Pathian hoihna te ziak in tukum 2021 adia khasawm na tan melmuthei a damna hon piakziak in kipahhuai i sa hi. Simtute Hondampa Jesu Khrist min in itna chibai k’on buk hi.
I saptuam sung a department khat, salam leh khalam kilam touhna a khuam poimoh mahmah Dorka pawl makaih a saizel ‘ANTANGPHAM’ toh kisai i theihsa himahleh, theisemsem le uthuai sa in k’on gelh hi. I na zuih leh sepsuahsa tampi manpha mahmah a omtham a, huchih kawm in saidan kibang lou deuh bang om khathei hi. Tuabang a om a, khentuak leh zuihthaktuak omte a na bawllem ding in leng a kisaipih DBDF leh Local chih a BDF te banah mimal in leng i hihdan a na ki-enkai ding in i kingen hi. Huan antangpham DORKA pawl a himawk lou in i saptuam pumpi a ding in sumnaak (source of income) sawm-a-khat ban a ahi chih leng haih kei ni aw.
A HONG KIPATDAN: Heutupa a na phamta Rev H Nengzachin in America a kipan a a hongtunkik in huailam a numei pawlte’n an a huan di uh a tehkhiak ua kipan a phamkhiak zel ‘Antangpham’ i chih America te hihdan hoih a sak thu a hon gen leh ei EBC numei pawl in leng hoihsa in kiphutkhiak tung 1950 in a na kipankhe pah hi. Huai hunlai in taklam pham kia a hilai a, numei heutu masate bang in sawm-a-khat bang a ngai hial in phamlouh theihlouh dan a koih in a na ngai poimoh mahmah uhi. Hun hong paitou zel in numei sawltak masate’n leng a bial fanna munte uah antangpham pham dingdan sinsakna tup a nei in Pathian thu toh a na genzel uhi (Dorcas’ Golden Jubilee Souvenir page 34. By Mrs Chingman).
Kum 1974 in Kangkap ah Dorka Khawmpi Lian om a huai hun in Dorcas’ Hall lamding toh kisai Convention kumsim khawmpi 1973 a upate’n a gelsa uh ahih toh kiton in Pastor Kaineng leh Pastor Khamkam, Dorka pawlte thathousak a chialpi ding in khawmpi ah hoh uhi. Hiai Khawmpi hun a Pastor te’n a hong gen ua kipan in khawmpi hoh numei kuapeuhmah kiphur chiat in Dorcas’ Hall lamna project neihding, antang veilampham pat ding, taklam pham leh veilam phamte Headquarter a lut vek ahihman in local chih a zatding Jesu zintunna leng patding in thupuk hi. Thilpiak a khanna hong hiding a hihna toh a lunglut mite’n taklam pham, veilam pham leh Jesu zintunna a vek a hih utte a ding a hunlem ahih theihna ding in khochih a Dorka pawl in amau khobing chiat ah genthang uhi. Huchi’n mi bangzahhiam te’n tuabang a hih in antangpham lam ah khanna thupitak om hi. Tulel in ANTANGPHAM chithum - Taklam pham, Veilam pham leh Jesu zintunna chihte kinei hi.
ANTANGPHAM PHAMDAN CHITUAMTUAM: Antangpham i phamdan a kibang kei thei mahmah hi. I phamdan chituamtuam i taklang ding a, nang na phamdan a na kivel ding in k’on ngen hi. Zing leh nitak anhuan ding tehkhiaksa a kipan in kipham khia a, Antangpham koihna ding bawmtuam ah kikoih tuam pah hi.
a) Khenkhatte’n khut taklam leh veilam mah in khutdimteek in pham chitchiat uhi. Khenkhatte’n lah khut veilam hi sese lou in nihvei phampah lian uhi.
b) Khenkhatte’n lah khutmuk in pham minpu in pham uhi.
c) Khenkhatte’n lah phamkhe selou in antangpham dong te a vapai chiang un kilawm a sak zah uh a na suahthoh uhi.
d) Khenkhatte’n lah tuni tan in taklampham kia mah paipih charchar lai uhi. Adangte ngaihsak kha vetlou.
e) Khenkhatte’n lah a antangpham bawm uah antang a dim a thunngal in, antangpham khon di hun ngak a koih charchar in, khonkhit chia huchimah a adim a koihchet zel.
f) Khenkhatte’n taklam, veilampham leh Jesu zintunna chi a thumvei pham gige a koih pawl om.
g) Khenkhatte’n antang a huan ding uh tehna nou zahzah phamkhia bang leng om uhi (etskn: nou 10 a huan leh 10vei phamkhia chihna).
