Thumapi: Mihing khat ihinkhua ah hun tuamtuam in sehkhen theih hi. ‘Tuailaini’ hun khat ahi, hiai hun poimoh mahmah ahih ban ah taksa soi khauhna, sep leh bolna ah leh lam chi tuamtuam a mite etlah mahmah ahih kom in khalam vai ah leng Pathian in amah nungzui a ana sem ding a hon zat nop laitak ahi. Huchi ahih kom in setan in leng siatna bulpi a hon tut ding atup thupi pen ahih ban ah lungsim leh ngaihtuahna mumal loutak a koih a hinkhua kining leh omzia neilou a mahni hinna kilak tanpha hon tut ut in niteng in lam chi tuamtuam ah zolna hon bol gige hi. Hiai khovel buaina chi tuamtuam om te tunglam ah ei Christian tuailaite a dia poimoh masa ahih leh, bang chi leh pathian limsak kom a hinkhua zat ding chih ahi. Pa khat gamvak ding in akuan khiat dek in atapa kiang ah ‘Bawi, ka om louh kal in anntang na su in o’ chih toh pot khiat thuah hi. Apa thupiak ngaihsak in semzui pah ngal hi, hiai ahi limsakna kichi. Apa thupiak ngaikhia in semsuah kei ta leh limsak hilou ding a ngaikhia maimai hi ding a himah leh thupiak om pen ngaikhia a sep khiat pen ahi limsakna kichi. ‘Pathian limsak tuailai’ kichituh houcik a gen in, tuailai hun a pathian lau a athupiakte hinkhua a semsuah te ahi, pathian limsak ichih nungzuitu hinkhua leng hi mahmah hi.
Pathian limsak loute, kuate hi a bang chih dan in a om ua? Austrian psychiatrist minthang leh holocaust ana palkai, Viktor Frankl in ‘when a person can’t find a deep sense of meaning, they distract themselves with pleasure’ chi hi. Dik leng adik mahmah kasa hi. Mitampi ten’n hon siampa thei kichi mah le uh bang ziak a siam a om hi uh hiam chih ngaihtuah na nei lou bang mai in khohei gamtat ah mahni ki thununna muh ding om lou hi. Hichi bang mite’n noptalna hinkhua tan lel in niteng hun zang bei gige uhi. Akhen te’n ahih leh gamtat hoih leh thil hoih hih ziak peuh in pathian limsak bang in ki koih pawl bang om hi. Hichi bang mite ahih leh om dan ah leng etlawm huntawk in om uhi. Amaute ahih uleh piangthak ahih hang un Toupa sinsakna te nelh siah uhi. Hiai ma a igen tegel a tel khalou pawl khat omlai uhi, hiai te ahih leh poisakna neilou hinkhua zang lellel te hi uhi. Amau te’n pathian leng athei kei ua zong leng a zong sam kei uhi.
Pathian limsak tuailai leh a om dan uh: Pathian limsak tuailaite’n tuh, i hondampa Jesu Khrist gingta in pianthakna kichiantak nei uhi. Amaute kingakna bulpi ahih leh I Toupa Jesu khrist ahi, amah ngei in leng laisiangthou mun tampi ah na gen hi, Johan 15:4-5 ah leng chiang mahmah mai hi. Pathian limsak kichituh nungzuitu hinkhua ahi(Matthai 4:19), kua nungzui ding? Amah(Toupa Jesu Khrist) nung I zuih a athupiakte izuih chiang in pathian limsak chauh hilou in alohching leh gahsuah Christian kihi ding hi. Tuailai khenkhat koimun peuh ah imuh chiang in nuihmai leh kipak theitak in om gige mok uhi. Amaute melhoih pente ahi kei ua, pilna siamna hoihtak neite leng ahisese kei uhi, huai sang mah in ahihna bangbang utoh lungkim theite hizo uhi. Hiai mite’n pathian alimsak uhi aziak ahih leh pathian hon bol dandan a lungkim theite ahih ziak un. Jesu’n anungzuite kiang ah mite mitmuh in avak uh taangsak ding in thuhilh hi(Matthai 5:16), ka ki vualpih mite toh kipol thei pahpah mi kahih ziak in lom leh vual ka hau mahmah hi, kaneu deuh lai in ka om dan leh ngaihtuah dan a diklouh chiang in kei lam a panglou te ki mihoihsak leh lepciah dan in kana koih sek a ka houpih tam ut kei hi, huai mite mah in Sunday school kai leh kikhop hun teng in ka inn uah hong ton manghilh kei uhi ninghuai kasa hun tam mahmah hi. Ka ngaihtuah kik chiang in amaute’n aneih uh Jesu Khrist kiang a honpi ut uh ana hi lim uhi. Tu in tuailai ka hong hi ua pathian hehpihna toh atamzote piangthak kahi ta uhi, Pathian kilakna bukim Bible thute gingta in ka pomkip ua zuih ding leh hinpih touh zel ding ka tup uh ahi.
