12 April 2023, Nilaini Biakna Kikhop @7:30 PM zang zou, nu Linda Mawi leh a tapa Goulian (18+) tenna H. No. 67-D (1st Floor), CPWD Complex, Vasant Vihar a heutute:- Pastor Dr. Suankhanhau Gualnam, Pastor T Lamkhanthang leh Upa H. Kam Suanthang toh va lengla thei ung. Inn pai, ihmu. Zingkhua hong vaak a, a tung a thupi, lungsim ah hong gingging hi. A thu kilakkhiakna Marka 6:30-44, a tamzote’n “Mipi 5000 vakna” chi a i theihsiam mai tangthu ahi.
A. Thupi Piandan (A’ setting):
1. An nekna diing tanpha hun-awng neilou a mipi’n, Jesu leh A nungzuite hong bohbuai chiang un, heutupa’n, noumau kia in gamdai mun ah atuam in hong unla, khawl tadih un, chi hi.
2. A chih bang ngei in gamdai mun ah kihemkhia uhi. Himahleh, suntanglai chih mahtak, mipite’n mu in delhzui veve uhi (t. 33). Heutupa’n amaute na en in ching diing neilou belamte bang in mu, hehpih mahmah; thu/thil tampi a na sinsak (t.3 4).
3. Ni hong kaita a, nungzuite’n a khuakpilna uh toh, hiai mipite khokiim leh lou khawng ah nek diing zong di’n sawlkhe mai ve, zekai leng zekaita ahi, chi uhi. Jesu’n bel, “Noumau nek diing pia un,” chi in dawng hi (t. 35-37).
B. Lungsim A Hong Latdan:
1. Gilkial mipite toh kisai mah Toupa Jesu’n, “A paimang uh kiphamoh kei, noumau nek diing pia un,” chi hi (Matthai 14:16). Paimang = Lampi a bah leh solsam thei uh; Nek diing pia = Kepsak a om pen piak. Tua tangthu a kigen naupangpa kep tanghouphel 05 leh ngasa 02 ahi. Tua sang a tamzaw kem/ kepsak a om ngen, saptuam member 1000 val kilawikhawm himawk hang ei, guai.
2. Mihingte’ beidot/ taksap hun in, sum (dangka) poimoh lodan in kilang thei hi. Jesu hunlai in makhai 200, a value tam lua hikha diing! Tua monetary angle a thil en, nungzuite lungmang uh a, Jesu bel lungmuang hi. A om bangbang phaltak a piakkhiakna leh TOUPA’ khut a tun nung a thilpiang i etleh, Upa T Pumkhothang’ na gelhkhiak la – “Amah aa di’n a haksa omlou e…” chih hon phawksak.
3. I gennoptak, vualzawltu TOUPA toh kisaina ah zaw, mi tasam leh beidong khat aa di’n ginna a a innkuanpihte apan (sum-le-pai sang mah in), moral support, ittu diing neilai hih a kiphawkna ahi masa mai diam, na chi ing. Huai moral support petu hihna tungtawn a thilpiak pen khum sese. Jesu’n a hihdamte peuhmah a poimoh (need) uh mu hi. Huan, Amah kiang zuan/ naihte na hawlkik lou hi.
C. Unaunu Linda Mawi-te nuta toh kisai:
Pastor Thang (LKT) in, “A gal a thuumpih kawmkawm in, taksa mahmah a leng va encourage ngai ahi… Member zahtakhuaite, i zite khawng toh va daak zelzel lehang Ministry poimohtak seemkha hi diing i hi chih ka mu thakthak..” a chihleh, Local Chairman Upa H. Kam Suanthang in a gen theih zelzel, “Kei, TOUPA na Pathian uh ka hi a, Aigupta gam a kipan hon pikhepatak; na kam uh liankaat unla, ka hihdim diing ahi” (Sam 81:10) chihte ngaihsutphat tuak ahi.
Jesu Khrist suangpi tung a lamtouh, EBCC Delhi, approachable local church khat ahi. Mission Sunday 2023 thupi di’a teel, “Giving is Blessing”. Puakgik kidawntuah leh Itna (Jesu Khrist itna) kisilhthuah di’a SINSAK hihna langsak zelzel thei, “EBCC Delhi-te” hampha hang, halleluijah! “Huai thu ah bang i gen di’aleh? Pathian ei lam a apanleh kua’n ahia hon dou thei diing?” chih gelh ahi (Romte 8:31).
