“Lungkimna toh kithuah Pathian limsakna tuh punna thupitak ahi” - I Timothi 6:6
Tuailai Hun: Tuailai hun pen hun manpha ahi a kichi naak a, mihing hinkhua a hun nuam pawl ahi chileng I geen khial kei ding hi. Deih banga hinkhua zat hun, deihtelna hun leh i tup leh ngiimte sukbuchinna hun ahi. Himahleh, hun nuam ahih kawm in hun haksa le ahithou hi. Mabaan a hih di, nekzonna hi in laizilna lam hitaleh, mangbang leh lungsim buai tak a i om laitak ule ana hi hi. “Ka zil leh ka sep pen ka lunglut/ ka lunggulh pen mah ahi hia? Ka sungkuan te adia kingakna muanhuai kahi zou diam? Ka tup tan tung in ka lohching zou diam?”, chih kidotna tuam tuamte atam a, teel di hauh lai leh lamka tam ahihmanin teel di pen le theih zohlouh huai phial ahi.
I tuailai hun zatdan in i mabaan hinkhua naakpi a influence ahihman in hiai hun a poimoh dan ngilh vuallouh ahihna ah, teel khelh dile alauh huai a, pressure tampi toh hinkhua izat laitak uh le ahi. Haksat hun in nopsakna leh lungmuanna di akizong sek a, huchih hun in Setan inle hun lemchang sa in, Pathian in eia dia hon geelsak hinkhua apan ipial theih na’ng un khawvel nopsakna tampite ilampi ah hon koih naak hi. Khem a iom ua, ihinkhuate uh ei thu a ihon zat Chiang un I hunte uh bangmahlou a zat mangthat leh khelhna a kibual abaihlam mah mah hi. Laizilnate ziak hiam, ahihkeileh nasepnate ziaka sungkuan tetoh omlou a khopi leh mun tuam a omkhia tuailai tamkhop i om ua; huchi bang dinmun a omte adia omdan hoih leh kilawm, Pathian limsak a, Amah deihdan toh kituak hinkhua zat didan hon kawkmuh thei leh hon sawitu di a omlouh na ah, en huai mohpuakna bangchi’n ila thei di ua?
Excess Culture, Technology leh Tuailaite: Mihingte social animal ihi uh chi a om ua, dik mah diin le igingta hi. Ipian apanin i nu leh pa, isungkuan te uh i social circle hon hipah ua, amau apat pai dan, pau dan leh mi lak a om didan ana kizil masa hi. Ihon let deuh ua lawm khong ihon polh theih chiangun ki compromise dan leh mi toh kituak tak a om didan, banah i heutute uapan lai sim leh gelh didan chihte khong ina zil tou lai uhi. I thil tuahte, i lawm thuahte, i innsung, vengsung, leh gamsung boruakte leh niteng hinna a I thil tuah touh te un i hinna uleh i omdan uh hon khoih kha lou theikei hi. Midang toh ki sukha a omden ihih man un khawvel leh mi deihdan toh kituak a om utna a mak kei ichi masa ding uh ahi.
Khawvel i khualzinna uah i Khristian hinkhua te uh hon subuai thei leh hon sukha thei hon tamsem ziak in tulai tuailaite’n haksatna lamdang tak ituak uh hi. Tulai hun a neih sanga tam zaw deihna, ‘excess culture’ ah- thuneih zawk, lohchin zawk, hoih zawk, hauhsak zawk utna te a ki tawisang lai a- tuailai te adia tawp theilou, bei ngeilou thil zonna a kipei mangthat a baihlam hi. Hiai culture social media ah leng naakpi a muh theih di’n a om hi. Technology leh social media ziakin khangthak tuailaite adi’n khawvel a hon neu sot a, khawvel kil teng phial apan theih ngeilouh, muh ngeilouh te muh theihna hun a teeng ihihmanun, tuailaite niteng hinna subuai thei leng ahon ki behlap hi. Media a muh theih thil omte’n tuailaite ngaihtuahna, ginna leh lungsimte uh thuzoh theihna lianpitak anei hi. Social media neilou tuailai tawm mah mah diin ka gingta a, i feed te khong uh i et chiangun kal lak lak ah i mi muhte dan khong uh hih utna, ahihkeh aneih te khong uh deihgohna nei lou ki om khollou diin ka gingta hi- mihing hihna khat ahih ziak in. Tulai adia normal leh hiai utna te mihing hihna ahi ichih kawmkawm in, Amah kibatpih ngei a hon siampa deihdan bang ahia chih tuailaite a dia kidotna poimohtak ahi. Khawvel nopsaknate ah hon hiip thei di tampi kaal a teeng ihih man un, Pathian makaihna leh pilna zon hon poimoh semsem hi.
