Khovel a mipil leh misiam tampi leh company tuamtuamte’n amau kichiamtehna’ng in symbol hoih leh kilawm taktak na phuakkhia uhi. Tua a symbol-te uh i muh chiang in thu bangmah kigelh kei mahleh, kuate aa, bang company chihte kithei geihgeih ahi. Kei mimal in hoih leh thupi a ka theih chu Cadillac Motor company-te logo, pi leh hoih ka sa mahmah mai hi. Tua bang logo or trade mark kilawmtak company-te’n a bawlkhiat lel un amau company hihna kitheikhe zou ahih mah bang in, ei gingtute aa diing in houh gimthuakna (suffering) houh i trademark tuamtuamte lak a khat a himai diam? Tua ahihman in ‘Gimthuakna’ chih thupi zang in kikum ni.
Khovel in sawina tuak, gawt a om, nek-le-dawn silh-le-teen haksa deuhte a ‘pusa in a paih’ chisukziau in, mohsa mahmahlai in, Toupa Jesu’n bel amah nungzuite kiang ah, ama sik-le-taang a haksatna, sawina etc. thuak tuh thil thupi leh zahtakhuai mahmah hi in na gen hi. Toupa’n tuh, gingtute kiang ah, khovel a gimthuakna omlou diing ahi chi in sinsak ngeilou himhim hi. Tua naksang in “….Amaute’n kei hon bawlsia uh hive’n, noute zong hon bawlse diing uhi…..”(Johan 15:20) na chiziau hi. Huai omdan tuh, khovel a Kei na Toupa uh a hon sawi un tuh, nou ka nungjuite hon naaksawi seem diing uh ahi, a chihna ahi. Ei ngaihdan hileh bel, Jesu bangkim hih thei in ama’ gingtute bangmah haksatnate tuaksak lou diing chih ahi. himahleh Jesu’n tuh, sawina hiam, gimthuakna hiam thuak diing in kiman un chi in nungzuite hilhlawk hi.
Huan Sawtak Paul’ thugen leh nasepdan toh kisai kichiamtehnate ah zong hichi in na kichiamteh hi. Nasepte 12:26 “…. Pathian’ kumpigam i luutkawm in, haksatna tampi i thuak diing mah ahi chi in nungzuite a thakhausak uh a…..,” chih leh 2 Timothy 3:12 ah “A taktak in Khrist Jesu a Pathianmiitna limsak a nuntaak utmi peuhmah in bawlsiatna a thuak diing hi.” Hiai Laisiangthou taangte apan i muh theih tuh sawina/bawlsiatna/haksatna i chihte gingtute leitung a i om sungteng a veng/omlou chih thil hithei lou hi in muh theih hi. Huai tuh gingtu hinkhua a telkha hi, chi le’ng kikhial lou diing hi. Huai i chih kawmkawm in gingtute tengteng in hunteng a thuak den diing chih bel hi samlou in, haksatna leh bawlgentheihnate a hong tun chiang a lamdang sa lua, thil hithei lou diingpi hong tung dan a koihlouh a, huai naksang a gingtu i hihna uh chiansak semsem, midangte’n mu thei semsem diing chihlam in la in, Jakob gen bang in kipahna in la in, Pathian phatzo ni chi i hi.
Haksatna leh sawina i chihte gingtu hinkhua a alou theilou hileh kilawm bang khop a Toupa’n a gen mah tuh i trade mark khat dan ahi i chi a, huai mai hilou in midangte’n Pathian a muhna diing, gingtute khalam a khan leh sianthou zawkseemna diing leh Pathian i ngaih ngoihngoihna dia Toupa’n a hon piansak hi diing in i gingta hi. I haksat, gentheih, nat-le-sat, taksap-thawmhau hunte tuh vangam ngaihna hong lian semsem diingte na hizaw uhi. Jesu min a sihna tuh kipumpiakna thupi penpente lak a khat ahihman in Tertullian bang in, “Martar-te sisan tuh saptuam chi (seed) ahi,” na chi hial hi. Haksatna, bawlsiatna chihte i ginna ziak a i tuah diing mah ahi, a tam zosem thuaktoulai diing hi hang. Tua ahihman in tua bang i tuahkhak hun chiang in Toupa min a thuakkhak hamphatna in la in Pathian’ min pahtawi ni. Unau, gingtute bawlsiatna kichi hong pungtoulai diing hi. Tua diing in thuum in, kisakhol ni. I trademark ahi.
