Tangtawn Pathian taang a hon panpih, machiang i lamet uh, tuchiang dong a hon pitu thupina pahtawina I pia uhi.
Tuchiang dong honpi i chih lai in, suttham leh suttuak mahmah hiai ahi - koi apan koitan hon tun ahia? Chi 4 a khen in suizek le..
1. Delhi ah Milip Pung: 1990 malam in sorkar a sepna nei khutzung kuaih theih leh sinlai tam louchik petmah i hi uhi. 1990 kum a India phualpi sorkar in Mandal Commision report a hon zuih ziak in semtu ding lakna ah namniamte a ding hamphatna kong lianzawsem hong kihong a, tamtak i lut kha uhi. Himahleh 1998 kum apan 6th Central Pay Commission hong kizat chiang in semtu suktawm ding chih hong kihah bawl a, sepna thak mu kikiam giaigiai hi .Huchih lai in, Manipur tanggam a singtangmite, adiak in Kuki leh Naga kal ah kitheihsiam louhna 1992 vel apan hong uang in Kuki leh Zomi kikal 1997 in hon peh hi. Tua in tuailai tampi septheih-sintheih a om bangbang hih ding in Delhi ah hon sawllut hi. Tuatoh kiton in India sorkar in 1991 apan economic policy thak, liberalization, privatization leh tua toh kizui a globalization ana pat uh gahsuah in private company tuamtuam ah sep ding tamtak hong piangkhia hi. Hiai hun tan ah, private a sem chih chiang in dawr leh hotel ngak khawng lel sepna ahi tangpi a, himahleh hiai economic policy thak nuai ah kong tuamtuam hong kihong a, Call Centre leh BPO chi a i theihmai sepna khawng ah tamtak lutthei in I om uhi.
Tua nung in professional line ah, adiak in Nursing profession tungtawn in tamtak hon pilut nawn hi. Tu in government hi in private hospital poimoh deuh teng ah ki-omsuak a, Delhi a om EBCC saptuam 2-te apan in nurse 200 val bang omdia hisap ahi hi. Huchi kal ah, adiak in Covid19 hipi len nungsiah, inlam a lehkik hun hong kipan hi. Online a semte a ding in Delhi a om kawm a sep leh Lamka a om kawm a sep a kibang hi a, khosak man (cost of living) kikhe lua ahihman in kikna takmah ahi hi. Tuaban ah govt a semte leng pension om panpanta in amaute lak a khenkhat in hon kiksanta uh a, maban ah pension pah ding hun khop omlai hi. Atung a kigente a lom deuh a i khanna uh leh kiamna uh ahi hi. Delhi bel mun poimoh ahihman in, ziak tuamtuam hang a hong paithak tawlnga lou in kinei hi. Milip a et in, nidang bang in pung hulhul kei mah lehang pung veve lai hi hang.
2. Toupan Dohkan ana Bawlkhol: David in “ka ma ah dohkan na bawlkhol a” a chih bang in, Pathian in eite’ dohkan ding bawltawm lou in bawlkhol ana hi reng hi, chih muhtheih ahihna ziak 2 kia gen le. Khatna ah, namkal buaina ziak a Delhi a alom-alom a i lutma in Pathian in Mandal commission report khazap in, milip nakpitak in honna pungsak khinta hi. Ana tung masate toh bang chichi hiam a kitanauna-kizopna zongkhia in belhtheih-belhmoh a kitunkhum in i kizintun uhi. Nihna ah, nekzonna haksat ziak a kuankhete’ a ding in, tungmawk in sep ding om kei leh Delhi a om det vual ahi kei ding hi. Himahleh Pathian in India Sorkar’ Economic Policy 1991 dungzui in mi tamtak sepna ding kong thak a honna hon sak khinta hi.
3. Mun-le-mual a Thopna: Toupan amite’ salam khosakna ding ngaihtuah a dohkan na bawlkhol ahi I chih lai in khalam thil a kipawl khawmna ding vai ah leng Amah makaihna khutnung mit in muh theih hi. Biakkhawmna ding in Zomi Christian Fellowship kichi 1988 in dingkhesak a, Lamka lam suak pau-le-ham kitheituahte’ a ding in Delhi a mother church ahi hi. Tuanung in, milip kibehlap touh zel toh kiton in kikhopna tuamtuam hon dinkhe tiltel a, tu in EBC a kiminloh kia leng mun 2 a kikhawm thei in hon koih hi.
