Khovel in ahih bang hilou, Khristiante kivaidawnna tuh dawn a omte a ding in a khamuan huai, navak huai,ka sa hi. Theih louhte kisinsakna, kimakaihna leh thil tuah pah dingte kikokmuhna masa ahihman in. Saptuam heutu, khotang heutu, siamsinpawlpi a makaite leh mipoimoh tuam tuamte pulakna hun lemtang, huaite a ding a leng melthakte toh kimuhna hun manpha hong hizaw ahi.
HONG TUNG THAKTE A DIA THEIH TUAK: Munthak a lut ding, lawm thak leh inveng thak toh khosa ding ihihtak man in hon thei nailoute kiang ah mahni kipulak a ngaih hun tampi hong om ding hi. Saptuam in chindan a i neih uh “Khualtam lai” hiam, “Pemlai” hiam i poimoh ding pen geih i kipatna saptuam apan la in, i kipiakna ding/ i belh ding saptuam ah pelut pah thei leng hoih mah mah ding hi. Ei leh ei kam a va kigen nilouh ngai lou a, i dinmun leh hihna bang bang huai lai a kigelh saptuam in na record thei pah ding uh ahihman in. Studentte a ding in Siamsinpawlpi heutute toh zong ki mel theih tup ding, ikaina ding, School, College leh University leh i sin ding pen bang leng a lemtan leh theihsak ding. Tenna ding veng, building/Apartment leh a dang dang kitheih pih theihna ding a kihilh ding. Saptuam in Upa bial bang, Prayer Cell bang, BYF leh BDF in leng area ah group heutute zang a kikepna om tiltel hi. Hiaite cover khak louh a om i tup het louh ding uh ahi. Buaina haksa tuah hun bang, nopna leh kipahna ituah hun a ngaih mah mah dingte ngen ahih ziak un. Mi hong zonkhiak ngak lou in, telna ding a kilawm pawlpite ah va kikhum lut pah pah leng teina leh kizenna hizaw hi. Nang sep theih, nang siamlam midangte a ding, pawlpi a ding a hong kizang pah ding in zong hon kideih hi. La siam, Music siam, Limlaksiam, Sound lam siam leh kizat theihna khat peuh a omsate toh pang khawm a nong kizat pah theih leh nang a ding a zong hoih ding hi. I siam lam leh sep theih lam chiat i thoh khawm chiang buching suak thei ihi. Kei hiai lam ka lunglutna ahi a ka pan theihna om diam ? chi a intek tak a kizat pah tuh omdan hoih leh gamtat kilawm tak leng ahi zaw tham hi.
ANA OMSATE A DIA THEIH TUAK: Eimite, kei le tel a i siam kim nai louh uh melthak houpih, vaidawn leh lawm bawl ahi. A gal a ki en mualliam maimah lou in “ Hi nong dam maw ? kei ka min,hiai ahi, hiai nasem in, huai veng ah ka na om a” chi leh a dang poimoh theih tuakte kipulak in, nang koi a hong kipan, bang lam toh kisai a hiai san hong tung ? chih khong toh hun masa zou leng leng, a nawn ading hong nuam pah mai ding hi. Khatvei kimuh khong a zaw mi leng kithei tak tak lou, a nung a kimangngilh nawn pah mai ahi. Ki dong zel ding, I hong kimuh mun chiang leh kithuah mun chiang a kitheichian mai ding i hi uh. I tun tung a zaw mihong kipulak chiat mah le uh a lom a kichiamteh zou het lou, a nung a awl a, kitheih dan hong om mai ahi. A kallak in zaw nna leh buaipih nei chiat ihi ua, Pathianni teng bek in Biakin ah kimu zel leng kithei pah ding ihi uh. Iki theih hoih pihte mah kingai thei pan, ki-it thei pan ihi uh. Kithei chian ngellou kingai lua chih om khollou hi.
I THEIH KHAWM DING UA HOIH: Mi i theih dan leh i muhdan masa khawngte a hoih lam ahih khol kei leh, a poimoh na om hial ahih kei leh gen louh hoih zaw hi. Nidang a mihoih khol loute tua hong hoih bang, nidang a mi genthei leh haksate hong khosuah ualeh kipah huai. Hun paisa a itan gen uthuai loute peuh kigenkhum kuaman nuam salou hi. Siatna tampi neite ngen himahleng hoihna khat leh nih i neihte min hon genpih chiang a nuam kisa, a gentute nangawn ngaih huai kisa hi. Inkuan thu, nupa kal, nekzonna, sep leh bawl ah tha kipetuah in kisuhat tuah leng kidom sang vekmai ding hihang. Sum leh pai, tha leh zung senna hihet lou kampau a kipanpih theih leh kitun ding theih luat ahi. Tuate zang siam leng inkuan dam ding, khotang dam ding saptuam khang ding Pathian khasiangthou i lak uah intek tak hong om in halhna thupitak hong tung ding hi.
