THUPATNA: I thupi tel uh tangvom omna anuai a bang in enkhawm leng i chi ahi:
“Himahleh lungkimna toh kithuah Pathian limsakna tuh punna thupitak ahi. Khovel ah bangmah i lutpih kei a bangmah i pawtpih theisam kei ding hi. Himahleh, nek ding leh silh ding nei in, huaite ah i lungkim ding uhi.” (1 Tim 6: 6-8).
Hiai a ‘Pathian limsakna’ kichi ‘pathianmitna’ chi in leng lehtheih ding hi (BI sut ah). Sappau in ‘godliness’ akichi ahi.
PATHIAN LIMSAK I CHIH BANG GENNA HI DING HIAM? ‘Pathian limsakna’ ahihkeh ‘Pathian limsak’ i chih ei mimal theihsiamna zang a genchiang theihna tuamtuam a-om ding gintak huai hi. Himahleh, ei mimal theihsiamna leh muhdan pen zang zawlou in i Laisiangthou sung ah zongkhawm leng i chi ahi. Hebrute bung 11na en leng ginna a mihangsante min bangzah hiam I mu ahi. Hiai ginna a mihangsante Pathian limsaklou omkha ding in gintak huailou uh hi. (Bukimlouhna bel nei chiat ding uh ahi). Huai ziak in, hiai mihangsante lak apan mi khenkhatte’ hinkhua en leng ‘Pathian limsakna/limsak’ i chih theihsiamna khat i neithei ding ahi. Hiai ginna a mihangsante lak ah tuailai - Joseph, David leh Danielte min lungsim ah ahong kilang pah ahi. Amasapen in, hiai tuailai, ginna a mihangsante hinkhua a muhtheih akibang khat ahihleh ‘Pathian muang leh amasapen a koih’ mite ahi uhi. Joseph ahihleh mi thumang mahmah ahi. Mimal tak a a-etton huaina mahmah khat ahhihleh taksa utnate (taksa etlahna) ah khempuk in a-omkei ahi. Potiphar’ zi in bang chituk in luppih ding in zol mah leh Joseph in Pathian alauhziak leh azahtak ziak in hiai khemna ah apuk kei ahi (Gen 39:1-20). Tuailai David in Pathian’ hatna muang in milian Goliath tung ah avualzou ahi (1 Sam 17, Sam 23). Pathian’ dan leh thute lunggulh leh sutsut mikhat leng ahi (Sam 119). Daniel ahihleh mi thummi ahi. Niteng in thumvei a thum gige ahi (Dan 6:10-13). Hiai Daniel i thumna hinkhua a-etton tak mahmah ahi. Huai banah, amah leh alawm mi thumte – Shadrak, Meshak leh Abednego ten sihna tanpha tuak ngam in aginna uh lenkip in gingloumite milimte a bekei hial uh ahi (Dan 3). Hiai tuailaite mi ginom mahmah ahi uh chih i muhthei a, huai kia hilou in Pathian iit taktak mi ahih ziak un haksatna tampite thuakmah leh uh Pathian ah lungkimna leh lungmuanna anei uh ahi (Sam 34, Sam 23). Pathian thildang teng sang a lauzaw mite ahi uh ahi (Pau 14:16;1 Sam 26; Nasepte 5: 29). Huaiziak in, mawltak a gen in Pathian limsakna ahikeh pathianmitna i chih tuh Pathian muan pen a nei, Ama thu leh late ngaihsak, khovel utnate a kibuallou, thumna hinkhua zang, Pathian amasapen a koih leh ginomnate i chithei ding ahi.
PATHIAN LIMSAKNA IN (LIMSAKTE) BANG CHI? Atung ah i muh mah bang in Pathian limsakna ahihkeh pathianmitna tuh gingtute ading a thil poimoh mahmah khat ahi. I thupi kilakkhiakna 1 Timothy 6:6 ah i muh bang in ‘lungkimna toh kithuah Pathian limsakna tuh punna thupitak ahi’. Huai tuh Pathian i limsak leh athawn hilou ding a banah punna houchik hilou ding ahi chih i muthei ahi. Himahleh, lungkimna toh kithuah ahih sese ding chih ahi. Joseph, David leh Danielte hinkhua a i muh bang in amau khovel punna (lohchinnate) delhlou in Pathian mah amasapen in akoih gige uhi. Khalam hinkhua ah lohchinna amuh kia uh hilou in khovel hausakna leh minthannate piak behlap in a-om uh ahi. Hiai tuailaite’n Pathian ah lungkimna leh muanna aneih ziak un Amah amasapen a koihthei (limsak) hi ding un gintak huai hi. Joseph leh Daniel, theihngeilouh gam ah pikhiak in om himahle uh mi gam ah vaihawmtu lianpente dinmun bang ahong tangkha uh ahi. Matthai 6:33 a kigen “Agam leh ama diktatna zong masa un, huchi in hiaite tengteng ahon piak behlap ding hi” chih hiate hinkhua apat in achiang mahmah ahi. Pathian limsak ten tuh Pathian a-it uh ahi. Pathian a itna uh midangte itna ah ahong kilang ahi (1 Johan 3,4). A sanggamte’n Joseph sal in zuak mah le uh, aman agamtatna hoihlou uh phu alakei a angaidam zaw ahi (Gen 37,45, 50). Pathian limsakte tuh mimal ut dandan a hinkhua (khovel utna leh nopsaknate ah atang/awk) zangte ahikei uh ahi (1 John 2:15-17). Pathian’ kha in Amah limsakte a-ompih a, Ama’ gam ading in khuam thupitak ahong hazel uh ahi (Esk: Paul, Daniel, Joseph). Asuan tengteng tanpha un vualzawl in a-om uh ahi chileng i gen khial kei ding. Aziak, eite khelhna apan hon tankhe ding in David’ suan apan in i Toupa Jesu Khrist i Hondampa ahong piang ahi ngal a (Matthai 1, Luke3). Hiaite’n hatlouh hun bel anei zel uh ahi himahleh Pathian in taisanlou in ahatlouhnate uh tungah avualzou sak zel ahi (Esk: David).