A SAIDAN: Antangpham local chih a kidong khawmte local BDF in a na sai in, sumsuah in a sumte Headquarter Dorcas’ Hall a submit zel ahi. Hun sawtkuamtak taklam leh veilamphamte Headquarter a submit in Jesu zintunna te pen local ki-etkolna ding in kizang zel hi. Hichibang a hoihtak a pai i kisaklai in khua khenkhat ah local a ding etlahluat ziak in Headquarter a submit di zah submit lou in amau local ki-etkol na ding a bangzah hiam koihkhe pawl om hi (etsakna, Pathianni teng a antangpham khon pen Pathianni khatvei a donkhiat uh Headquarter a submitlou in amau kitan uhi). Huchibang a thil hongpai chiang in heutute’n vai hon hawm uh a, antangpham khonkhiak tengteng, Jesu zintunna leng koihtuam tuanlou in avek a Headquarter a submit ding, tualak a 30% local ki-etkolna ding a zatding in hon chi uhi. Hiaidan a kum bangzah hiam i painung in kum 2019 Convention kumsim khawmpi ah 40% local ki-etkol na dia zatdin hon lemsak pihta uhi. Kum 2020 April a pat in hiaidan kizuita hi. Ei local chiat ah antangpham i summuhna naakpi suak ahihman in a kul leh poimoh bang saptuam sung a nupite theihsak leh chialna bang bawlzel hoih ding hi. I phamtam a Headquarter a submit di a tamleh ei ading tam himai ahihman in. Huan mahni local chiat a i Pastor te hiam church worker te hitaleh deihsak a panpihna piak bang tampiten i hihzel uhi. Tuabang a mi panpihna antangpham i piakte uh, a antang ei phamkhiak himahleh mi’n Pathian gam nasepna dia a piak uh ahi chih phawk in ei a dia sum hong kiikte mah zang a lei in i peding ahi. Huchilou a antangpham lak a tehkhe top a va piakpen hoihthou mahleh i antang phamkhiak zah pen Headquarter a lah lutkhalou ahihman in guktakna chikhat ahi diam? chih bang ngaihtuahna ah om hi. En mi panpih a thilhoih hih mahmah i kichihlai a antangpham gu suak maimah kihi ahi. I theihsiamna di’n Meithai Fellowship nei ding chi in program i bawl a, meithaite present piakding in mi dawr ah thil vakimawk laklou a, i sum muhkhiakte (antangpham % lutkiik) mah zang in kilei hi. I antangpham saidan etthaktuak leh bawlthak ding omte bawlthak ni aw. Tuaban ah mi khenkhatte’n antangpham a phamkhiak uh a dongte’n a va don ma un kuahiam panpih ngai a sak uh omding hiven, awlmohtak in mi panpih na ding in a na pia hi. Mi panpih pen hoihlou chihna a hikei a, himahleh antangpham Pathian gam nasepna ding a, i piak pen a pai dingdan leh saiding dan i gel bang in a lampi diktak zuihphot hoihzaw ding hi. Local BDF te’n saikhalou in mahni kisai chihna hongsuak hi.
A HAWMDAN/ LATUTE: I pawl min DORKA hihna, ‘Thilhih hoih leh thilpiak a hau’ chih a hih dungzui in ama hihna mah semsuah a tagah meithaite leh genthei zawte panpih leh thilhih hoih himhim i tup leh ngim hi gige ahi. I saptuam sung a niteng a kilohtawm a omte, nektak haksa zawte, antangpham nipi kalkhat sung a ding a a kingakna uh chih phawkpih in a hithei liaite ki-awngsut thei zel le amaute panpihna hoihtak hiding hi. Antangpham bel antang tuamtuam kihelkhawm a hihman in, amix dan lim hunlel ahi chi a phatuamngaitak a midang khual selou a lapawl bang omtheih, khenkhat te’n dawr sang a kimanzaw ahihman in chi a BDF member khosathei mahmah hingal, a sai man ua kisiamtantak a la leng omthei hi. Hichibang a thuneite leh neinung zawdeuhte ziak a midang genthei leh haksa zawte nelhsiah a om khanak uh ahi. Eimah saptuamsung chiat a a tangdia kilawmte hamphatna pechiat ni.
