Saptuam tuamtuam a member tengteng Khristian i kichi vek. Khristian i chih Laisiangthou (Bible) a Toupa Jesu’ nungzuite, a sahkho masa uh taisan, inn-le-lou taisan, nu-le-pa nasan taisan a, Jesu chi tintente genna; Khris aa dia hingte genna ahi. Nungzuite tuh Toupa Jesu toh zinkhawm, khosakhawm; Jesu kiang a sin diing leh A thumang diing a A nungzui ahi uh.
Khristian hinkhua toh Jesu’ nungzui hinkhua kibang lou; nungzui hinkhua pen Khalam a sangzaw dan a koih a, Khristian-te zalenzaw dan a koih i hi uh chih i omdan, i khovel etdan, i thil maituahdan ah a chiang hi. Hiai gel kibang lou dan a i koih ziak ua, nungzui leh zuilou; Khristian leh tianloute’n kilamdanna neilou; buaina i maituahdan leng kibang nialnual maimah hi diingdan i hi.
Saptuam member hinapi a, nungzui diing a kipat sawmlou Khristian deuh ngen i bang. Saptuam member hihtheihna dia Khristian ka hi kichih huntawk dan a koih hang a, Toupa Jesu’ nungzui hih kul sese lou, nungzui hih lunggulh leng poimoh sa sese lou; nungzui hi diing a Khalam a khantouh sawm leng ngai sa tuanlou. Toupa Jesu’ nungzui hi hetlou Khristian kihi mawk. Hiai lamhaihna khawktak: Khristian hih ngalleh chi a, Saptuam member dia ki-baptis luut mai tuh tulai khovel pumpi a saptuam tengteng chiindan hi sim maimah ahi.
Sunday school kailai a Jesu’ nungzui diing in ka kipanta chi a i sakh sek pen, Khristian hi diing in, kei ka kipanta i chihna a bangsim. ‘Jesu nungzui diing in’ chih toh ‘Khristian hi diing in’ chih a kibang hi nazenpi in. Khristian in a kawk e’n a na heilamdang theih hi mawklou ahi. Khristian i chih Toupa Jesu’ nungzui chihna ahi chih phawkthak ni. Toupa Jesu nungzui Khristian hi diing in kipan thak ni. A man i piak ngai, i taan ngai om tham mah inteh. Hilehleng, Toupa Jesu thei nazenpi, Hondampa dia saang nazenpi a, A nung zuih i utkeileh, a man i piak ngai, i taan diing tam ziotham; tampi taan khinta i hi.
Huan Setan in Israel-te a sual a, David bel Israel-te sim utna a neisak hi…Pathian a kipak kei a; huchi in Israel-te a gawtta hi (I Kronikil 21:1 & 7). Pathian’ lungtang bang pu kumpi David nasan Pathian’ thangpaihna semsuah diing a Setan in a khemzohleh, nungzui hilou Khristian-te leng Setan in hon na nehsoh na’nchia. I ngaihdan i gengente, i houlimnate, i kimohsaknate, heutu i demdemdante, heutu hih i ut luatdante. Hiaite tengteng Setan in i nam pumpi hon na talkaih a, heutu dinmun leente Pathian zakdah diing zawng a hon na makaihsak nilouh hithei a na hi ahi, na chikei maw? Heutu hangsan, heutu khauhpai, heutu sumhau, heutu thugensiam, heutu pil, idea hau, mikousiam, houlimsiam chihte sang in, Pathian toh tonkhawm, Khasiangthou’ thop, Jesu’ nungzui heutu leh mipi i hih naak poimohzawk hi na maizen e maw.
Tutung i buaina uh toh kisai kia ah leng: Toupa Jesu’ nungzui, Khristian gina i na hihlouh uh a poikhiakdan tampi mu diing na hi. A na ngaihtuah lechin.
