Tutung Meitei gaal a Pathian’ kepna leh venbitna i ngahdan i nam khangthu a gen mangmoh diing ahita. Hiai banga Pathian’ ompihna leh makaihna, gaal neihsung kia adia lunggulh leh limit hilou hilehang, ‘bangzahta in i hihfuh de o’ chih ngaihtuahtham ahi.
William Temple (1881 – 1944), ei bang a Khristian a na hi in, Japan gaal malam pek in, ‘Khristian saptuam member-te’n khotang vaai a gen-le-sak i neih diing ahi. Khotang vaai a Khristiante’n aw suah diing ahi. Khristian principles i puankhiak diing. Khotang vaai, Khristian principles toh kikalhte i genkhiak diing. Khristian principles toh kituak dia khotang vaai a a dikloute bawlthak dia i makaih a, i thuhilh diing ahi’ khawng a na chi tinten a; Khristian, Toupa Jesu’ nungzuite’n i society sung a buaina leh khotang issue neneuhte a impact i neih poimoh a sakkhiakdan. A ngaihdan i pompih theihchi ahi diam ah!
Khristiante khotang a member i hi. Ei society diakdiak ah i khotang bawltu khristian ngen i hi phial. Khotang vaai hi in, Youth Club hi in, bang vaai hita henla, i meeting agenda khatpeuh hi in, meeting-na a bangteng genkhawm diing hile hangle, thuumna a hun pante i hi. I pawlpi tamzawte Khristian hindan tawisan leh Pathian thu lampang kawkkha, tup-le-ngiim a nei deuh ngen a hi zomah. Hiai pawl tuamtuamte a president bang, assistant secretary bang, member bang, adviser khawng in i pang hi. Hichikhop a kihel hinapi, banghiam issue hong om chia’n, sahkhua toh khotang vaai i khenbawl thouthou ua: “Daih ngai,” “Daih hun theih ngai,” “Upa-te hong kikum dah phot ua” chih khawng. Hichi bilbial/gegeih diingdan mah hia chih ngaihtuah himhim tuak ahi.
Ahihleh, Khristiante munteng a va kidaihlah diing maw? Khristianna munteng a zat theih diing mah ahi diam? Khristian society a khristian ngen member i hihna mun a, Khristianna zat theih gige lou mah ahi diam? Unemployment problem (tehkhinna di’n) khawng a Khristianna bang va chi zat/henlut diing? Khristiante’n bang va gen tuan diing chih khawng dotna om thei ahi pah ngal hi.
Corruption leh bad governance gah tampite lak a khat tuh unemployment ahi. Diseased society, kineksiatna gah (lungvei/muat) ahi. I zonzon means dang – genthoh, sakthoh, campaign-na la dia i zat zouzaite, Khristian principle sang a remedy hoihzaw hileh zaw, corruption leh unemployment i gam a a beina sawt ta diing hi a, maw. A langkhatlam ah: Utopia, khotang hoih bukim leh dembei kichi hiai nuai simlei a om ngei tuanlou diing ahih toh, khristiante va kidaihlah lehangle, corruption leh unemployment khawng mawkbei tuanke’nteh chi leng tampi i om.
Thil himhim, dik leh pom theih dan a i koihdan khah eimah mimal hon sukkhakdan ahi deuh tangpi a. Ei hon sukkhakdan pansan in – hoih leh hoihlou, dik leh diklou in i khentat hi. Hiai dan a thupukna i laak ziak khah, eimah mimal, ei khovel a eimah a CENTRE (a laizang), a poimohpen a i kikoih ziak ahi. Hiai ziak a, hoih leh hoihlou, dik leh diklou kikal a tehna dia eimah lemtheihna zang i hi.
“Laisiamte pilzaw ua, a khovel etdan uh leng zazaw ahi. i khantouh chia i thil etdan hong chituam diing ahi,” i chi sek. Himahleh, laisiamzaw, khangtouzaw, khopi a om i hong hih chiang a leng, i khovel etna mun ngeimah a kahlei/leilawn a kaltou bang lel i hi. Dinna mun ngeimah a, i dinna kahlei in i daakna sangsak lel inchin; i khodakna khovel kimvel laizang a eimah kikoihlai thouthou hi ve hang aw. Eimah a laizang a i kikoih sungteng, Pathian mun diing e’n va luah, Pathian mun awnlou a na kihidaih ahi.
Pathian a laizang a koihlou a, eimah a laizang a i kikoih ziak ua, political issue leh khotang issue-te’n, Khristian-te hon sukkhak diingdan a hon sukha theilou inchin, i mizia bang a hon sukha nakkhem hiveh aw. Mihingte lah hoihna neilou; i hoihna omsun leng angsungtheihna toh kisohbawl hilai. Hiai ziak a thuneihna i khut a hong om chiang a, khemna chi tuamtuam - sum-le-pai, gou-le-gamte’n hon subuah inchin, issue tuamtuamte sai hun chiang a Khristianna hong dongkholh ahi. A laizang a i omsak, a laizang a i koih pen a dik ngai ahi.
Khovel siamtu Pathian. Pathian omkeileh, khovel om mawngmawng lou diing. Khovel tuh Pathian’ itna khutsuak ahi. Pathian in electron khawng, singkung khawngte’n a zuihdet diing un daan a na bawlsak a. Mihingte bel A daan bawl zui leh zuilou thei diing, deihtelna nei thei in hon bawl hi. Amah i itdan dungzui a, A deihdan zui/posiah thei diing in zalenna hon pia hi.
Bangchi zongteng a khial leh angsungthei hitawk lehangle, Pathian melpu, Amah batpih a hon bawl i hihziak in, i lungtang tawng ah Amah batna neih khat i nei chiat a. Hiai in Amah lunggulhna, Amah i naih hun a Amah toh kizop pah theihna hon neisak hi. Ama’ melpu i hihlam liahtu, maiphaw hoihlou hawkkhia a, Ama’ hoihna taangsaktu a pan theihna i nei chiat hi. Khotang vaai a kihel a, aw suah a, Ama’ hoihna a khovel hoihlou taanvak diingte i hi.
Gal-le-sa a buaina khawktak i tuah hun a Pathian kiang a thuum a, Amah i sap ngalleh; hiai buaina hong then chia’n leng, khotang vaai ah Amah sam in, i hinkhua uah, Amah a laizang tangsak kawm in khotang vaai ah kigolh di’n kisa lehang maw, khatvei mawngmawng! Hiai kikal i theihchet louh ziak ua, tumalam a i gam a diktatna toh kisai a movement hong omlai a, gingtu tampi a na sa-ikh maimah hi diingdan hi ve hang aw.
Ahi, i Pathian bangkim thei, bangkim hih thei ahi. A deihdan – diktatna, sianthounate zat theihlouhna mun, A siamsa khovel nana na a, om theilou; ei khotang vaai leh political issue-te a leng zat theih lo mahmah diing ahi. Huai diing in, khalam a pichinna hong poimoh diing a. Pathian deihdan michih i kisin a, A deihdan theih i sawm a, i zon chiat hunta ahi. Saptuam member Kha a thop, heutu Kha a thop. Vote zong a diang khualkhual chihte hilou a, i gupte vaisaidan Pathian’ deihdan toh kikalhte enliam mailou a, va bawldik dia kisa giugeu hi di’n aw le. Huchi hileh, heutu dia chin i sakte, chin i sakna ziak, i etdan,i etna munte bang leng hong dik vek diing ahi.
