Na tuailai nite in nang honsiampa theigige in, Ni hoihloute a hong tun ua kumte a hong nai ua, Amaute ah kipahna ka nei kei, na chih hun a hongtun nailouh lai in, chia Kumpi Solomon in Laisiangthou a Eklisiasti bung 12 na ah ana gelh bangin hon Siampa(Pathian) Theigige(Limsak) tuailai hi dingin i lungtangte amah deihlam zui thei dingin hon sek sak leh chih ideih pen hi leh ichi hi.
Pathian Limsak tuailai ichih chiangin Pathian leh Tuailai kikal a Thu om “Limsak” kichi in Pathian leh Tuailai kikal Kizopna gen ahi a, hiai Limsak(awlmoh) in Pathian a dia kipia in, a hunte Pathian nasepna leh a thuzui a ahinkhua hoihlouh na leh Khelhna lam a pan ki kem siang chi in mawl tak in a gen theih hi.
Tuailai hinkhua mihing adia hun poimoh mah mah ahihman in, hiai hun atamzaw ten eimah utna lam chiata pai in, ei nopsakna lam hiam, utna lam leh lunggulh na lam a pai in maban ding ngaihtuah lou in, khelhna lam ah tampi kipai mangzel hi. Pathian Limsakna ineih louh chiangun Saptuam Vai hi in Khotang ah hileh mizat theih ding tampite zat khaklouh leh pammaih tampi te om ua. Khamtheih leh guihteih chituam tuam a kibual in chi leh nam lak ah leng minsiatna tampi tun uhi.
Khenkhat Pathian lam a hong ki heia, hon limsak theinonten hinkhua thak leh innsungmite kipahna tun in a chipih leh namte a dia le minhoih na ngahna ahi.
Huaiziakin Pathian Limsaklou te hoihsak bang a om ngeilou a, mikhial te lampi a leng ding lou a, Musitte tutphah a leng tu ngeilou mi a hampha hi, A Kipahna uh Toupa dan ah ahizaw a, adan thu sun leh zan in a ngaihtuah ngitnget hi. Amah zaw tuiluang kiang a singsuan a hun a gahzel anah leng kau ngeilou bang ahi a; a thilhih peuhmah a lamzang zel ding hi chia gelh ahih bang in Pathian limsak hih a ngai a, taksa lam akipat in leng khelhna te lak ah hon ki bual sak kei dia ikhalam leng mangthang mai lou a, tangtawn hinna a honpi lut ngei ngei ding ahihziakin.
Huai ban ah Laisiangthou in Aw tangval, na tuailai in kipak in: na tuailai nite ah na lungtang in hon kipaksak hen, na lungtang lampite ah leh, na mitte muh in om in: himahleh hiai thilte tengteng ziak in Pathian in nang vaihawmna a honpi ding ahi chih thei in. Huaiziak in na lungtang a kipan lungkhamna suankhia inla, na sa a kipan gilou koihmang in: tuailaina leh khan lutlai lah bangmahlou ahi ngal a, chih bangin hiai ah tuailai hunte a Kipak leh lungtang nuamsa in honkipahsakna lampite banglam hiding hiam Pathian limsakna lam hia, ahih kei leh Pathian Limsaklouhna lam chih theih tel a poimoh mah mah hi. A ziak ahih leh pathian in Vaihawm na a honpi ding ahihziakin amah deihdan (limsak) leh deih louh dan(limsaklou) te khenna nei ding ahi ngal a.
Hinna neiteng in hun bi nei a hinkhua zangtou ahia, mihingte ngeklai, Naupanlai, Tuailaihun, pichingleh tekhun chihbangin hunte paitouin, Naupan lai in sia leh pha theihna ki chian nei nai kei mah leh hang Tuailai a kipan sia leh pha theih na piching, a hoih leh hoihlou khenkak theih na ki neita ahihziakin thupukna leh zuih ding ei deihtelna ah kinga ahia nu leh pate leng mawhsak theih hi non lou hi cih theih poimoh ahi.
Huaiziakin “Pathian Limsak Tuailai” hi dingin Pathian deihlam zong in zui in amah minlawh khak na munte ngaihven in awlmoh a nei in Pathian zong in zuanleng ilampite a man hon pi ding hi.
