“Ahi, kuapeuh Khrist Jesu Pathian limsaka om tum photphot in sawina thuak sam ding uhi” (2 Tim. 3:12).
Khristian kichi taphot in Pathian limsak hinkhua zang ut chiat ding in ka gingta hi. Himahleh Pathian limsakna tuh sawina toh kikhen theilou hi. I Khristian hindan uh I et chiang in, a thuak ngaplou Khristian kichi te ihihman un poimah mah hi. Khristianna in thu kipahhuai ngen hon tun dia, haksatna hon pumpelhsak ding hihetlou hi. Khristianna in haksatna leh thuakna hon tut om tham tham hi.
I tangtel I etleh Pathian limsakna toh thummal ki zui tuh sawina thuak ding ahi. Huaiziaka “Pathian limsakna tuh Pathian deihdan zui a, a sia tawp tuah a ngaihleh leng thuak ngap na ahi.” Joseph in Pathian a limsak ziak in taan inn (Jail) lut hi. Sadrak, Meshak, Abednego te’n Pathian a limsak ziak un meiphualpi a paihlut in om uhi. Daniel in Pathian a limsak ziakin sahang baknei khulh sung ah khiat in om hi. Pathian limsakna tuh midawilok leh eimah ki itte ading a thil hithei hilou ahi. Pathian lungtang tengteng leh lungsim tengteng a it a, a thuzui ngamte ading ahi phet hi.
Pathian limsakna tuh sawina toh kizui ahihman in thuakngap poimoh hi. Pathian deihdan thei ahihhang in I thuakngaplouh ziaka I seplouh, I genlouh bangzah om ta ding hiam? Manipur ah, adiak in Khristian te ading a kam (job) lei khelhna ahi. Himahleh sumlou a kam muh thil hitheilou bangphial ahi. Pathian limsak ziaka, lei sanga leilouh telzaw a, sepna kip neihlouh ziaka damsung a haksatna thuak a ngaih leh leng thuakngap bang zah bang aom dia aw? Ahihlouh leh semtu tampite’n a sepna mun ua pai hoihsa ua banah a ut leng tampi om uhi. Amaute a sepna mun ua a paitheihna ding un khua sung a hausa thunei leh heutute dan bawl palngai banah Government lam inleng facilities a suk buchin ding uh, a pichin zohlouh uh leng tampi om hi. Himahleh ngoh hiam, paulam bawl bawl sangin, Pathian limsak ziak a thuak ding om bangbang thuakngam a kalsuan khia bang zah I om ding ua aw?
Tuni in, Saptuamte Pathian limsak ziaka, thuakna ding munte ah thuakngap leh a man piak ngai omte pia ngap taktak i hi chiat mah ding uam aw? Simtu, kuapeuh Pathian limsak I ut taktak leh I maituah ding tuh sawina/haksatna ahi. Pathian I limsak ziak a, khovel paidan ten hon nasak/ thuaksak ding mah ahi. Insung mahmah ah leng Pathian limsak I ut ziakin, thuakna I maituah ding om veve hi. Pathian min in, I thuak ngap taktak na ding uh maw? Unau, thuakna tellou a Pathian limsakna, zuau ahi. Toupa’n simtute khempeuh Pathian limsak ding in hangsanna hon pia chiat hen! Amen.
