“Tuichim a tun diing ziak in Noah long ah a luut a, a tapate leh a zi leh a tapate’ zite leng a kiang ah a luut uhi.” (Gen. 7:7).
Thupatna: Nasepna tengteng lak ah innkuan kepna (Ministry) tuh haksapen diing in ka gingta hi. A ziak ahihleh Laisiangthou ah Pa tampite’n Toupa zahtakna nei mah le uh, a tate/innnkuan a lohsam gen diing om hi. Ban ah tulai a Pathian nasem lohching mahmah tampite’ lohsapna innkuan na hi zel hi. Eimah innkuan chiat kigensiak le’ng, kou innkuan lohching ka hi uh chi ngam tam om diing in ka gingta kei hi. Huan ah Tate kepna toh kisai bang ah leng, tate chiatchiat leng na kibang hetlou ua, a phengphi deuh bang na omnuam se hi. Huaiziak in, innkuan kepna tuh ngamthoh chi leng a hikei a, lauhthoh mawk diing leng ahi tuan saamkei hi. Mithupi leh makai lohchingte’ vuallelhna/lohsapna tuh innsung ahihman in Pathian tellou a kepzoh diing hilou hi.
Text: Dotna poimoh mahmah, khovel a mite gilou mahmah ua, Pathian thangpaihna tawpkhawk a tuahlai un, bangziak a Noah kia bitlou a, a innkuante toh bitkhawm uhiam? Tate zaw a hoih diingte hoih mai uh ahi, nu leh pate na thulim kei le uh leng chi tampi ki-om hi. Ta bangzahhiamte lak a, a hoih bang leng na omkha thei mah uhi. Dotna poimoh nawn mahmah tuh, Pathian limsak lou nu leh pate’n a innkuanpihte bittak a van-gam tunpih zou mah diing uhiam? Innkuante Pathian kiang bittak a, a tun theihna diing un, nu leh pa’n Pathian a limsak uh poimoh petmah hi.
Dotna poimohtak omnawn leuleu tuh, Noah in a tate thuhilh siam lua bik ahi diam? Siampu Eli in a tate thuhilhna kimu a, Noah in a Tate thuhilhna kimu lou hi. Himahleh Noah’ hihna diktak i muchian hi. “Noah midik ahi a, a dam tonpihte lak ah gensiatbei ahi. Noah Pathian toh tonkhawm hi.” (Gen. 6:9). Pathian in long bawl diing in sawl a, kum 120 vel luut hi. Hiai hun in amah innkuan lou, long bawl omlou uhi. Bangziak hi diing hiam i chihleh Noah kiang a Pathian thutung a muhpih louh ua, a zakpih louh ziak uh hi diing ahi. Himahleh a innkuante’n muhpih ahi diing ua, bitna long ah luutkhawm thei vek uhi.
Pate’n Pathian houpihna i zak, tate kiang ah genkhiak diing i nei diam aw? Pathian’ houpihna za thei nawnlou nu/pa hiam i hihkhak diing lauhhuai mahmah hi. Siampu Eli hun in leng Toupa’ aw vaang mahmah kichi hi. Ei innkuan sung ah leng, Toupa’ aw vaang lua ahihkhak diing, ngaihtuah thamching hi. Noah in leng Toupa’ thutung hilou in amah lemtheihna toh long bawl diing in a sungkuante kun mawkleh thuzoh khol hetlou diing hi. Himahleh Pathian apan ahi chih a muhpih chiang un, zui mai uhi.
Pathian limsak innkuan i hih theihna diing in innsung mite khalam mit a hah chiat kuul hi. Pate’ muh tate’n a muhpih ngai mahmah hi. Tulai in a dahhuai mahmah nawn tuh, ta tampitakte’n a pate’ un a muh, muhpih nawnlou in, innkuan kisia tampi om hi. Tulai innkuan tampite, pate’n Jesu ginna tawn a a muh, tate’n muhpih lou ua, tua bangmah in tate’n ginna a muh uh pate’n muhpih lou zel uhi. Hiai hih a khawk/poi mahmah hi. Muh kibang lou tuh ngaihdan kibang lou, utdan kibang lou, paidan leng kibatlouhna in zui ngal hi. Noah-te innkuan in, a pa uh tungtawn in Pathian thu mukhawm ahihman un, bit vek uhi. Tuni in, eite leng i bit chiat theihna diing un, innkuan in Jesu Khrist ginna in, mukhawm chiat leng uthuai mahmah hi.
Thukhitna: Innkuan bukim ahih leuleuleh khovel ah i omsung ua thil hithei lou phial diing in ka gingta hi. A ziak bel Noah-te innkuan leng, bit chiat mah le uh, bukim hi tuanlou uhi. Tate lak ah hamsiat kilohna tan bang, tung hial uhi (Gen. 9:18-29). Khovel a innkuan bukim ka hi uh chih bel om taktak diing in gintakhuai lou hi. Himahleh innkuan bit chih om thei ahihman in, khalam gam ah innkuan i bit chiat theihna diing un panla chiat ni, unau.
