Thumna A Pathian Naihna

“Huchi’n nou zaw hichi bang in thum un: ‘Ka Pa uh van a om, na min ki zahtak hen.Na gam hongtung hen. Na deihlam van a a kihih bang in, lei ah leng kihih hen. Tuni’n ka nek khop uh an hon pia in. Ka batte uh hon ngaidam in, kou leng ka leibate uh ka ngaihdamtak bang un. Khemna ah hon pilut ke’n la, gilou lak ah hon hu zaw in, Gam leh thilhihtheihna leh thupina Tangtawn a nang a a hih ziak in, Amen’ chi’n.” Matt. 6:9-13

Kuahiam Pathian toh kinaih ahi chi a I chet theihna khat tuh, a thumna hinkhua ahi. Banah kuahiam thum peihlou hinapi Pathian toh kinaitak a om chih gingtak huailou hi. Thumna a poimoh mahmah a, ahihhang in a manphat dan a theizou loute bang in ka kingaihtuah hi. Thumna toh kisai genchetdan tuamtuam om a, himahleh tuni a dotna kon bawl nop ahihleh thumna ah kua/ bang poimohpen hiam chih ahi. A thumtu poimoh pen bang, ahihlouh leh i thumna point te poimohngaih pen in, I gen ut teng gen beisuk pah in zou pah chih bang baihlampi khat ahi. Himahleh thumna ah poimoh pen tuh I thumna Pa (Pathian) ahi. Thumna tuh Pathian kianga i toukaina ahihman in, Pathian deihdan zonna ahi chih leng i manghilh hetlouh ding ahi.

Thumna in bangteng huamkha hiam chih Toupa’n hon sinsak thumna pansan in saulou kikum leng uthuai ka sa hi.

1. Thumna tuh Pathian zahtakna/ thupina piakna ahi: I thum chianga Toupa pahtawi ding I hi chih kimanghilh louh ding ahi. Pathian thupina ngaihtuah khalou a thumna neih kichi baihlam mahmah khat hi ding in ka um hi. I thum chianga Toupa thupi na ngaihtuah ngeingei ding ahi.
2. Thumna tuh Toupa deihdan sepkhiakna ding ahi: I thumna te I etchiang in, ei deihdan Toupa sepkhiak sak sawm I bang uhi. Pathian deihdan ei tungtawn a sepkhiak hiam, ei hinkhua a sep a om dinga I kimanna leh lunggulhna puankhiakna ahih ding ahi.
3. Thumna tuh I kul leh poimohte I nget theihna hun ahi: Panpih ngailou leh panpihna poimoh lou mihing ki-omlou hi. Maingaltak a Toupa mai a, I kul leh poimohte I puankhiak theihna ahihman in thumna mihingte ading a poimoh lua hi.
4. Thumna tuh I khelhna puankhiak theihna dinga, hunlem ahi: Toupa mai a I hihna bangbanga kipulak poimoh mahmah hi. I hoihlouhna, I hatlouhna hon ngaihkhiaksaktu ding I neih hamphathuai lua ahi. Huaiziak a I hatlouh hun pen inleng, thumna tungtawn in Toupa’ zahngaihna Mangtutphah hangtak a, I naih theih man un kipahhuai mahmah hi.
5. Thumna tuh gingtute kihumbitna ahi: Melma Satan maituah ding in gingtute’n hatna kineilou hi. Khemna leh gitlouhna apan I bittheihna dinga, thumna tungtawn in Pathian kiangah kitai thei gige hi.

Thumna poimoh dan a theilou om dingin I kigingta kei hi. Himahleh thumna manphatna pen, a thummi / thum tamte’n theichian phet uh ahihman in, Thumna a Pathian naih ding in I kichial thakthak hi. Thugelh simtute, Amah naihseem in TOUPA’N honpi hen