Leitung hinkhua paidan i et vel chiang in mihingte hinna bang mahlou ahihdan muh theih hi. Mihing teng i hong khanglet dan a kibang het kei hi. Innsung nuamsa apan hong khanglian leh innsung genthei mahmah apan hong khanglian leng i om uhi. Gingtu innkuan a hong khanglian leh ginglou innkuan a hong khangliante kikal a leng kikhiatna tampi a kimu thei hi. Mihingte'n hunbi seḥ nih i nei uhi, huai ahihleh pian hun leh sih hun ahi. Mipil misiam tampite'n ana gen mahbang un i pian hun sang in, sih hun pen in thil tampi gennei zaw hi. A ziak ahihleh i piang zoh a kipan in i leitung hinkhua zatdan a hong kipan a i hong khanglet dunqzui in sinding leh zilbeh ding hong tam deuhdeuh hi. Mawhpuakna hong lian deuhdeuh in, maban hinkhua ding ei khut ah hong kingak hun hong tung hi. Huai ahihleh "Piching" chi a' simtheih hun a hi. Mi piching khat hithei chiang in tuh "sia-leh-pha" theihna kinei chiat hi. Huai hunte leng "Tuailai" hun a kici hi. Hinkhua ah "TUAILAI" hun pen suangmantam hun leng ana chi hial uhi.
Tuailai hun manphatna a hihleh zing nisuak bang a etlawm ahi a, zaitha leh lungsim haat lai hun leh kuapeuh etlah hun leng ahi. Hiai hun pen sum-le- pai lamtam in leng a lei theihlouh HUN MANPHA ahi. Upate leh ei sang a khovel ana zangtou masa-te'n leng TUAILAI HUN ana zangtou chiat uhi. Nu-le-pate'n leng hiai hunpen ana pal tou khin uhi. Tuailai hun pen kum 18 leh 40 kikal lak teng huam kha hi. Hichih hun pen mahni kimuanna a sang hun laitak leng ahi. Thil teng ngam hun leh mahni ki-deihkhopna let mahmah hun leng ahi a' himahleh mi tampite'n hiai hun pen ana zang khial kha leng tampi om uhi. Huaimah bang in midang tampite adia maban kalbi ding bawlna hun leng ahi.
Tuailai hun pen sanakhang hoih lai hun ahi. Hiai hun bang chi'n i zang a chih in maban kalsuanna ding hon pi ding chih i mangngilh louh ding uh ahi. Khovel lam thilte kia enlou a tangtawn hinna lam mah pibawl ding ahi. Khovel lam kia en a hinkhua zat in lukhong neilou ding ahi. Bible ah kigelh bang in TUAILAI hun sung a hinkhua nuam thei pen a zatding ahi. Lunggulh leh deihte hihkhiak ding mah ahi, himahleh i mangngilh louh ding tuh Pathian vaihawmna mai ah nikhat ni chiang in vaihawmsak in i om ngeingei ding uhi. Ei sang a Upa zawte toh houlim chiang in amaute gen thupi pen tuh "Ka Tuailai lái ua" chih hi tangpi hi.
Mi khenkhatte'n a TUAILAI hinkhua uh ana zang khial a' a hinkhua uh leng hing taak sa nawnlou leh hinkhua ning bang leng om uhi. Tuailai hun i zatdan pen in maban hinkhua saupi hon tun ding hi. Pathian limsak ding pen apoimoh masa pen hi. Bangziak a tuailai hun a' pilvang kul hiam chih leh bang hiam a thaklai hun leh kilamzohna hun ahih ziak ahi. Thil i bawl lai in bel mahni deihdan in kibawl thei a, bawlkhit chiang in bel bawl dandan toh lungkim a ngai hi. Huaimah bang in "Tuailai hun" pen lungtang a gilou hong lutpat hun ahi lai hi. Joseph tangthu apan inleng Tuailai hinkhua a Pathian limsak leh kikem siangthoute hamphat dan muhtheih hi.
Tuailai hun ah Pathian mah limsak ding ahi. A ziak ahihleh khovel nop lenna in sawt hon daihlou ding ahihman in tangtawn hinna lam mah pibawl pen a neih ding ahi. Hiai chih ziak a, Tuailai lai a bangmah hih theihlouh chihna hilou ahi, himahleh khovel a hinglai i hihman un khovel thilte apan kikep siangthou ding chih pen "Tuailai" michih teng mohpuak ahi. Nek-le-dawn, silh-le-ten leh taksa kikep siangthouna lamah Tuailaite mohpuakna lian mahmah hi.
Tuailai hunlai mah ah Pathian adia a manpha thei pen a kizat som ding ahi. Sihna kia a thil bei ding ahihlouh ziak in tangtawn hinna lam pibawl ngai hi. Pathian a piangthakna diktak neih kuul hi. Piangthak sa "Tuailai" ten bangtan hiam mihing hihna ah lampial leh hamhaih hun omzel mahleh Pathian khebul mah hong zuan kik teitei uhi. Piangthaklou Tuailaite'n bel khovel thilte kia a masapen in koih pahpah uhi. Huai in amau ah lungkimlouhna leh lungkhamna thupi tak guan hi. Amaute'n Pathian ah kingak sang in leitung thilte ah lungkimna zong zaw khanak ua, huai in siatna lianpi tun hi. Huai ziak in "Tuailai" hunsung in Pathian leh agam adia i hinna i latkhiat uh kisam hi. Pathian adinga kizang kha peuhmahte kisik kuamah omlou uhi. Akal lak in lungkiatna guam khukpi a tot hun un leng a neih Pathian in amaute a tawnpih zel a' khamuanna pia in tha guan zel hi. Missionary day chiang khong bang in leng missionary tampite Sharing na apan in leng theihtheih hi. Pathian limsak a' ama adia kipiak khiak ngamna zahzah in leng Pathian in hongzang ding hi. Huaiziak in TUAILAI hunsung ah TOUPA ompihtheih leh muangtheih mi hih chiat sawm ding ahi.
Tuailai hun pen pakbang ah hong vul pah ding a, sunni bang a mual hong liam ding ahihna ah hunhoih neihhun sung teng TOUPA adia kizang ding in TUAILAI-te'n thathak lak ding ahi. Khristian tuailai teng in hun MANPHA, lungsim leh zaitha hatlai hun, hunhoih, pilna leh siamma neihteng Khrist theihpihna nasepna dia kizat chiat sawm ding ahi. Tuailai Pathian limsak hihtheih chiat sawm ding in TUAILAI tengteng in mawhpuakna lianpi kinei hi. A nuam a haksat hun in leng Pathian limsak Tuailai hih sawm chiat ding ahi. Khrist leh a gam adia septheih zahzah leh hihtheih dandan ah pan lak sawm ding ahi.