Maban ah Pathian toh kizopna leh amah limsak tuailai ka hong hih touh theihna ding un etkhiatna, chouna,ze-etna hong tung thei ding tuamtuam om hi. Hun haksa leh lungkiat hunte ahong tung chiang in kou mah deih dan a pai lou a amah (Toupa) ka dot masak ua ama deih dan a ka paitheih chiang un amah limsak ka hiding uhi (Isai 55:8-9). Kei leh ka lomte ban ah ka tuailai pih mitampi te a ding in ‘iitna’ kichi theih siam haksapi ahi a, tampi mahmah in khennen theih hi, huai te igen man kei ding. Himahleh hiai khovel in iitna apiakte hilou a laisiangthou a 1Korinthte 13:1-13 in agen bang dante nei a pathian limsak a thupiakte jui ihi theihna ding in. Sang a upa zote thugente apan kana theih leh kipalpaih na suangtum hi a kana ngaihtuah tuh, I tuailai lai in lom leh vual toh kithuah a potkhom a ei ut dan a om kan a nuam omlou chi ka theih tampi om hi, amaute selphou som kahi zenzen kei a huai naksang in kei/ka tuailai pih te’n Toupa deih dan bang a ka om theih na ding un mahni kithununna lenkip zou gige pen poimoh hi, Daniel leh alomte’n kumpipa nek leh donte hamphat pih a nuamsatak a om thei ding hinapi in mahni kithunun zoutak in annteh louhing na tel zo uhi, pathian alauh ban uah athupiak te alimsak uhi.
Ban ah amaute asep abolna khempeuh uah thanuam leh taimatak a omte ahi uh chih haih vual ahi kei hi. Isai 9:6-7 isim suk leh ihondam pa Jesu Khrist tuh lemna lal, khamuanna leh diktatna pathian ahi chih chiangtak in muh theih in om hi. Huai toh kiton Matthai 5 na isim suk leh hiaite nahih uleh pathian tate chih a om ding ihih dan muh theih in om hi, amah tuh hiai hihnate a om hizolou in hiai hihnate amah a om hizo ahih man in, eite’n leng hiaite ineih ding tuh amah deih lam ahi. Hiaite ineih theih chiang in amah limsak kihi ding ahi. Toupa Jesu Khrist in Bible a ana gen “thupiak gol” achih tuh tanchin hoih gen ahi, pathian limsak tuailai in koi peuh a om in bangteng sem in bol in om mah leh hiai thupiak gol a nelhsiah kei ding hi. Hiai sepsuah na ding in pastor hiam missionary hiam hih masak kullou a himah leh sepna khempeuh a ginom,chitak leh diktat tak in a om chiang in tanchin hoih puangzak hipah mai hi.
Thukhitna: Huai ziak in tuailai te’n I tuailai hun a ei hon siampa thei a amah thupiakte izuih chiang in pathian kipak a adeih lam kisemkha hi. Khovel a teng lai ihihziak in doutu leh daltu koipeuh a om gige ding ahi, mihing ihih ziak in hiai te eimah hatna a douzoh vual hilou hi (Ephesate 6:12), himah leh pathian hing neite ihih ziak un ihampha uhi amah thute sim a amah toh niteng a hun zatpen in hiai khemnate a puk ding hon veng hi. Kou lomta sung ah piangthakna kichiantak nei atamzo himahle ung mi bangzah hiam te’n Khrist homdampa a sang thei nailou uhi. Hiai gel a telkha lou te ahih uleh piangthaksa himah leh nungtolh hinkhua zang uhi. Ka tuailai pih mi tamtak in leng hichi bang tuak ding un ka gingta hi, amau te Pathian khebul a pitu ding in Pathian limsak tuailaite’n mohpuakna lian mahmah liangkou tung ah kinga hi, athu agen in gen thoh theikei mah le hang I om dan leh gamtat khohei ah lang sak ni hang, pathian zatak ihih theihna ding in eilam apan leng kiman na om ngai hi. Toupa’n thupina tangta hen.
