“Ahihhangin, nang, Pathian’ mi aw, hiaite khempeuh taisan inla, diktatna, pathianmitna, upna, itna, thuakhatna leh nunnemna delh in” (1 Timothy: 6:11 | BI version)
Mun khat, program khat a mi khat thuumna lung hon khoih mahmah tuh “… Pa Pathian aw, tuni tan hiai ka hinna uh na hon kawm (kheel/zangsak) man in na min ka hon phat hi…” chih ahi. Hiai thuumna la in ka lung hon khoih in thil tampi hon ngaihsunsak a, ka muhkhiak thak tuh: tua ka hinna kei a neitu hi hetlou ka hi, kisaktheihna diing bangmah om kiuhkeuh lou, Pathian in a hon zaksak, ni khattei ka piakkik diing a na hita e chih ahi. Huai in Pathian kia, Pathian chauh, bangkim a bangkim chih hon phawksak thak mahmah hi.
Hiai a i taang teel i etleh thumal poimoh mahmah “delh in” chih i mu hi. Hiai a delh in chia thupiak kipete lak a khat tuh “pathianmitna delh in” chih a hi. Hiai thumal delh kichi in a gen ut omdan hi a i theih tuh: pang teitei, hih teitei, delh teitei, chih ahi. Huai tuh, kuahiam in thil khat a neih theih na’ng ahihkeileh, a tun theih na’ng, ahihkeileh a tangtun theih na’ng a pang teitei chihna hi in i thei hi. Chihleh hiai taang teel pansan in Paul in Timothy bang delh dia sawl leh thu pia ahi dia le? A dawnna tuh Pathianmitna delh dia thu pia ahi. Pathianmi dia kisawl chih mawk? i chisim maithei, hiai tuh kisawl diing chiitak, khauhtak a thu kipiakna chi mahmah a na hi zodan ahi. A ziak tuh, Pathianmit kichi thilhoih leh manpha penpen pawl hi ahi. Huaiziak a, Pathianmitna dia pan teitei, thuum teitei, Laisiangthou (Bible) sim teitei, hih teitei, sep teitei, Phat teitei, kidek teitei chihte poimoh hi.
Pathianmit/limsakna delh teitei kisam leh poimohdan tuh, thupatna a i gen mah bang in, mihingte i hinna ei aa a na hi dek nenglou, a neitu diktak om, huai tuh Pathian bangkim hih thei, bangkim naak ahi. Tua Pathian in hinna a hon piak a ut hunhun a laak theihna thuneihna a nei hi. Hiai hinna la chih mai a beilou in, thukhenna maai tun diing hi zomahlai hi. Huai tuh, mihing in leitung a Pathian in hinna a zatsak sungteng, a zatdan chiantak in thu khen ngiatngiat diing chihna ahi. Huaiziak in tulaitak a, na hinkho zatdan ah, Pathian limsak na hihleh hihlouh kilam dandan, na sih nung chiang in hong kilangkhe pah geih diing hi. Tu hun, tuni, ka hinna i chih hong beileh thukhenna mai a din hun hong hi diing a, Laisiangthou’ gen, “Mihing aa diing a khatvei sih seh ahi a, tua nung chiang a thukhenna maituah diing a seh ahih bang in.” “Jesu’n: Ngai un, k’ong pai pah diing! Ka pahtakman ka kiang ah a om a, michih kiang ah a nasep bangbang un ka pe diing hi.” (Hebrute 9:27, Kilaakna 22:12) hung tung diing hi.
I gen mah bang in, mihingte ni khattei sih diing peelmoh, ei zong hon pha khong diing, Laisiangthou’ gente hong tangtung diing hi. Tua ahihman in, tu i leitung hinkhua ah, Pathianmit kichi poimoh petmah hi. Delh petmah a zong Pathianmitna i delh diing ahi. A ziak bel kikhel thei, zekai thei thil ahihman in. Pathian limsak ni, Pathianmit tum ni, Pathian lau in a deihlam seem ni, PATHIANMI IN.
