Ephesate 1:8 “Huchi a na lungsim mitte uh hihvak a hong om a, Amah nou a hon sapna lametna bang leh misiangthoute a a gouluah hauhsaknate na theihna ding un.”
Mit hatlou/ hoihlou tuh taksa aa diing a mialna ahi. Khenkhatte’n a nai mu theilou ua, akhente’n a gamla mu theilou ua, rong (colour) theikak theilou ua, a thilmuh uh lim-le-mel tuam a mu chih bang leng om uhi.
Tulai Khristiante lak ah khalam mittaw kitam mahmah hi. I etdan khempeuh sadan ngen a etna tam mahmah hi. Fanny Crosby in, “Mittote’n salam a mitvakte sang in tam a mu zonaak uh,” a chi hi. Salam mitvak a khalam mitmialte i hi uhi. I minam Toupa’n hon vualzawl a, hauhnate hon pia hi. Himahleh tua hauhnate tungtawn in midangte i simmoh ua, khat-le-khat i ki-el uhi. Gou-le-gamh a kitaitehna i lak uah a nasa mahmah a, Biakinn hoih leh vanzatte tan in saptuam khat-le-khat i kidemtuah uhi. Himahleh Toupa’n vualzawlna hon piak, bangziak ahi de aw chih ngaihtuah kitawm mahmah hi. I deihdeih i lei ua, a phatuam lou diing in sum-le-pai Toupa’ hon vualzawlnate i zang ziahziah uhi. Khovel hauhsakna leh nopna delh chihtak in i delh ua, himahleh kipahna sawt a hon pekei a, lunggimna hon tun zosek hi.
Tutung i buaina tuah uh tungtawn in, leitung thilte a thupi louhdan chiang ka sa mahmah hi. Nidang a i deih leh i thupingaih mahmah goute vut-le-vai zan khat thu a suak mai hi. Leitung thilte ah i haklian mahmah ua, khalam gam i mu ban hetkei uhi. Toupan’n i ‘value system’ hon kheksak nuam a, i salam mit uh hak nawnlou a, khalam mit a hak dia hon deih hi diing in ka gingta hi. A bei pah diing thilte a buaibuai nawnlou in tangtawn daih diing hinna leh thute mah buaipih in nei chiat le’ng ka ut mahmah hi.
Paul in, Ephesa saptuamte khalam (lungsim) mitte uh, hihvak ahihna diing un thuum hi. Ephesate bang in eite’n leng Toupa’ hon sapna i mangngilhta ua, Pathian a kipan i gouluah diing uh hauhsaknate phawklou in leitung hauhsaknate (hun tomchik daih diing) i buaipih uhi. Salam thil etna pan in, khalam mit in i hak diing uh ahi. Jesu’ thugen limtak in ngahtuah thak ni. Johan 6:27 “An mang thei phet zong in phiaphia kei un, himahleh an tangtawn hin pha a om gige diing, mihing Tapa hon piak zong in phezaw un….” Simtute kuapeuh Toupa’n i khalam mitte uh hon hihvaksak ta hen! Amen.
