“Himahleh nou leng bangchi bangin ka om hiam ka tanchin na theihtheihna ding un, Taikika, Toupa a unau deihtak leh nnasempa muanhuai in bangkim a hon theisak ding hi. Huaiziakin, amah na kiang uah k’on sawl ahi, ka tanchin uh na theihna ding uh leh ama’n na lungtang uh a khamuan theihna dingin.” Eph 6:21, 22
Thupatna: Nasepna toh Pathian Limsakna chih thupi nei a, I kihou lai un, I sepkhawmpihte’n bang hon chi muh ua chih poimoh mahmah hi. Mi khenkhatte a sepkhawmpihte un a phat mahmah lai un, khenkhatte a sepkhawmpihte ading a dongkholh leh puakgik om uhi. Ei Khristiante ading bik in I seppihte’n pomtak hon sak ding ban uah Pathian pomtak i hih ding uh ahi.
Rome khua ah, Paul tan inn (house arrest) a khum in om hi. Ephesa Saptuamte’n lunghimoh mahmah banah Paul tanchin za nuam mahmah hi ding uhi. Huaiziakin Ephesa Saptuamte kiangah Paul in a omdan leh a tanchin hilh ding in Taikika sawl hi. Taikika greek thumal ah Tuchikos ahi a, Tugchano apan kilakhia ahi. Huai tuh sappau ah Fortunate (hampha, vangnei) chihna ahi. Paul in Taikika toh kisai Unau deihtak leh nnasempa hoih muanhuai in bangkim hon theisak ding achih in, muang mahmah ahih dan taklang hi.
Paul in Taikika hihna a gen tuh “unau deihtak” leh “nnasempa hoih muanhuai” ahi. “Unau deihtak” achih in Taikika tuh Paul tunga hoih mahmah, a dinmun siat pen hun nasan a, a poimoh bangbang sem leh panpih ding a om gige chih lampang kawk hi a theih in om hi. “Nnasempa hoih muanhuai” in tuh Toupa nnasepna a ginom leh chihtak suah a sem ahih dan muhtheih in om hi. Huaiziaka Taikika tuh mihing (Paul) leh Pathian mai a phattak leh sa’ntak chihna ahi.
Thukhitna: Taikika a minkhiakna Fortunate a thupi kawmkawm in ahihna thupi zaw lai hi. A seppih Paul leh a nna petu Pathian mahmah ngei leng Taikika tungah kipak dingin ka um hi. Min (name) toh kisai ngai poimoh mahmah minam I hi ua, pilvang taka min (name) kiphuahsakte leng i hi uhi. Himahleh I hihna uh thupi vaklou a bat hun om thamtham ahi. Huaiziaka I kivelna ding ua deihhuai tuh I sepkhawmpihte’n ei toh sepkhawm hampha a kisa ding ua’m? Ahihlouh leh tua I nnasep/dinmun hon petu Pathian in hon et chiangin I sepna ah muanhuai hon sa mah diam maw? Toupa’n simtu khempeuh hon vualzawl hen aw! Amen
