“Ahihhangin, Kha Siangthou noute tunga hong tun chiangin, VANGLETNA na ngah ding uh a, Jerusalem ah, Judia gam khempeuh ah, Samaria gam ah leh, kawlmong dongin, kei hong theihpihte na hi ding uhi, a chi hi.” (Nas.1:8BI)
Pentecost pawi/hunnuam hih gingtute’n i ni poimoh zatte laka poimoh leh gen nei mahmahte laka khat ahi. Christmas Jesu pianna theih gigena, Paikan Jesu’n khovel khelhna tatna a bawl theihgigena, huchi mah bangin Pentecost zong Kha Siangthou piak a i om uh chiamtehna a i lop uh ahi. Pentecost pawi tuh Judate pawi poimohtak a kipan e’n zong i laksawn uh ahi chih zong i thei hi. Judate’n Pawipi 3 poimoh mahmah nei uh a, tua hunte in miles 25 kiim a om Juda pasal photphot Jerusalem a a hoh teitei ding uh chih ahi. Huai pawite tuh: Paikan annkuang; Pentecost leh Tabernacle-te ahi uhi.
Hiai pawi Judate a dinga a poimohna mahmah khat tuh buhlak kipahthu genna ahi. Hiai hun in a barley buh lakte uh haithak Pathian Temple a hong tawi a lan in kipahthu a gen uhi. Huanah, hiai hun mah tuh Israelte a dinga Pathian in Sinai tanga dan a piak theihgigena a zong lop ahi. Hiai dan tuh Israelte a dinga Pathian deih banga hinkhua dik a a hin theihna ding ua pitu dia piak ahi chih a theihna uh leh phawkthakna uh zong ahi.
Gingtute a dingin tuh hiai ni Pathian in Jawlnei Joel tungtawn a genkholhna ana bawl tangtunna leh Toupa Jesu in Tanchinhoih Johan a Pa thuchiam ana ngak un a chih tangtunna ahi (Joel 2:28,29; Johan 14:26;15:26 Nasepte 1:8). Hiai ni in chiam a om bangin Pathian in Kha Siangthou hong sawl in gingtu mimal khat chiat tungah hong tung hi. Hiai Kha Siangthou tuh Israelte adia dan pitu (guide) ahih bangin khovel a gintute Pathian deih bang i septheihna ding leh Pathian thu i man theihna ding a pitu(guide) hi ding a piak a om i hi uhi. Hiai ni mah tuh Saptuam hun/hehpihna hun i chih kipatna mah ahi de aw hong chi sak hi.
Pentecost ni a thiltung lamdang mahmah tampi omte lakah, Peter hinkhua a thil tung khat gen ni. Peter tuh ni 50 vel paita a mi dawilok mahmah, Jesu hihna zong gum ngamlou a nial pa ahi. Himahleh hiai Pentecost ni a hong tun zet in chu, Kha a luah dim in ahong om a, kikhekna thupitak mai a hinkhua ah i mu uh hi. Hiai kikhekna tuh amah kia hinkhua ah hilou in, a ompih nungjuite tengteng tungah zong tung hi. Hiai hun in Peter tuh mi dawilok a kipan mi hangsan, lauthawng a kipan lauhna bei, mi kibu a kipan mi kiphoulak hong suak hi. Jesu Khris theihpihna thu hangsan taka genkhetu in hong pang hi. Kua mai a ding a, a thugen kua’n ngaikhia chih khuallou in, a lauh mahmah Judate mai ah Jesu Messiah leh hondampa a hihna hangsan takin phuangzak ta mai hi. Hiai ahi Pentecost thilhihtheihna i chih. Hiai kikhekna thupitak mah tuh ei gingtu mimal chih Kha Siangthou a luah dim a omte hinkhua om ding dan zong hi ahi.
Tua ahihmanin, simtu ittakte aw, hiai Pentecost Kha Siangthou in na hinkhua a khengta hia? Jesu adia hangsan taka theihpihtu in I pang ngam hia? Kingaihsun pha ni.
Pentecost Day zatnuam!!!!