PATHIAN I LIMSAK LOUH CHIANG IN (LIMSAKLOUTE) BANG CHI? Gingtute’n Pathian i limsaklouh chiang in Pathian min i zahlaksak uh ahi. Pathian min gensiat in a-om nak ahi (2 Sam 12: 14). Mite’n Pathian hoihna, thupina leh a itnate pom theilou in amuthei kei uh ahi, aziak gingtute khovel vak i hi ua i vak ding bang a i vaklouh ziak un (Mat 5:14-16). Hiai gingtute adin supna lianpitak ahi. Pathian limsakloute kisaktheihna a dim, bangmah theiloute ahi uh ahi (1 Tim 6:4). Amau pilna leh theihsiamnate ah akinga zaw uh ahi. Hazatna in leng a dim uh ahi (Esk: Kumpi Saul; 1 Sam 12-18). Pathian limsakloute’n taksa utna leh khovel nopsaknate apoimoh ngaih zaw uh ahi. Pathian thutak ngaihsaklou in thumnate bang leng a thupi bawl kei uh ahi (1 Johan 2:15,16). Pathian limsaklouhna in thutak apan ahon pialsak nak ahi. Thutak i pialsan chiang in midangte ginna leng I hihmangsak khathei ahi (2 Tim 2:15-18). Thutak ei ah a-om keileh mitdel bang i hi ding hi (Matt 13, Johan 37). Pathian limsakloute’n Pathian kipahna atunthei kei uh ahi (Rom 8:8). Pathian i limsaklouh chiang in Ama vualzawlnate’n ahon taisan ding a Ama lungkimlouhna tuntu ihi ding ahi (Esk: Kumpi Saul; 1 Sam 12-18)
PATHIAN LIMSAK DING BANG ZIAK POIMOH AHIA? Pathian limsakna ahihkeh pathianmitna i chih Pathian’ thutak theihna (theihsiamna) in ahon tut ahi (Titas 1:1). Huai ziak in, Pathian limsakna leh thutak theihna kizom ahi chih i muthei ahi. Gingtute khalam a mitdel i ut keileh thutak theih poimawh mahmah ahihman in Pathian i limsak apoimawh petmah ahi. Dangka sum deihtaknate leh khovel hauhsaknate, a tomlam in, khelna taisan a Pathian limsakna (pathianmitna) delh ding a thuhilh ihi (1 Tim 6:6-11). Hiai tungtawn in ‘ginna kidouna hoih’ dou in ‘tangtawn hinna len’ in i omthei ding ahi (1 Tim 6:12). Thutaklou sinsakte kalh leh dou in mi tampite hotdamna lampi ah I tun thei ding chih ahi. Pathian limsakna in i ‘Toupa Jesu Khrist theihna lam ah thadah lou leh gahlou lou in ahon bawl ding hi’ (2 Pet 1: 5-8). Huai tuh Pathian thu theihna a kidim leh gahpha ding chihna ahi. Pathian limsakna i chih Pathian thumanna kilatna khat ahi (Titas 2:11-13). Pathian’ thu manna in khalam leh salam ah lohchinna thupitak ahi chih i mukhin ahi. Laisiangthou in Pathian limsakna tuh ‘tua omsa hinna leh hong om nawn ding piak chiamna aneih ziak in thil tengteng ah aphatuam hi’ a chi ahi (1 Tim 4:7-8). Pathian limsakte tuh thum mi ahi uh chih leng i mukhin ahi. Huaiziak in Pathian limsakna in i thumna hinkhua hon suhat ding a thumna tungtawn in Pathian ading in thil thupi tampi i semkhe thei ding ahi (Etsakna: Hannah, Esther, Daniel).
THUKHITNA: Pathian limsakna in khalam ah punna thupitak ahon tun chih i thei ahi. Huai kia hilou in salam lohchinna leng apoimoh bang zel in Pathian in ahon pe zel ahi. Himahleh, khovel siatna gam a hinglai i hih man in, Pathian limsaklou leh khelna a kidim khovel taksa utna leh nopsaknate, sum leh pai deihluatnate ah i buainak uh ahi. Hiai khovel itna in Pathian apan ahon gamla sak zel ahi. Pathian apan i hong gamlat chiang in lungkimna taktak i neithei kei ahi. Adiak in tulai khovel ah baihlam tak a muhtheih ding ahih banah etlah ding thil tampi a om ahi. Khovel nopsakna leh taksa utnate ah baihlam tak a kibual theihna hun ahi. Himahleh, tuailai Joseph, David leh Danielte hinkhua ah i muh mah bang in en leng i hinkhua ah Pathian amasapen in koih in, Pathian limsak leng khalam vualzawlna, hinkhua lohching leh lungkimna taktak ei a hong hi ding ahi. Huai banah, Pathian’ gam ading a vanzat manpha i hong hithei ding ahi. Pathian in michih Amah limsak ding in hon vualzawl chiat hen!
