Naupang a paina diing lampi ah chiil lechin, a teek dong a zong tua nuse lou diing hi.
(Paunaakte:22:6)
Naupangchil/pattah i chih tuh mihing khat zattaak a hong hihtheihna dia hinkho kibulphuhna diing a poimoh mahmah khat ahi. Chiil dik leh diklouh ahihkeileh chiil leh chiillouh mi tuh a hinkhua ah hong kilang pah in, hinkhua a gahkhete zong kibang hetlou uh hi. Naupangte chiil a poimohdan uh tuh nu-le-pate’n gen ngailou a i theihsa ahi a, zong ei khomkhom a tate chiil chiat in i kithei hi. Himahleh bangchi chiil? Bang lampi tawn dia chiil? Bang thu hilh? chihte poimoh mahmah leuleu hi.
Nu-le-pate’n naupangte i pina dia kilawm leh hoih lampi tampi om, poimoh i sak zong tampi om, tua poimoh i sakte zong a sia hi pahlou hi. Naupang chiilna toh kisai a poimoh tampi a omlai in, a poimoh penpen hi a i theih tuh “Pathian it diing” chih ahi. Naupang in Pathian it diing ahi chih a theih kia hunlou in Pathian it kichi hinkhua a hin diing a hilai hi. Deuteronomy 6:5 “Na lungtang khempeuh uleh na hinna khempeuh uleh, na hatna khempeuh un Tangtawn Toupa, na Pathian uh it un.” Hiai mah tuh Toupa Jesu’n Matthai 22:37 a a na gen ahi. Hiai Laisiangthou tangte a i muh theih tuh, i tengteng/ Khempeuh (with all) toh Pathian i it diing chih ahi. Huai omdantak bel siit kichi bangmah omlou a Pathain it diing chih himai hi. Hiai mah tuh naupangte i chiilna diing leh i sinsak diing poimoh leh thupi penpen ahi. A ziak bel mihing khat in a hinkhua pumpi a Pathian itpen a a hon neih chiang in, Pathian deihdan zuih nuamsa diing a, tua in a nuntakna manphasak in Pathian lungkimsak diing hi. Gendan dang in gen lehang, mihing hinkhua a Pathian in a lamet thupipen tuh Amah it diing ahi. Mi’n a hinkhua a Pathian itpen a a hon neih chiang in, a hinkhua khempeuh hong dik in hong hoihtou in, Pathian leh mihingte muh in hong kilawm in ngaihhuai, phathuai, kipahuai mahmah hi.
Nu-le-pate Pathian in etkol dia a hon piak tate/naupangte leitung a a hon piak gou thupipen ahi a, amaute’n Pathian a it diing uh, a zahtak diing uh tuh nu-le-pate’ mohpuak hi ahi. Pathian it un chi in kuamah thagum a kinoh theilou a, ahizong in Pathian it diing in bel kisinsak in kimakaih thei hi. Deuteronomy bung 6:1-9 sung i sim chiang in tate, Pathian it dia sinsak diing ahihdan leh sinsak hun diing na kigelh hi. Tua in Pathian it dia kisinsak poimoh petmah ahihdan leh Pathian itlouhkhak lauhuai mahmah diing ahi chih hon sinsak hi. Tua ban ah Pathian it kichi akhang-akhang a kipiaksawn, kisinsak sawnsawn diing leh Pathian’ itna hinpih diing ahihna zong hon muchiansak hi.
Tu Naupangte’ Ni pansan a i goute Pathian it dia sinsak diing ahi chih i kiphawkthaksakna ziak tuh a poimoh luat mahmah ziak ahi. Pathian it diing leh a thupiakte zuih a poimohdan tuh bangmah in khengkhe (substitute) theilou hi. Tate maban diing khualna in lam chituamtuam kawkmuh in, a hong lohchin uh deihna in sen-le-paan haksa pipi in i seng; tuate ahi diing mah ahi. Tua bang a i hih kawmkawm a, Pathian it dia i genpih, thuhilh leh makaih mangngilh louh diing ahi. I mangngilhkhakleh nu-le-pa i hihna ah phakchiam thupipen (main goal) tunlou kihi diing a poi mahmah diing hi. “Pathian it” mah manpha penpen, thupi penpen leh poimoh penpen hi. Tua Pathian it di’n i suangmanphate tatsiang in sinsak ni.
