Khovel a deihhuai hetlou khat tuh ‘PA’ tellou a khosak hi di’n gintakhuai hi. ‘Pa’ tuh innkuante bangkim a makaih diing leh enkaitu dia mohpotu ahi. ‘Pa’ tellou a innkuan kimakaih tuh khotang siatna kipatna bulpi: gilou chiteng sepna, kum chinglou a naupai, numei-pasalna a kibawlsiatna, numei tung a thagum suahna i chihte makaihtu ahi. Pa’ omdan leh gamtatdan in a tate nakpitak a influence ahihman in, ‘pa’ khat hinkhua zatdan et lel in zong a innkuan uh om diingdan theihtheih mawk hi. Tua ahihman in ‘pa’ hihna pen poimoh lo petmah hi.
Laisiangthou in innkuan mite toh kisai a genkhaknate apan ‘pa’ hihna muh theih chiang mahmah tuh “LU” (headship) ahi. Hiai lu hihna mah tuh ‘pa’ hamphatna hazat vuallouh ahi. Naupangte nu-le-pate zahtak diing in thupiak om a, zi a pasal thunuai a luut dia sinsak in om a, himahleh ‘pa’ tuh zi it diing leh tate suthangpai lou dia thupiak in a om hi (Eph.5:22-24, 6:1-4). Hiai omdantak tuh, innsung kivaipuakna adia dinmun sangpen mohpuakna tuh pa’ liangkoutung ah kinga hi. Hiai ‘Lu’ hihna toh kisai thu nih muh theih chiang mahmah om a, tuate: khatna ah thuneihna, nihna ah mohpuakna ahi. Hiai thuneihna leh mohpuaknate, hamphatna toh tonkhawm gige ahi uhi.
Pathian in innkuan sung a thuneihna sangtak a piak ‘pa’ in, a innsung vaai a hawm diing, vaihawmtu ahih ngeingei diing ahi. Pa tuh a zi aa diing in pasal, tate aa diing in ‘pa’ ahihman in mihing ama’ tung a thuneihna nei dia hamphatna piak omlou hi. A pilvanhuai khat tuh thuneihna sangtak, innsung a ‘pa’ piak himahleh, Laisiangthou khalh leh khelhna hih dia midang sawl theihna thuneihna piak hilou hi. Pa innsung a ‘LUPEN’ ahihman in, ama’ theihlouh a thupukna laak kichite diklou hi. Innkuan vaai leh thildang khatpeuh ah, innsung mite’n ngaihdan kup theih tham, zong kikup diing, himahleh thupukna pa’ khut ah koih diing ahi. Papen thuneihna nelhsiah a, kuahiam innsung mite khat in thuneihna a hong kilaak mawk chiang in paikhial hong hi in Pathian’ deihdan kalh in khelhna hong suak thei ahihman in pilvanhuai mahmah hi. ‘Pa’ hihna pasal tengteng in tang kimlou; pilman, siamman, melhoihman, kizenman a ‘pa’ hihtheih hilou in, nupa hihna, tate neihna leh innkuan a omna ziak a ‘pa’ dinmun hong piang hi a, kuamah in mahni’ pate hiam, mahni’ pasalte, a phu uh zahna piak a, a thunuai ua luut diing, mangngilh louh diing, huai tuh Pathian’ deihdan hi ahi.
Pathian in thuneihna sangtak ‘pa’ a piak kia hun salou in mohpuakna poimohtak zong kengsak hi. Pa’n thuneitak a, kei ‘pa’ ka hi, ka ut dandan in ka om diing, chi thei mawklou in, alou theilou a mohpuakna a sep diing om hi. Huai tuh, a innkuante a etkol diing ahi. Hiai etkolna nna tuh, ‘thuneihna’ toh paikhawm ahi. Hiai etkolna in innkuante taksap poimoh chiteng, bitna leh muanna chihte huap vek hi. A ban ah pa’ mohpuakna poimoh nawn mahmah tuh ‘makaihna’ nna ahi. Makai in tup-le-ngim kichiantak nei a a mite pi bang in, innsung a papen in tup-le-ngim kichiantak nei a a innsung a makaih diing a mohpuak ahi. Pate’ khekhap mah tate’n hon zui diing uh ahihman in, pa’n a tate zuih dia a deihte ama’n ahih masak diing, a tate’ etton dia a hinkhua a zat diing ahi. Huan hiai makaihna a poimah diak hi a theih tuh, khalam vaai ahi. Pa’n a tate Pathian lam a a pi diing, Pathian zah diing, it diing leh biak diing chihte poimohdan a sinsak a, a makaih ngeingei diing ahi.
Innsung ah ‘pa’ kichi poimoh lua, huan ‘pa’ hihna ahi bangtak a sepkhiak poimoh nawn sem. ‘Pa’ bel om saam himahleh ahihna leh mohpuaknate semkhe lou, zong sepkhiaksak a a omlouhna innkuante tuh innkuan vangse tawpkhawk leh hehpihhuai innkuan ahi uhi. Huaiziak in ‘pa’ in ahihna leh mohpuaknate a sepkhiak theihna diing in, ahihna theihpih in, zahtak in, nungthuap ni.
