“Huan, Pathian bawm a laaksak ua, huan, Eli tapa nih, Hophni leh Phinehas-te leng a that uh,”
1 Sam. 4:11
Tutung i buaina uh ziak in aneu-alian chih omlou in eimah hih theih chiat ah Toupa i sam uhi. Himahleh khelh kisikna telloupi a Toupa sam i hihkhak diing thillauhhuai mahmah ahi. I Toupa toh kikal a baanglai lian mahmah tuh khelhna ahi chih i phawk uh deihhuai hi. “Ngai un, Toupa khut hondam theilou di’n tomsak in a omkei a; a bil leng za theilou di’n a ngong samkei: Na thulimlouhnate uh noumau leh na Pathian kal ua kia in a hon khen ahi, bil a a zaak noplouhna di’n na khelhnate un a mai a hon liahsaklai ahi,” Isai 59:1-2. Huaiziak a eilam khelhna muloupi a Toupa’ hatna leh thilhihtheihna lam kia masuan hihkhak theih mahmah mawk hi.
I Samuel 4 ah Isreal-te’ khut apan Pathian’ Thukhun bawm, Philistia-te’n a laaksakna thu i mu hi. Israelte’n Ebenezer ah panmun khoh ua, Philistia-te’n Aphek ah panmun khoh uhi. Israelte’n, “Hiai tan Toupa’n hon panpih hi,” chi a min kiphuahna mun ah galdou diing a kisa tuh vualzohna lamethuai mahmah mawk diing in ka lamen hi. Huchi a hong kidoutak chiang un, Isreal-te tuh a melma Philistia-te mai ah zahlak uhi. Amau lamet bang hilou a, hong vuallelh chiang un, bangziak a melmate mai a zahlak uhiam chih amau sung kivelkik ua, huchi in melmate tung a vualzoh dingdan lem hon geel nawn uhi. Huai tuh melmate’ khut apan hondam diing in Shiloh apan Toupa’ Thukhun Bawm va la ua, a vengtu in Eli’ tapa nihte: Hophni leh Phinehas pang uhi.
Hophni leh Phinehas khelhna toh kisai a huaisiatdan, 1 Samuel: 2:17 ah “Huchi’n tangvalte khelhna TOUPA’ mitmuh in a thupita mahmah mai a, mite’n lah TOUPA’ kiang a kithoihna latte a ngaihneuloh uhi,” chi in kimu hi. Thukhun Bawm Israel-te giahmun a hong tuntak in, Israelte tengteng aw ngaihtak in kikou zuazua ua, lei nangawn a thawnging zuazua hi. Pathian Bawm tuh kimuanpih mahmah ua, vualzohpih ngei diing in leng gingta uhi. A lehlam ah Philistia-te’n lau mahmah ua, Isreal-te giahmun a Pathian Bawm hong tung chih a theih un, i tung a gik hi, huai Pathiante khut hattak apan kua’n ahia hon hondam diing, Aigupta mite gamdai a hipi chiteng a that hi a chi uhi.
Huchi a hong kidou chiang un Philistia-te’ mai ah Isreal-te zahlak chih i mu nawn hi. A dahhuai mahmah bel Isreal sepaih sing thum si ua, Pathian bawm lasak ua, Eli tapa nihte: Hophni leh Phinehas leng that uhi. Toupa’n a min lou peuhmahte panpih teitei lou hi. A ziak ahihleh khelh kisikna tellou a Pathian minlohna in lohchinna/vualtungtuanna pe tuanlou hi.
Tuni a i theih diing a poimoh mahmah tuh Khristian min i putkhak ziak hiam, I thuum ziak hiam khawng a kimuan pah diing hilou hi. Khelh kisikna toh Toupa’ min i loh diing uh poimoh petmah hi. Luka:13:1- 5 ah “Huan, huchih laitak in, kuate hiam a na om ua, huaite’n, Galili gam a Pilat in a sisan uh a Pathian biakna sagohte lak a a helsakte tungtang Jesu a hilh ua. Huan, ama’n a kiang uah, huai Galili gamte huchi bang thil a thuak ziak un Galili gam a tengteng sang in migilou tuan hi un na gingta ua hia? Hi lou e, k’on hilh ahi, nou leng na kisik kei uhleh huchi bangmah in na mangthang vek diing uh. Huan, Siloam innsang in mi sawm-le-giat a delhlupte leng, Jerusalem khua a omte tengteng sang in mi gilou tuan hi un na gingta ua hia? Hilou e, k’on hilh ahi, nou leng na kisik kei uhleh huchi bang mah in na mangthang vek diing uh, a chi a, a dawng a.” Eite leng i kisik kei uhleh mangthang vek thei mahmah i hi uhi. Kisik a, Toupa mai a kituluut diing in saptuamte khempeuh i kichial uhi.
