“Na tung ua ka hih bangin, nou leng na hih sam ding un, hih ding dan hon hilh ka hi”
Tulai khovel bang lam peuh ah masawn leh changchang hi. Bang hiam khat sep nop i neih leh baihlam takin YOUTUBE ah a sep ding dan muhtheih mai hi. Midangte hih dan apan zil siam-te’n sep ding tam thei uh himai hi.
Pathian limsak hinkhua ah, nungchang (character) om ngeingei ding tuh KINGAIHNIAMNA ahi. Mimal ki-thupi sak hiam, ki-sathei mahmah kawm a Pathian limsak chih om thei dingin gintakhuai lou hi. Tuni a i tangteel i et leh Jesu’n a nungjuite, Amah hinkhua tungtawn in etteh ding (example set) pia hi. Jesu’n a nungjuite khe sil sak a, tua bang mah a midangte tung a hih ding chi hi. Jesu hunlai a midangte khe sil sak tuh sikha-te (slaves) nnasep leh nna niam pen a a ngaih uh ahi.
Jesu vaipuakna dan tuh plan hoih tak bawl a, a nungjuite sem suah sak hilou hi. A lemgel sem suah ding a midangte zang siam leng hi masa lou hi. Ama’n makaih a, etteh dingin kibawl hi. Pathian limsak hinkhua i neih theihna dingin, ettontak hinkhua i zat poimoh hi.
Tulai khovel ah information hat lua ahihmanin i lunglutna lam theihlah ding omlou hi. Zanlam a ka inn vehna khat uah, a nau uh kum 5 mi ding khawngin, gam tuamtuam bangzah hiam-te alphabet khawng a sim theih banah, gelh thei hi. A nu-le-pa hilh leng hilou in, YouTube a etna tungtawn a a sinkhiak ahi. Theihna leh siamna nakpi takin khang a, himahleh tua theihna leh siamna-te, midangte etteh dia zatkhiak ahih kei leh a manphatna omlou hi.
Jesu sinsakna, a thupina tak ahihleh etteh ding (example set) hinkhua a zatna ahi. Hinkhua a etteh tham ching makai, saptuam leh gam leh innkuan in a taksap mahmah khat hi in ka thei hi. Pathian limsak hinkhua chih i gen lai in, nang leh kei hinkhua, midangte, saptuamte leh innkuante etteh theih ding bang a om mah diam maw, chih kidong leng uthuai ka sa hi. Jesu hinkhua ah laaktak tam mahmah hinapi, nang leh kei hinkhua a laaktak a omkei leh Pathian limsakna hinkhua kizang kha nailou hi ding hi. 1 Kor 11:1 ah “Hon enzuite hi un, kei leng Khrist enzuipa ka hi hih mah bangin” Paul in achih bangin, nang leh ke’n le i chi thei diam?
