“Khrist’ itna in hon sawl teitei ahi; hichi’n ka ngaihtuah uh: Mi tengteng sih sik in mi khat a si a, huaiziak in mi tengteng a si uhi; a hingte leng amau adia a hin nawnlouh ua, a sih sik ua si a thounawn aa diing a a hinzawkna diing uh ahi, mi tengteng sih sik a a sih.” 2 Kor. 5:14,15.
I hindan/ nundan hoih ziak a hotdamna tang hikei mah lehang, Khristianna leh hindan kisaikha mahmah hi. A ziak ahihleh Jesu mahmah in leng a gah uah kithei chi tang giugeu hi (cf. Matt. 12:33).
Mihingte khelhna a suksiat in om mah lehang, Eden huan a khelhna in a sukkhak louh pumpi lunggulhna bei tuanlou hi. Hindan/nundan hoih mihingte’n kilunggulh chiat ahihman in panlakdan tuamtuam kinei chiat hi. Himahleh mihing panlakna in Pathian lungkimsak zou tuanlou hi. Hinkhua bawlhoih lunggulhna ziak in Rehabilitation Center, Counseling Center, Jail tanpha om hi. Hiaite a phattuamna chiang tan om mahleh hinkhua kikhekna taktak tun zoulou hi. A ziak bel mihing hinkhua pumkhek zou diing in Rehabilitation Center, Counseling Center leh Jail tanpha in thahatna nei zoulou hi. Himahleh Paul in hiai toh kisai dawnna hon pia hi a theih in om hi.
KHRIST’ ITNA IN HON SAWL TEITEI ( v. 14a): Hiai ah thumal poimoh mahmah “sawl teitei” hon zang hi. Sappau ah “Compels” kizang a, Greek thumal in “Sunechei” zang a, a gen nuamtak tuh Mekton chih ahi. Paul in hiai ah, a sawltu’ hatna genchetna diing in “teitei” chih hon zang hi. B.I translation in “Phutluih” zang a, a hatlouzaw in a hatzaw phutluih chih om theilou hi. I utlouhpen, i siamlouhpen, deihlouhpen, i ngaplouhpen natan sepsuah diing a sawl ahi chih tuh chiang mahmah hi. Huan ah “teitei” kizatna peuhmah ah, a nuamlam sang in, a haksalam kawkzaw hi.
Himahleh Khrist’ itna pansan a sawl teitei i hi a, a sawltu hat ziak in nuamlou leh haksa mahleh sepsuah zoh in om thei hi. Khrist’ itna kilatna tuh mikhialte aa diing a, a sihna ahi. A itna thupi lua ahihman in laphuaktu in, “Ngoutuisuahgiat laitui tang hen, tung a vanpi laipek tang hen, sing-le-lou teng laikung tang hen, leimi zata’n gelh chiat hen aw; Pathian’ itna gelhseng lou diing, tua ngoutuipi kang zong, Pathian’ itna gelhseng lou diing, tua tungvanpi bei zong,” na chi hi.
Paul in tua bang itna tang a hihdan kitheichian lua in a khialpen kei tung ah Khrist in a zahngaihna langsak chi hial hi. Hiai bang itna thupi tangkha ahihman in, Khrist’ deihdan semsuah dia, a sawltu hat lua ahihman a nial vuallouh chih a gen nop ahi. Huaiziak a mi kikhek thei nawnlou dia i gingtakte na-ngawn, Khrist’ itna in a matkhak chiang in lamdangtak in hinkhua kikhek hon nei thei uhi.
KHRIST’ ITNA IN HINKHUA KIKHEKNA TUN HI (v. 15b): Paul in Jesu Khrist’ itna a gen lailai a, a ngaihtuah tuh Khrist mi tengteng’ sih sik a hong sihna tungtawn a mi tengteng’ sihna ahi. Himahleh Khrist sihna in khalam hinna hon pia hi. Huchi in Khrist’ sihna in a tup hon gen ngal a “A hingte leng amau adia a hin nawnlouh ua, a sih sik ua si a, thounawn aa diing a a hinzawkna diing uh ahi” (v.15b), chi hi. Huaiziak a, Khrist hondampa a sangte aa diing a golden rule zuih diing tuh eimah adia hing hi nawnlou a, Khrist adia i hin diing hita hi. I Kor. 6:20 “Noute man a leisa na hihman un, na pumpi uh leh na kha, Pathian’ aa mah in, Pathian pahtawi un.”
THUKHITNA: Khrist’ itna in Amah adia hing diing in hon sawl teitei hi. Jesu’ itna kilatna tuh i sik a hong sihna ahi. Leitung ah Jesu’n hinna khat a neihsun nang leh kei damna diing in pia hi. Jesu kum 33 vel ahih in tatna man pia in Kros ah si hi. Mihing damsung kum tangpi diing a, Laisiangthou’ hon sehsak tuh kum 70/80 hi a, huai tan leitung ah hinkhua zanglou hi. Himahleh a hong sihna pen leitung mahmah ah Amah deihdan a, i khosak theihna diing ahi. Tua ahihman in, leitung ah Jesu hinkhua sunzom tu i hihlam kiphawk in, Ama’ aa diing a hing diing in Saptuam mite ka hon chial ahi.
