“Tua bang ahih manin, mi kuapeuh Khrist-a a om chiangin, thilsiam thak ahita. Thil luite a beita a, ngai un, a thak a hong suakta uhi.” 2 Korinthte 5:17
Ni khat tuh St. Augustine, ni dang bang in kholak hong vak a lampi ah a lawmlui nu in ana mukha in, ni dang bang a kithuah ding in ana zawn hi. Himahleh Augustine in ngaihsaklou a a paisuak san leh tua numei in Augustine, Augustine hon theilou maw? Hongpai ou chin sam teitei hi. Himahleh Augustine in “Kei na theih ngei Augustine kahi nawn kei” chi in Lai Siangthou pansan a mi kikhek ahih dan hihilh hi kichi hi. Thil lamdang mahmah leh lunglut huai mahmah khat tuh I Lai Siangthou tangtel a I muh bang mi kuapeuh Jesu tawh a hong ki sukkhak chiang un mi kipumkhek hong hi uh hi chih ahi.
Lai Siangthou a I muh bang in a diak in Jesu tawh mimal a kisukha/kituakha a amah gingtate a hinkhua uh hong kikheng vilvel mawk hi. Phak hong siang, a kum a sim damlou hongdam, ngekguk a kibual in tawpsan, kizuak in tawpsan, dawimat a hai hanmun khong a teeng gige lungsim hong vakin hong kikheng chihte gending tampi om hi. Tuateng ban ah, a lunglut huai mah mah hinkhua kikheng tuh Sawltak Paul hinkhua ahi. Tomchik a gen in, mi Jesu tawh a hong kituah (encounter) tak tak chiang un, a omdan ngeina/lui uh ut nawnlou in hinkhua thak hong zang uh hi chih a hi. Aziakbel Toupa Jesu hontatna leh ei a dia a thuaknate in a honpiak tangtawn hinna thupi law petmah, leh manphat law petmah ahih min a hong muh chian sitset chiang un, khovel a thil awmte leh hong awmzel dingte teng teng sang in a manpha zaw chih hong theichiang in, bang mah khiaklah ding awm salou in, a hinkhaw lui uh nuse vilvel in, mi kikhek hong suak in hinkhaw thak hong zang uh hi.
Pianthakna kichi tuh kama kipuanna kia hilou in, tua kama kipuanna pen omdan leh gamtat Pathian deihdan a kikhen na ahi. Kama kipuanna tanlel hinkhua pen pianthakna a sakha mi tam mahmah hi. Tua kama kipuanna tanlel a pianthak in vangam hong tunpih zoulou ding hi. Tua kama ‘Jesu Toupa ahi’ chih puana pen mimal hinkhua a ahong latkhiat ngeingei ding ahi. huai mimal hinkhua a a hong latkhiat chiang in midangte i hinkhua gahte apan in, hiaimi a kikheng takpi mah hi chih hong mu ding uh chih ahi.
Tua ahihmanin I tangtel sut thak in vel thak ni. I hinkho lui it law petmah lai, nuse ngam mahmah lou, tua a hindet poile salou i hih khak leh kivel phat mahmah kulding hi. Mi’ hinkhua kikheng teng teng piangthak hikei mahleh mi piangthak tatak tuh a hinkhua ah kikhenna hong kilang tei tei hi. Unau na pianthak nung sang, nang hinkhua ah kikhen lamdang na bangzah min a muthei ding ua??
