Missions Nna Septheihna Mun Thumte

Nou, buhlakna ding kha li a omlai na chi uh hilou hia? Ngai un ka hon hilh ahi, dak unla lou khawng en un, tu mah mah in lak ding in a min ahi(Jn.4:35).

Pathian in a nasem ding in a hon sam ngei hia? Koimun a sem ding leh bang chi sep ding a hon sam hi’n na thei a? Pathian in nna a hau mahmah a, huaite a sepdan a kibang vek kei, a mun leh mual leng tuampi pi ahi mai thei. Nang pan khakna koisan mun leh bang lam hi in na ngaih tuah a? Nang sepna pen neusa in na hom thoh ngei hia? Na thupitak sem dingte neuchk leh mawltak a kipante khawng na hizaw uh ahi. Pathian gam nasep theihna mun tampi omte a lom lom in seh thum suah in saulou lou in kikum leng:

1. INMUN A MAHNI MITE LAK A SEPNA (Home Missions) Hiai tuh i tenna khosung a tenpih i chi leh namte lak a sepna chi in gen leng. Hiai nasepna ah tuh thil i neihsa, i theihsa leh i muh muh sate mah lou adang poimoh a tam kei. Pau leh ham, nek leh dawn, gamtat khohei kibatpih leh chindan tawndan kibat pihte lak ahihman in ziltawm ngai om lou chih theih hi. Inmun a mahni mite lak a nasep theih hamphat huai lua ahihlam phok in, a neu lua omsak lou in i hihtheih bang bang i om mun ah sem chiat leng maw.
2. I GAMSUNG A NAMDANGTE LAK AH (In land Cross-cultural Missions) Ei tenna gam ahihhang a ei chi leh nam hiloute lak a nasepna. Hiai ah bel theih ding leh phok ding hunkhop om ding hi. Huaiziak in zil masak ding, sin masak ding, siam masak ding leh theih ngei ngei ding a poimoh hun khop om ding hi. Ahihhang a’ a haksat luat louhna ding bel itenna gam kibang, dan leh dun kibang, kumpi leh thunei, vaihawmtu kibang ahihman in gamdang toh teh in nuam zaw deuh ding hi. Theih ding a poimoh tampi mah om ding, banah a hun hun a mite’ hon theih siam ding leh hon pom theih uh hihkul ding hi. Pathian pen a nna neitu, a thu neitu, huai nasem ding a hon samtu, hon sawltu, semtak hiding a hon chingsaktu ahihlam mangngilh ngei louh ding a thupi pen hi.
3. GAMDANG A NAMDANGTE LAK AH (International Cross-Cultural Missions). Hiai pen a gam leh a sung a teng mite zong i muh ngei, i theih ngei hilou. A chindan leh tawndan uh, a gamtat khohei uh, a nek dan dawn dan uh leh a kivaipuak dan uh i theih nai louh namte lak a nasepna chihna hi. Thil tampi ah kilamdanna zong om kha ding a, himahleh mihing hihna ah kibatpih lianpen tuh eite mah bang a Pathian siam leh Pathian it te, Jesu sisan manpha a tatte ahi uh. Gamdang a nam dangte lak a sep ding dan toh kisai ah bel pau leh ham kisin tawm ngai ding, a gam kumpi ki-ukdan leh kivaipuak dan tangpi zong theih zek ngai ding, mite gamtat khohei zong khodak masak zek kul ding hi. Tuabang ahihman in Pathian Khasiangthou pina makaihna leh ompihna banah laipilna zong neih kul chihna hi.
   

Hiai thumte ah a vek a na pan theihna chi thum mah om nawn hi. Tuate – Na taksa mah mah va kuan a, a sem tu in na pang thei hi. A nihna ah na taksa va kuan a, a semtu a na pan theih louhna mun ah zong a kuante poimoh, sum leh pai banah a van guantu in leng na pang thei hi. A khatna leh nihnate a na pan theih louh lai in leng lung lel lungkia in om ken, na inmun ah thumtu in na pang thei hi. Hiai teng thum a lian zaw tuam, a neu zaw tuam om kei, na lem tan theih leh khatna, nihna leh thumna ah zong na pang vek thei, nihna leh thumna ah zong na pang thei, thumna kia a na pan theih leh leng khat bek a pan khak louh sang in nakpi in manpha zaw tham tham lai hi. Khat leh nih bek a pang thei ngei ding in buhnei pan hon vualzawl hen.