A ZUAKNA MAN TOH KISAI: Niteng nek-le-tak poimohte leh thil dangdangte leng hun hongpaizel a changkan lam i manoh toh kiton in thilman khangkhang, antang man bang leng hongkhang zel hi. Bial pumpi hiam, Division khat sung hiam a arate kibang a zuak chitchiat leng hithei khollou ding hi. Aziak bel local chih i khosak dan kibang lou a, tulel a i paidan in mahni khobing toh kituak dia Local BDF-te’ sai dandan hoih kisakpih hi. A hoihpen ding theihsiam a haksat kawmkawm in lai hong kihawmkhin a hihna toh antangpham 1kg = Rs 25 – Rs 30/- kikal ei local toh kituak ding enkawm in zuakthei chiat le maw, thupiak hilou ngetna bang in i gen zaw hi.
ANTANGPHAM MAN ZATNA: Antangpham neu apat in nute’n a gen uh kiza zelzel hi. Ahi a tutan inleng nupi hiam Saptuam Upate tan in bang a kizang ahia chih nasan theichian lou omlai khathei hi. Local chih a antangpham khonkhiakte BDF te’n honsai in a zuakna sum Headquarter ah hon submit ua, a submit tengteng lak ua kipan in 40% local ki-etkol na ding in tangkiik uhi. Adang 60% te lak ah 15% DORCED leh DOTPROJ (Naupang school kaite chawmna leh puankhui zilsakna) ding in kizang hi. Aban 45% te i Saptuam pumpi a ding in a poimoh na munmun a zat ahi. Huaiziak in Dorka pawl antangpham himawk lou in a saileh enkaitu a pangkha i hi a, kisialpih leh kineihsak luatna ding a om kei, ut leh dah a thangbawl ding leng hituan lou ahi. Pathian gamna inkuan a septheihna lampi hoih mahmah ahi chih pasalte’n leng hon theihsiampih theihna ding un hilhchian zel thei le deihhuai hi.
Hiai a tung a antangphamdan chituamtuam lou leng phamdan chidang deuh om maithei, phetlou in antangpham kichi phawkphaban hetlou nupi bang leng omkhak theih lai hi. Duhthusam leh a deihhuai banah i pham paidan ding tuh khutdim mah a pham a, Jesu zintunna pen mikhual kuahiam zin i neih chiang a leng ei inkuan in i huanzah ban a nou 1/2 (mikhual neihzah) zil a kibehlap zel bang in Jesu zintun ut gige te a ding in anhuanteng a noukhat koihtuam zel ahi. Khenkhatte’n nipi kal khat a khatvei koihtuam chih leng om hi. A koi a bang hileh hiaibang a antangphamdan chituamtuamte lak ah nang phamdan a na kivel lechin Pathian gam nasepna ah hoih huntawk i sak leh sutzop ding, hoih huntawklou i sak leh panlak ding dan ngaihtuah a kalkhat bek suanbeh ding a omkha diam? “Michih in it pipi a pelou in, piaklouh theihlouh a ngaihtuah a petuanlou in, a lungtang ua a tup bangzel un pia uhen; Pathian in kipaktak a pemi ahi a it(2Kor.9:7). Genthei panpih ding in muntuam ah kal i suankhe gige theikei, sum-le-pai i lungsim in a tup zah leng pezoulou himahlehang, a tung a antangpham man kizatna i theihtak bang in ei mah insung, i ommun ah adiak in, inn nupite’n zing leh nitak anhuan di nei hang a, tuate lak a pham khat-le-nih i phamkhiak in Pathian gamna semthei a, genthei tagah tampite ading a hamphatna tunthei ahi chih phawk in ANTANGPHAM lam ah thanop suahthak ding in i kichial hi. Pathian in kipaktak a pemi it ahih bang in kipaktak in pia ni, tua hileh a itna tang in vualzawlna ei a hong hidia, midangte a ding in leng vualzawlna hithei ding i hi. Toupan hon vualzawl chiat hen.
