Romete12:12 “ Lametna lam ah kipak unla, gimthuakna lam ah kuhkal unla, thumna lam ah, thum teitei unla. “
Pathian limsak hinkhua, a tehna khat hi dia ka gintak mahmah tuh thumna hinkhua ahi. Mother Teresa in “ Thumna tuh ngetna hizawlou in, Pathian khut leh a deihdan a kituklutna ahi. Huai banah lungtang thuk takah Pathian aw ngaihkhiakna ahi “ na chi hi. C.S Lewis in “ Kei leh kei ka kipanpih theihlouh ziak, panpih bei ka hih ziakin ka thum hi. Hun tengin thumna poimoh ka hihmanin ka thum zel hi. Ka thumna in Pathian a khek ( change) kei a, kei hon khek hi” chi hi.
Pathian limsakte hihna khat tuh thum teitei na ahi. Himahleh Pathian limsaklou hinkhua, zang te’n le hih teitei tampi nei veve uhi. Pathian deihdan sangin, amau deihdan paipih ut teitei na nei uhi.
Laisiangthou in bangziaka thum teitei ding a hon sawl hiam? chih dotna poimoh tak ahi. Thum teitei dia noh, I poimoh ziak tuh -
- Hun piak teitei ngai hi: Hun tengin thum theih gige mahleh, thumna dia hun pia chih poimoh hi. Laisiangthou a thumna hinkhua, zang hi a I theihte’n thumna dia hun pia uhi. Daniel in nikhat in thumvei thumna hun zang hi. Hoih taka I simleh ann-nek dek, lup dek, thohkhiak dek, program pat dek leh tawp dek kuan a thumnate hih chilou hi. Tua I gen deudaute khenlam a Toupa toh thumna hun zatkhawmna ahi. Huanah Jesu mahmah in leng thumna hun a zat chiangin zingkal beltak a thum leh mundai va naih ahih dan kimu thei hi. Cross ah kilhlup a a om dek in Gethsemane huan ah nungzuite apan paikhia in va thum tuam hi.
Delhi khopi ah mi tampi takte’n, bang chi leh sum tawm bei ding chih sangin, bang chi leh hun kiningching nei ding chih a buaipih uh ahi. Sum save sangin, hun save ki-ut zaw mawk ta hi. Huanah sep ding leng kihau chiat ahihmanin, hun hawm siam haksa kisa deuhdeuh hi. Hichi bang dinmun a ki-om ahih ziakin thum dinga noh kipoimoh petmah hi.
Nnasepna dingin hun poimoh a, tua mah bangin thumna leng nnasep khat ahihmanin hun piak poimoh hi. Office timing om kei leh nnasep dan buai ding hi. Tua bangmah a thumna timing mumal a kibawl teitei louh manin, I thumna hinkhua buai thei zel hi.
- Pathian deihdan a thum teitei ngai hi: Jakob:4:3 “Na ngen ua, na nget diklouh ziak un na mu kei uh, na nopsak bawlna ding ua zat na tup ziak un.” Ei deihdan leh Pathian deihdan hong kituahkhak louh chiangin, thum haksa mahmah hi. Sum leh pai haksatna i tuah chiangin, hauhsak deuh bang kilunggulh hi. Nopsak ki-ut chiat a, leitung ah haksatna leh lungngaihnate i phutkhak chiangin, Toupa’n hon lakkhiak sak pahpah ki-ut hi. Ahih louh leh ahon simmoh leh bawl genthei khat om chiangin, I mitmuh mahmah ah Toupa’n thuaksak leh chih bang ki-ut hi.
Himahleh thumna tuh Toupa deihdan toh kituak a ngaih ziakin, ei deihdan koihkhiak a, Toupa deihdan a thum teitei kul hi. Jesu leng Gethsemane huan ah a thumlai in, a deihdan om mahleh Toupa deihdan mah ngaikhawk zaw hi. Huaiziakin, Toupa deihdan leh ei deihdan a kikalh hun chiang in, Toupa deihna bang I tungah hong tunna dia I thum teitei poimoh hi.
- Thumna daltu om ahihmanin thum teitei ngai hi: Thumna daltu lianpen pente tuh khelh leh midang toh kilem louh ziak khawng ahi. Hiai bang hun chiangin, thumna neih haksa mahmah hi. Huaiziaka I thum teitei theihna ding un, khelh tawpsan banah Jesu mahmah in leng maitam a thiI lat ma a, sanggam I tung a lunghihlouhna om leh kilempih masa dingin hon sinsak hi. I thum teitei theihna dinga I suksiang ngai om ahihmanin, tuate’n I hinkhua ah kikhekna tun hi.
Thukhitna: I thumna hinkhua a hoih louh chiangin, melma inle zoh haksa hon sa lou a, I khalam hinkhua ah leng keuna nasatak tung hi. Tua banah I hinkhua ah leng khaatna leh thangpaihna hong tam semsem in, I hinkhua nakpi taka suksiat in om hi.
