Saptuam Masate Apan Sinlai

“Huan sawltakte thusinsakte sin in, kithuah in, tanghou balkham in, thuum in, phatuamngaitak in a omkhawm uhi.” Nas 2:42

GBC Day chibai! Saptuam it a, Pathian thu a khang diing leh saptuamte ginna a dingkip diing lunggulhna liantak nei a, muhkholhna toh GBC na pankhia i heutu thupina gam hon zotsante leh hon dampihlaite Pathian’ min in zahna ka pia hi.

Tulai khovel ah Laisiangthou (Bible) thuneihna ngaihdauna leh zampaina lian deuhdeuh a, Laisiangthou polam apan thute tawisangna leh khalam thute zonna lian semsem hi. Saptuamte’ paidan tuh khovel a organization tuamtuamte’ paidan toh kichimat semsem in om a, tuam-om diing a sapte himahleh, i tuamna uh leng langzou mahmah lou hi. Biakinn mah ah leng Laisiangthou thutak sang mah in testimony, motivational speech chihte khawng kilunglutzota a bang hi. Laisiangthou thute apan kipahna leh nopsakna muh sang in, ei-le-ei kisuklimna i nak bawl semsem uhi.

Saptuam masate apan sin diing poimohte tamlou enkhawm le’ng uthuai hi.

1. Sawltakte thusinsakte sin in: Pathian thu sin tuh saptuam masate’ poimohngaih masak ahi. Sawltakte tungtawn a Pathian thutungte theihsiam diing lunggulh uh chihna ahi. Tulai saptuamte tuh Laisiangthou tawi peih nawnlou saptuamte i hita uhi. Pathian thu buaipih sang in mi tam hong kikhop diing uh buaipihzawkna lian deuhdeuh hi. Pathian thu sin poimohngaih sang in, Biakinn hoih, vanzat hoihte ngaihpoimohna thupi hi. Himahleh saptuam masa’ ngaihpoimoh pen zaw Pathian thu sin ahi. Pathian thu sang a ngaihpoimohzawk diing omlou hi. Saptuamte Laisiangthou’ gen bang a i kalsuan ngamlouhna uh tampi omta hi. Hiai hih tukhang Khristiante aa diing in poi mahmah hi.
2. Kithuah in: Saptuam in a poimoh mahmah nawn tuh kithuahkhawmna (fellowship) ahi. Hiai ah kithuahkhawmna in Biakinn a saptuam Toupa be dia paikhawm chih tan gen hilou hi. Khrist a unaupihte khotuah, a poimoh bang a kipanpihtuah gen ahi. Saptuam masate tuh “caring church” chih theih hi. Amau kingaihpoimoh sang a, midangte ngaihpoimohzawk a nei uh chihna ahi. Saptuamte i kipanpih in, i kikhotuah uhia? Saptuam member-te kihazatuah, hoih kideihsak lou i hihkhak diing lauhhuai hi.
3. Tanghou balkham in: Toupa nitak ankuang ban ah nekkhawmna tungtawn a kithuahkhawmna leng genkha ahi. Hiai in saptuamte pankhawmna/kithutuahna (unity) gen hi. Tulai saptuamte buaipih mahmah tuh saptuam sung a kithutuahlouhnate khawng ahi.
4. Thuum in phatuamngaitak in a omkhawm uhi: Mimal thuumna a poimoh kawmkawm in, saptuam thuumkhawm a omkeileh saptuam a hat diing bang a hatlou diing hi. Saptuam masate tuh amau leh amau a kinga saptuam hilou in, Toupa a kinga saptuam ahih man un khang uhi. Saptuam ei theihna leh hoihsak bang a pikhak theih mawk hi. Himahleh saptuam neitu Pathian a kinga saptuam i hih uh thil poimohtak ahi.

Thukhitna: Saptuam masate toh i dinmun bukkak in kivel chiat le’ng uthuai i sa hi. Saptuam khalam a khang leh chidam ahihna diing a poimoh tuh Toupa thutak sin/suut, kipanpihtuah, pangkhawm dialdial, phatuamngaitak a thuumkhawm ahi. Tua bang saptuam hi diing in Toupa’n EBCC Delhi hon vualzawl hen aw.