Khovel ah nu tampi om in, nu manpha leng tampi mah om ding hi. Himahleh tuni a i gennop leh kikupnop pen bel “Pathian’ zat nu manpha” chih ahi. Hiai Pathian’ zat nupi in bang sem, bang chi om hiam chih Laisiangthou a i muh bangbang in sau lou genkhawm in kikum leng chi in k’ong kisa hi.
A TANCHIN: Zarephat khua a teng, pasal nei nawnlou, tapa khat nei, huai toh khosa. Gam pumpi khokhen ziak a nek ding piang lou, tuabang haksat hunlaitak a theih ngei louh pasal khat in tui dawn ding ngen, la di’a a kuan tak a tanghou neuchik bek hon tawi lechin chi zaw-mah lai hi. Himahleh ama’n Pathian hinna lou in ka gen hi, “Tanghou ka nei kei, bel ah tangbuang pham khat lel leh sathau tawmchik kia ka nei hi. Ngai in, ka pai chi’a ka tapa adi’a bawlna ding sing kang nih hiam lel ka tom a, huchi in ka ne ding ua ka simai ding uh” a chi hi. Dinmun dengdel leh lamet bei mahmah ahi uh.
ELIJAH in Meithainu kiang ah, “Lau ken, na gen bang in vahih in. Himahleh huai tanghou neuchik petmah hon bawlsak phot inla, huai hon tawi in, huai khit chiang in nang a ding leh na tapa a ding na bawl ding hi. Toupa, Israelte Pathian in hichi in a chi. Toupa’n leitung a vuah a hon zuksak masiah tangbuang bel a vuak tuan kei di’a, thawlsung a sathau leng a kang kei ding” a chi hi. Huchi in Elijah gen bang in a hih a; amah leh a innkuante leh Elijah toh ni tamtak a ne uhi. Elijah zang a, a gen Toupa thu bang in tangbuang bel a vuak tuan kei a, thawl a sathau leng a kang sam kei hi. Hiai meithainu ading in Jawlnei ngetna tuh man haksa mahmah mai leh kilawm tak ahi. Jawlnei in lah a ngetna lohching leh chih deih ahihman in nungkik het lou in a nget mah tolh lou in ngen hi. Jawlnei ngetna meithainu’n a mang a, a chih bang ngei in tanghou nek ding a va bawlsak a, a’ tapa leh amah a ding leng kiching tak in hong om a, hiai tuh Pathian gamtatna thil lamdang kipatna hong hita hi.Inn-neinu tapa a hong china a, hong gim mahmah in a nak (breath) ahong beita hi. Ama’n Elijah kiang ah, “Nang Pathian mi aw, ka tung a lungkimlouhna bang nei na hia ? Ka khelhna hon thei khesak ding leh ka tapa hon thahsak ding a hong pai nei ve maw!” a chi hi. Jawlnei in a kiang ah, “Na tapa honpia in” a chi hi. Huchi in a pomlai a la a, a omna dantan ah a pom tou a, a lupna ah a sial hi. Naupang tung ah thumvei khupboh in Toupa a sam a, huchi in naupang hinna amah sung ah hong om nawn a, a hong halh nawn ta hi. Elijah in a’ nu kiang ah a pia a, “En in na tapa a hing hi” a chi hi.
Pathian in Elija Kerit lui ah a koih a, va-ak (crow) in an a puak zel hi, himahleh lui a tui a hong kan tak in meithai inn ah a sawl leuleu hi. Mihau, nek-le-dawn, kiching tak a nei tampi om mahleh, Pathian in meithai zawngtak zang in A’ jawlnei A vak hi. Pathian’ nasepdan muh theih om tuh a jawlnei vak kawm meithaite’ nuta kem kawm leng a na hi maimah zaw hi. Tua meithainu’n a haksatnate gen kawma Pathianmi a zintunkhak man in khokhen sung teng a’ tapa leh a’ zinpa toh nek ding zong a buai lou lah tasam het lou in Pathian in a koih hi. Khat veivei i buai leh taksap khawng paulam a zang in Pathian deihdan I na sem kha kei ding chih leh Pathianmi khong zindou kha lou in i om kha ding chih kivel tuak mahmah ahi. Pathian mizatte a thupi pente hilou ahihman in theih khelh khak ding lauhuai lua hi. A theikhen thei ding in, khalam mitvakna leh khalam pilna Toupa’n hon pechiatta hen!
I neihsate mah zang in Pathian in hon vualzawl – Hiai meithainu a neih ngei louhpi piak beh ahi kei a, a neihsa tangbuang leh sathau hihpung sak ahizaw hi. Hiai leng a lom in a pe kei a, a kepna ding buaihuai lou in, niteng a poimoh zah ua pia in kidaih lou in leng a pekei hi. Mosi leng a belamchinna’ chiang mah zang in tuipisan a sat sak a, suangpi apan tui a pawt sak hi. Huchimah bang in David leng a thaipek zatsiamsa mah zang in Goliath, Philistiante galhangpa, milian minthang Saul sepaihte taikek sak zelpa haksa het lou in Pathian in a thatsak mai hi. Nang leng na neihsa thupi na sak hetlouh, na khituite zang in Pathian in thil thupitak hon zohpih thei ahi chih muang in tua ding in Pathian in hon vualzawl chiat hen!
