“Ama’n a nu thuhilh in, hiai kuang ah Baptispa Johan lutang hon pia in, achi hi.” Matt. 14:8
Thupatna: Tu July kha “Pathian Limsak naupang” thupi in I nei uhi. Naupangte’n Pathian a Limsakna ding un, Nu leh Pate’n mohpuakna liantak I nei uhi. Nu leh Pate’n Pathian it dinga, tate a sinsak zoh ua leh, Pathian Limsakna toh naupangte khang khawm ding uhi. Nu leh Pa lohching tehna hoihpen tuh a tate’n Toupa a it hiam chih ahi. Tuni in a dahhuai mahmah Nu leh Pa khenkhatte’n I tate ki-suse (abuse) mawk hi. Himahleh a dahhuai zaw lai tuh I tate susia ihihlam kitheilou Nu leh Pa tampi ki om hi. Taksa thil ah zaw I suse kholkei maithei, himahleh a ngaihtuahna uh leh a hinkhua uh Nu leh Pa suksiat tam mahmah kha ding hi.
Tutung I buaina uah, Meitei nupite’n (Mera Paibi) I singtang numeite uh a tate/tuailaite kiangah Sual (rape) dingin pekhia uhi. A na mahmah a, a thuak leng haksa mahmah mai hi. A tate/a tuailaite u’n, tua bang a singtang numeite bawlsiat sawm mahle uh, a khou ding leh a phallou dingte tuh ahi uhi. Himahleh singtangmite huatna, muhsitna nei lianlua uh ahihman un, a tate uh tungtawn a bawlsiat ek leng khawk salou uhi. Singtang mite bawlsia a kichih lai un, a taktak in a tate/tangvalte uh hinkhua bawlsia hi zaw ua, amau leh amau minsiat kiguan daih uhi. Thilhoih hih dinga, tate a zatding uh hinapi thilzumhuai tawp khawk, minsiathuai tawp kawk sem dinga, a tate uh a zatmai uh tuh hehpihhuai petmah ahi uhi.
Text: I Tangtel I etleh a thu omdan hiai bang ahi. Herod in a sanggampa Philip’ zi Herodia, zi in nei hi. Baptistpa Johan in Herod kiangah amah (Herodia) zi a na neih a siangkei achih ziakin suangkulh ah khum hi. Herod in Johan hihlup ut mahleh, mipi kihta a, zawlnei a a bawl ziak un semsuah ngamlou hi.
Herod pian ni ahong tun in Herodia tanu a lai ah laam a, Herod kipaksak hi. Huai phet in Herod in a nget peuhmah pe dingin thu chiam hi. Naupang numei in a nget ding, a Nu (Herodia) va dong masa hi. Naupang numei in a poimoh hetlou leh phatuam hetlou ding hinapi, a nu’n Baptistpa Johan lutang ngen dingin na hilh maimah hi. Naupang numei ading a poimoh, manpha nget ding tam ngial ding hiven maw. A tanu maban ding suksiat sak dimdem mawk hi. Herodia leng Herod mah banga, Baptispa Johan in a nupa kal uh hangsan taka, a taihilh man a, heh mahmah hi ngei ding hi. Himahleh a lungtang a hehna leh huatna om pen sepsuahna dingin a tanu lungsim siangthou takmai a zat mawk pen in a tanu hing vui hi. A thuchiam ziakin Herod in a sepsuah ngam louh a sem suah a, Herodia in a tanu maban ding se sak a, a tanu uh khelhna vanzat a kizang kha ahihmanin a vek un a hehpihhuai mahmah uhi.
Thukhitna: I tate tungtawn a I sepkhiak theih nna hoih tampi om hi. A tate Pathian Limsak a khang ding a chil zou Nu leh Pa-te’n, a tate tungtawn a nna hoih semkhia tam ding uhi. Herodia in leng Herod kiangah a tanu thilhoih ngen dingin hasuan thei tham hi. Himahleh naupang gen leh nget dia kilawmlou leh nna mulkimhuai tak semkhe dingin a tanu zang maimah hi. I tate nungchang (character) I suksiat sak chiangin I maban kisia a, maban a I tuah ding lungzinna ahi.
Tuni in nu leh pa tampite’n I tate uh a hoihlou hih dingin kizang kha sek hi. I tate’n bang chi bang nnasem uh hiam, chih donlou in, sum a lohkhiakte uh kia en a kipak mawk bang tampi I om kha thei uhi. Sum kia kipahpihna ziakin, I tate hinkhua bangzah Nu leh Pate’n I suse kha ta ding ua aw? Ahihlouh leh Innkuan sunga I thangpaihna leh thilhoihlou I gelte, genkhetu leh semkhetu dingin, tate bang zatkhak baihlam mahmah hi. Bible thu toh kituak hilou in, ei ngaihtuah toh tate I khanlet sak uh tampi om hi. A gah I loh chiangin haksa kisa mahmah chiat zel ding hi. Nu leh pa tampite’n I tate I suksiatna (abuse) lian pen uh tuh hiai ahi. Eph. 6:4 “Huan nou pate aw, na tate uh hih thangpai kei unla, Toupa thuzohna leh hilhna ah kem zaw un.” Naupang suksiatna (Child abuse) tuh thu-lian ching leh gawtna sangtak maituah theihna ahi. Tua bang mah in Toupa mai ah leng thu ngaihkhawkhuai mahmah ahi. I tate Toupa thuzohna tellou a kem a, thangpai a I omsak chiangin, ki-susia (abuse) hi. Toupa’n simtute tengteng hon vualzawl chiat hen aw!
