“Na Puaninn mun kek in, na omnate puaninn tung kaipalh in, chil ke’n: na khaute sausak inla, na kaihgakna khette kipsak in” Isai 54:2
Isai 54:1 ah Israael, ta neilou, a chiing toh kibang in Pathian in tehkhin hi. Israel, nupi nau neilou a, lungkham leh dah a om bang himahleh TOUPA’N A’ thilhihtheihna leh A’ hehpihna toh ta tampi piak sawm hi. Huai omdan tak tuh Jerusalem hun khat lai a, loih (desolate) leh suun (mourn) a om, halhthaksak nawn (revitalize) leh gahsuang (teeming) ding a vualzawl nuam ahi. Huaiziaka Israel, chiing numei banga om in, ta tampi neita ding ahihman in, a puaninn kek ngai a, chiil lou hial a, a tung kaihpalh ngai a, a kaihgakna khette kipsak ding in hilh hi. TOUPA’N Israelte vualzawl nuam ahihman in, ahih ding uh pia hi. EBCC Delhi Saptuam, TOUPA’N a hon ompih chih kilatna tuh sep ding honpe zel hi. Awl luatna khawng vualzawlna hi zaw lou in, sep ding I neih khawng vualzawlna ana hizaw thamtham hi.
EBCC Delhi in leng khalam gam kek sawm in, 2019 kum in Nilaini Biakna Biakna kikhop, kha khat a 1vei zel neih, biakinn mun ah na kipan hi. Covid hiipi ziak in khawlsak in om [May 22, 2019 akipan pen Feb 26, 2020 tan kisunzom]. TOUPA’N poimoh salou hileh khawlsuak ding in ka gingta hi. Himahleh, TOUPA’N hiai tungtawna A’ sep nop om ahi ding a; 13 July, 2022 (Nilaini) in mipi 90 vel paikhawm in, unau PCI(R) chapel, Munirka ah pat nawn in om hi. Kha khat a 2vei – Nilaini 2na leh 4na zel a kikhopna neih di’n. Hiai biakna kikhop tungtawn a mi tamsem I suk khak a, tamsem in TOUPA a naih theihna ding ua kong honsak ding I tup ahihman in, EBCC Delhi adi’a TOUPA’ nasepna (ministry) poimoh tak suak hi.
Thakhat thu in I sukkhak nop teng hongtel noinoi pah hial lou ding uhi. Hun bangtan hiam la lai ding hi. I Pathian kinoh hiam, zekai ngeilou hi a, a hunhun a gamtang ahihman in hipah hehu khollou kha thei hi. Himahleh ei a paikhawm mite pangbel in, awl a hong kihenlut ding uh lametna ka nei hi. Aziak bel TOUPA’N eite hon zangnuam hive’n. Haleuijah! Huan, ei kia tuah hilou, pau I kinaihpih Spatuam pawl tuamtuamte’n le a tuah uh tuh Nipini a suti neilou member-te ahi. EBCC Delhi midangte ading a vualzawlna I hihtheihna lampi ahihman in, amaute ading inleng kong zatak in I hong hi. Delhi ah EBCC, TOUPA’N hon phutkip nasan, hiai bangte khawng ei tungtawn a sep ding adeih ziak ahi dia aw ka chi vungvung sek hi. Huan, Nipini suti neih louh man hi seselou in, Biakinn mun bangziak hiam a naihzou loute leng sukkhak ngei ka lamen hi.
Maban a pau I kibatpih hetlouhte ading in leng kong honsak I ut mahmah hi. Tua I seplel ginomtak in sem peuhmah le’ng, TOUPA’N I nasep ding (puanbuk) keklian mai ding hi. Nilaini biakna kikhop, tu-le-tu a TOUPA’N A’ gam nasepna di’a honpiak ahihman in thanuam tak in paikhawm chiat ni. TOUPA’N mimal paikhawmte hongpolh banah hon zanglai ding hi. “Pathian a phat ua, miteng teng deihsak in a om uhi. Huan a hotdam lel peuhmah TOUPA’N niteng in a kiang ua a behlap sak zel hi” (Nas. 2:47). TOUPA’N hon vualzawl chiat hen!
