LEI A TUNGMAN: Lei a tungman zang a bawl a om pen mi hi a, Pathian in a hinna koppih di’a mi nak sung a hon hatlut pen Pathian in hon piak hinna ahi. Lei a tungman zang a bawl a om mi leh Pathian apan hinna hong kigawm chiang in ‘MIHING’ a hong hihta hi. Leimi leh van hinna hong kigawm khosakna mun ding a Pathian in a bawlna mun tuh leitung/ khovel ahi. Thil nih kigawm a bawl mihingte tuh a bawltu leh omsaktu tuh Pathian ahi. Pathian in a bawl, a omna ding mun a sehsak a, nek ding, dawn ding leh poimoh teng teng A pia hi. Tuabang a lung muang, nuam leh kipaktak a Pathian toh kithuah a omlai melma setan in gul zang in a hong khem a, tangtawn daih ding khelhna ah mihingte a hong pukta mai hi. Hiai tuh khemna gah, suan tengteng Pathian toh hon kimelmasak tangtawn sihna hon tuntu ahi lai hi.
PATHIAN SEH: Pathian seh leh geel bang in mihingte tuh khovel ah teng in i khosa uhi. Khovel tuh Pathian siam leh Pathian bawl ahina mah a, a kiningching a nop leng a nuam mahmah hi. Nek ding a tam a, dawn ding leng a kiching mahmah mai hi. Hiai mun tuh Pathian in sia-le-pha theihna zang a khosakna mun ding a a bawl ahihmah bang in mipil, a sia leh pha thei, a hoih leh hoihlou thei, zuih ding leh zuih louh ding thei, sep ding leh sep louh ding thei, gen ding leh gen louh ding thei, tuabang mite leh mihaite kal tuh a kikhe mahmah mai hi. Hiai mihing chi nihte lak ah koilam pen a tel kha in na kithei a?
KHOVEL PIL: Angmasialna hiam, mahni angsung kia khualna leh midang ading khualsak louhna chihte khawng khovel lal setan deihdan, Pathian lungsim leh deihdan pilna hikha lou ahihman in hiaite tuh khovel pil a kichite ahi. Hiai in tuh hamphatna om tengteng tan ut in midang deihsakna a hau kei hi. A kam a mi zak ding bel a ging kilawm mahmah napi, a taktak na hilou ahihman in khemna ahi maimah hi. Hiai tuh khovel lal setan a suak ahihman in khovel pil leng a kichi mai hi; nang leh kei le kiveelchian ni.
SODOM KHOPI: Khopi nuamtak, nek-le-dawn kiningchinna mun, nekzonna a nopna mun, sum-le-pai muh a baihlamna mun, lei hoih, haichi, singkung loupa hoih, mihing leh ganhingte adi’a nek ding tamna mun ahih ziak mah ahi ngei ding, Lot in leng a etlah. Huai khopi a teng Lot tuh a hong inbul deuhdeuh a, hong hauhsak mahmah tak man in leh hong intek luat tak ziakin khopi pawtsan ding tuh a baihlam nawn kei maimah ta hi. Pathian in a hehpih man in huai khopi a kang lum khawm lou ding a lakkhiak tum in Angelte zang in a pikhia a, himahleh a zi it tak tuh a taan phaban lai hi.
Huaiziakin i khosakna ding leh i tenna ding a Pathian in a bawl a, vanzat ding kiching, tuate manphatna leh zangkhaina mipilte’n hon theikhia in i nu leh pate hunlai sang in tawldam zaw a khosak dan i theita uhi. Hun hong pai zel in vanzat manpha leh tawldamhuai, kin-gang leh baihlam zong hong pian behbeh lai ding hi. Tuate zang in khovel a thiltungte, baihlam tak a za leh mu in i om ua, kin taktak a kithuzak in thu hoih thupha i kihilh pahpah thei uhi. Hichibang khovel khangtou leh masawn a i om lai un i theihlouh kal un khovel in hon nomvalh a Pathian thu himhim ngaihtuah pha ban nawn lou in khovel mitna, melmapa setan kipah lam, mihingte a ding a manthatna lampi ah i kidelh lut zungzung uhi.
I thupi a i teel bang in tuilak a om ding in long kibawlkhia hi. Huai long zang a khualzinmite’n van tam pipi pua in gam khat leh gam khat kikawm tuahna hoihtak leh kisumdawnna baihlamtak a hong hi hi. Tuipi tung tuh kikawmtuahna baihlampen, man tawm pen leh sumdawng mite adi’a zattangzang hoihtak ahi. Himahleh hiai long sung ah tui, a lut leh pai thei nawn lou ding a, tuipi thuktak sung ah, a van puak teng, a mi puak teng leh a sung a semtu teng, a vek un tuipi nuai ah tum ding hi. Huai mah bang in Khristian gingtu damlaite khovel a i tensung un khovelmi law kei ni. Khovel-mitna in hon luahdim di’a hon-gumpa Jesu kiang a tawldamna tang zou lou in i om kha ding uh. Long sung a tui a lut leh pai thei nawn lou a, a tum mang bang in, nang sung a khovelmitna a hong lut leh na suakta zou kei kha ding, pilvang mahmah in. Sa leh sisan tuh khovel a khosa di’a bawl ahi, khovel bel van gam lutna di’a kisakkholhna mun ahi, tua ahihman in gingtute tuh khovel thil i kitupmang sak louh ding uh ahi.
