite amuding ua, Amah thupina apesawn ding uhi.
