Ka pa David in Tangtawn Toupa Israel Pathian Min a ding a temple lam ding lungtang in a vei hi. Ahihhang in Tangtawn Toupan ka pa David kiang ah: Ka Min a ding a temple lam ding lung tang a na vei man in na hih hoih hi. Hinapi in, tua temple lam ding nang na hi kei a, na sa leh na sisan mah mah na tapa in a lam zaw ding a chi hi (1Kum.8:17-19).
Kumpi David in Pathian a ding temple lam ding a lung sim in lunggulh mah mah in hichi in Zawlnei Nathan kiang ah na gen hi. “Pathian singkuang puanbuk sung peuh a, a omlai a, kei sidar sing a kilam inpi a KA TEN MAWK !” a chi hi(2Sam.7:2). Hiai ah kumpi David in Toupa Pathian a zahna lianpi toh hiai thu gen in temple bawl ding in kisa mah leh Pathian in “Nang ding na hikei” chiin a hilh chian hi. Toupa a ding, a saptuam a ding i ut bang bang leh i ngap bang bang a sem thei ding a phalsak a i om uh hamphatna thupi tak ahi chih hon musak mah mah hi. Biakin bawlna mun bang zah ah na tel kha ta a, tha bang zah na seng in, sum leh pai, na neih leh lam bang zah na thoh kha ta a ? Pathian a ding a tha na piakte, sum leh pai na sente, na hun manpha na piakte leh gim leh tawlna na neih khakte supna leh manna hi lou in “Hamphat huai na hi zaw ahi” na chi thei hia?
OM LOUHNA DING IN: Buaihuai i sak, dong kholh i sak leh nuam lou isak khenkhatte i theih khelhman ahizaw tampi om thei hi. Mi thanuam leh taimaten mi khenkhatte tutmai mai sung in thil phatuam leh thil hoih tampi a na sem kheman sek uhi. Omna mun leh omkhaklai chih khong ei deihtelna pen hi gige khol lou hi. Siamsinna ziak bang, nekzonna ziak bang, taksap leh chihmoh man bang leh utzawk man bang a om khakna mun om ding hi. Tua i om khakna munte a i om sung in, bang bang sem in ei a ding a phatuam, midang ding a hoih leh Pathian minthupina ding a kizat khakna i nei ua chih kivel in kisut leng, septuak semkha lou, telna dia kilawm a telkha lou iki sakna khong om a louhna ding pang ni. Bang mah a pang thei lou in om kha leng kisik lawtel ding i hi uh.
HIZAW HANG: Mi hausaten sep ding bawl ding ahau ua, mipil sang a mi thahat a poimoh ni uh a tam mah mah a, mi thahat takten leng kilohna ding a poimoh hun uh a om zel hi. Huaiziakin kiphatuam tuah, kitung ding tuah leh kidomkang tuah thei ding a Toupa Pathian hon siamte ihihna uh hamphat huai a na hizaw. Saptuam leh khotang ah hiai zang phatuam siam leng Pathian deihlam hi ngei ding hi. Saptuam sung ah Biakin bawl ding, tutna bawl ding, pulpit bawl ding leh a dang dang zong om thei hi. Huaite bawlna ding in tha bang zah na seng ta a, hun bang zah na peta a, a sum in bang zah bang na pekhia in Pathian kiang ah bang zah vei thumna in na pang kha ta a. Boruak a chidam louh chiang in bang mah kisem thei lou, koi mah a kidiang khe thei lou chih ahihman in, sep ding hong tam,bawl ding hong tam, phakna ding hongtam a, tha senna ding, sum senna ding hong tam leh hamphat huai na hizaw hi. Damlou leh bang mah sem zou lou in om leng a chidamte eng mah mah ding hizaw hang. Dam gige ding, hithei gige ding chih kuamah a thei om lou HIZAW HANG.
TOUPA MUANG IN: Singtang lam a saptuam inn tam lou chik, member tawm chik chik banah sum muhna hoih leh muan theih ding om het louhna mun a teng ten – Biakin ding bawl in a sung a vanzat zong a ngaihtuah uh kul, saptuam school omna khuate bang in school a bawl uh ngai, a sung a ding furniture a ngaihtuah uh ngai, semtute inn ding quarter leh a sung van poimoh teng a kaihkhawm uh ngai lai, haksatna tampi tuak sek uhi. Sum muhna kichian tak nei om ngellou, worker va omkha teng mah lohnei hi lel uhi. Huaite ngei leng Lamka khawng a tate uh koih, huai lam a, a tamzaw piak ngai chih bang hizaw mah lai hi. Hiai teng ka hon gen lel in leng khopi khawng a om khate hamphatna hong lang khinta hi. Huai thei kawm in BIAKIN BAWLNA DING, QUARTER LEINA DING leh van poimoh leina ding in, saptuam taksap tuam tuamte ah nang bang zah a pan na sawm a? Sepna ding hun na neih lai in, sem zou ding a na chidam lai in leh Pathian vualzawlna toh buai het lou a kha teng a lohna lak lai in, Toupa a ding a SAWM A KHAT, MISSIONARY VAKNA, ANTANGPHAM leh BIAKIN BAWLNA DING pe mangngilh ngei ken, na piak zah leh na piak bang bang Toupan mangngilh het lou ding leh supna leh zawnna hon tun lou hal ding ahi, TOUPA MUANG IN.