Pathian Limsak Tuailai: Pathian limsak tuailai ichih te uh bangchibang ahi ua chih dotna bawl di hile adawnna te lak ah kikhop taima, Bible thu theihna hau, biakinn leh khotaang vai ngai poimoh, saptuam a kiheltam leh ki pezou chihte khong tel dingin a gintak huai hi. A limsak te a hichih ding mah ule ahi; a hichi te lem kineih (acting) ahi uh ichih na hilou in, hiai kithalawpna pen koiah hon kipan ahia chih suut poimoh ahi. Muh theih a thil ihih khiak te uh mun tuam– mi’n mihoih a muh diu utna, minthan utna, thuneih utna chih te khong apan le hon kipan thei ahi. I ‘hoihna’ te uleh theihna te uh kisaktheih pih a mi simmoh khak theih mawk ahih ziakin hoih kisak zawkna le Setan in khemna a hon pilut na hithei ding ahih chih manghilh kei leng ichi ahi. Isiatna te seelna ding hiam, ahihkeh midangte tunga leen ding utna ziaka Pathian deihlouh dan a omkhak ding pilvan huai ahi. Pathian in ilungtang ahi hon nget. Khristian hinkhua ah muh theih thilte sanga muh theihlouh– ilungtang, ingaihtuahna, ikhalam sianthouna leh damtheihna chihte poimoh zaw ahi. Bangkim a Pathian lungkimnadi zong a, kingainiam tak a Amah kiangah ikipiak ding uh hon ngen ahi.
Thil khatah ihun leh tha iseen chiangun agah di ingaklah pah sek ua; gah pah diin agah hoih a hoih di chih kinem kha naak zomah. Himahleh Bible a taangthu tampite tungtawn hiam, ahihkeileh ei mahni hinkhua ah leng imu diua, Pathian in lem hon gelsak dante mihingte adia suikhiak vuallouh ahi. Pathian limsakte’n thil nuamlou pal lou a, athil hih peuh uah lamzang ding uh ahi ichih utsim uleh tuh kingaihtuah thak poimoh ding ahi. Khawvel etdan a mi i et chiang un anei zaw te’n vualzawlna dong diak uh mah ana bang maithei hi. Khenchiangin lei gou vualzawlna tetoh manphatna i mekmat ua, a mi pen manpha sa in aki thupibawl kha naak hi. Vualzawlna hiaizahta dong ahihleh aginna bang haat biik, ahihkeileh mihoih dia gintaak baihlam sa a, athu te ule laak taak kisa pah sek hilou hiam? Pathian limsak mah mah khat hinapi a zawng leh genthei khat i social hierarchy uleh mihing etdan in vualzawl a om ahi ichi diuam? Ahausa pen pa thu bangin thu anei diam? Lei gou hauhsakna leh a mi pen sanga hon vualzawltupa manpha zaw lou hiam? Jesu toh tonkhawm lou a hinna izat chiangin lohchinna leh lei goute apan lungkimna tak tak imukei ua, huaiziak tak in kipahna leh lungkimna zong in I neihsa te sang mah ua ‘tamzaw’ leh ‘hoihzaw’ ana kidelh sek hi.
Pathian limsakna ah hangsanna le poimoh petmah diin a gingtak huai hi. Taimang ut lai a ginna ziaka ding kip a, mahni kimuanna leh deihtelna paih ngam angai hi. Ilungsim uleh itaksa utnate uh tunga vualzohna hon pia a “ngamna” hon pe tu, hon bawltu Pa Pathian deih pen amasapen a koih a, Amah thu mang a, Amah muan zawkna pen apan Pathian limsakna hon kipan ahi. Khawvel deihdan toh kituak in omkei lengle ka lungkimna Toupa ah ka nga thei ichi theita uhia? Pathian deihdan hinkhua zang dinga kisa peuhmah in ipom chiat diua poimoh khat tuh mi “hing” hih, khawvel a ikhualzinna uh leh Khristian hinkhua haksa ahi. Haksa di mah le ahi. Sawltak Paul in 2 Timothi 3:12 ah leng, “Ahi, keupeuh Khris Jesu Pathian limsak a om tum phot phot in sawina athuak sam ding uhi” ana chi hi. Pathian thu deih a zui thei tuailaite adi’n a haksat kawm in kikhek lamdan theihna leh kipahna lianpi le om ahi. A hing a hon bawl ziak mahtak inle Setan in sihna lam izot theih na dingun pan naktak in ana la hi. Himahleh, Jesu Krist hondampa a sang a, hon thupiakte gingta a chitaktak a izuih uleh tuh si lou a tangtawn hinna ahi Pathian in hon thuchiam. Pathian limsak tuailai ihih ut uleh mahningleh mahni ki etchet a ikhalam damtheihna ding ua dotna haksatakte ikidot ua, Pathian in ilampi zuih dingua hon bawlsak I zuih uh i mohpuakna uh ahi. Khawvel hauhsakna leh punna te chouh ah lungkimna zon louh a Pathian limsakna leh Amah thu te ah izon masak ding uh ahi. Sawltak Paul in 1 Timothi 6 ah ahon theihsak mah bangin, hauhsakna diktak khawvel hauhsaknate hilou a, Pathian limsak leh Amah deihdan a hinkhua zangte’n mu uh ahi chih lungsim ah leenkip in lungkimna leh hauhsakna diktak omna lam mitsuan dingin ikideihsak hi.
