Thil khat peuh peuh a tak a i muh leh tuahte kithei baih deuh se hi. Nasepdan thak khawng a thu a hong kihilh nilouh sang in midangte hihdan i et chiang in, I thei a i zui thei pah zaw hi. Taten a diak in nu leh pa omdan a enton nuam mah mah uhi. Pai thei panten I khedap a bun nuam ua, ei pau dan hon zui in, ei kicheidan in a kichei nuam uh. Huaiziakin taten a nu leh pa uh Laisiangthou toh kituak a hing a, hon muh uh a poimoh mah mah. I theih ding ahoih leh poimoh mah mah tuh omdan hoih hi in hoih lou hitaleh naupang in i phok louh kal in honna zui zui uh ahi. Hong khan touh dung zui un hon muhdan uh hon zang tou pah uhi. Timohthi in Pathian thu a limsakna ziak kigen siak ding hileng api Loisia pan, a nu Eunisi a leng om, aman huaite niteng a a muh leh a zak a theih pente ahihman un aman leng huaimah hon zui mai ahi i chih chiat uh gintak huai hi. Timothi tuh a pi leh a nun hilhthoh mai lou in, a thuhilh ua a mau a ten man un Timothi in zuih nuamsa, huai dan a hong om ngal mai hiding hi. Kam a kithuhilhna pen a pimoh kei chihna hilou in, igenkhiak ma hen hinpih in huai mah ah teng leng zakmun leh muh munte a zuih baihlam zaw hi. Paunak ah “Sakhi api a san leh a nou leng a san” (Like father like son) chih ahi.
Toupan “Jerusalem aw hiai paunak ‘Tanu in a nu a sun’ chih nang toh kisai a min chi ding uh ahi…”(Ezek.16:44) I tate eisang in hong se zaw tale uh bang chituk in a se ding ua ? Juda kumpipa Abija in a pa khelhna a zui tou (1Kum.15:3). Israel leh Juda kumpite lak ah hichi bang a ta in a pa khelhna zui a kimu tam mah mah. Naupangten a pate uh hoihna sang in hoih louhna a zui nuam mah mah uh.Vualzawlna a leh tampi a pung ding a i deih bang in hoih louhna zong tampi mah a hong pung thei ahi mai mah hi. Papi zu dawn zeuh zeuh khat in amah kisiam tan na ding in a chang chang a zudawn poi lou ahi chih a tangkou ph nilouh leh a tate zungolvei ngen a hong suak mai mah uh a chi uh. Nu leh pa omdan in tate hinna supoi thei lawtel ahi. Paunak in “Naupangte tuh a nu leh pate uh lim” (shadow) ahi uh a chi uhi. I din tang leh i lim a tang dia, i kawi leh i lim a kawi ding.
Ei hih bang bang ei tung mah ah hong tung kik thei ahi. Isak leh Rebeka in a tate uh deihsak tuam a nei ua, Rebeka Jakob thuzoh in a pa Isak hon khem uhi. Jakob in ta a hon neih tak in, aman leng deihsak tuam hon nei nawn a,, a taten leng amah a khem nawn leu leu uhi(Gen 27 & 37). Thil hoihlou i chin leh i taten leng hon ching ding uh ahi chih thei ding ahi. Paunak mah ah “Na tuh bang bang na at ding” chih na om zel hi. Mi chitak, kuhkal leh taima, Laisiangthou sim lung lut, thummi, midangte Pathian thu hilh, saptuamte toh kithuah in khuam muanhuai in a pang ding uam ? I hinkhua uah i taten hon zuih ding ua deih huai i sak louh zongsat i nei kha hia ? I neih khak om leh kivel chian in tate itna ziakin kibawlpha ngam in, kibulpat thak ngam leng kisik huai het lou ding hi.
Himahleh kei hon gingta hiai mineute lak a khat leng hihpuk tuh, gawigawpna suang liantak a ngawng ah ok sak in, tuipi thuk tak ah khiak hileh amaha din a hoi zaw ding(Mt. 18:6). Tate nasem ding a sawl thoh sang in eisep pen sepkhawmpih leng hong siam bai zaw ding uhi. Insung nna, huan bawl, thilsia bawlhoih leh nasep dang dang sinsak ding tuh nu leh pa mohpuak ahi. Hoih leh hoih lou, khenkak theihna ding in i theihna zatmun a ngai a, huai ding genthoh hiam, zakthoh hiam sang in sepkhiat thoh te ah zuih a baihlam zaw hi. Tate kiang a thudik gen kia a huntawk kei a,a zuih theih ding ua etton tak a om lel leng a huntawk kei lai. Thil dik ahih ua a sin gige na ding ua, amau mah mah hihsak se se zong a phatuam mah mah hi. Hiai a I gennop tak ahihleh a etton ding ua om kia a huntawk kei a, thil hoih a zuih theihna ding ua, ei mah mah in leng a muntak a, a bulpat pih ding tuh i mohpuak hilai hi. Hiai bang a hihna peuh a etton tham ching ding, makaihtu muanhuai, sinsaktu lohching, min ei hih bang bang hon hih leuh selou ding ahi chih tan a pang thei chiat ding in Toupan nu leh pate, saptuam a heutu leh makaite hon vualzawl chiat ta hen.