Phungvuhna tungtuan tang in Biakin mun ding sorkar apan piak in ki-om hi. Atunglai in gamla lua leh a naihna lampi mah leng haksa kisa mahleh lamdang tak in Pathian in sorkar a thuneitute’ lungtang ah, saptuam mite’ nget leh ngaihtuah sang tham a thupizaw a na sem in, railway-track a koltan gige ngai lou ding in flyover lianpi leh sau tak mai bawlkhiak in om a, tua kia leng hilou in biakin apan 0.5 km lel khawng a gamla ah metro station hon koihsak lai hi. Selah!
Public transport a hoih semsem lai in, mimal a gari kineih seseuh ding zah in saptuam mi tamtakten phungvuhna kitang nalai hi. Tenna vai ah, kum 2000 malam in Munirka khawng i phualpi uh ahi hi, thil bang peuh saita leng a saina mun ahih ban ah a saitu mite hiai vengsung a inluah a khosa kitampen ahihman in. Tuchiang in Pathian in sorkar quarter, adiak in RK Puram ah, tamtak hon tuahlutta hi. Phetlou in, biakin kimnai ah, adiak in Mahavir Enclave leh Bengali Colony khawng ah, mimal a intum suang thei ding a Pathian vualzawlna tang tamtak ki-omta hi. Biakin zotna a baihlam semsem toh kiton in a kiangnai a mi i punzel ziak in biakin bang leng naisuak mahmahta hi.
4. Saptuam a Thopna: Lam chi tuamtuam ah Pathian in saptuam mite hon thuam a. Siamna leh lunglutna a piak saptuam mite’ lungsim ah kipiakzohna thupitak guan lai ahihman in tha-le-zung tampi seng ding in mimal ban ah inkuan a kimanna pia a, mimal lemtan louhna chihte Jesu’ khros bang a ngai a pua in, Pathian gam nasepna ah akha asim chih leng hilou a kum a sim in kalsuan uhi.
Pathian phatkhawmna nuamtak a nei thei ding in la lam a siamna neite, tumging lam a siamna neite a hon piak chihkia hilou in, tua ding a kipiakna nei – kikhawm kuan baih, pai hak khawk sa lou leh kiginni khawng a tha-le-zung seng kizir khol nuam mite, a hon pelai hi.
Covid19 hipi leng ziak in March 2020 – Feb 2022 kikal bang a vangkim in biakin a paikhawm a kikhopna om thei kei mahleh Media tungtawn in biakkhawmna kinei thei veve a, muhtheih kongkhak (physical door) kikhak mah leh digital kongkhak honsak in i om uhi.
Khovel pumpi huam in, sun e zan e chih khen lou in biakin a thugente kingaikhe thei ahihman in, gamgi nei lou leh mihing’ hunbi in a gak khak louh Pathian, biaktak ahihna hiai Media nasepna in taklang mahmah hi.
Jesun mipi 5000 te tanghou phel 5 leh ngasa 2 in vakvah a, mipi 4000 te tanghou phel 7 leh ngasa tawmchik in vakvah hi. Ahihpungtu Jesu ahih lai in tua punsak a om nek dingte mipite’ khut a nekbat ding a hawmkhetu a nungzuite ahi uhi.
Hiai hun a nungzuite’ nasep pen tulai a saptuam’ media teamte’ nasep toh kibatna chiang om hi. Biakin a thu kigen leh thil kihihte, media team om lou hileh, kikhawmte chauh (mi 350 tan khawng) in kimu in kiza thei ding hi. Himahleh media teamte’ nasep tungtawn in hiaite kepbit leh hawmzak in om a, sanggamnu Jolene in Nute Ni a sharing bang mipi 2.24 lakh valten en/ngaikheta uhi.
Bang Ziak a Toupan Hon pi?
Milip a i pun a, neih-le-lam ban ah hihtheihna leh siamna tuamtuam a thopna i tan uh, bang a zat ding ahia? Bang ding a tuazahta a thop a om I hia?
Jesu leh a nungzuite’ thiltuah gen masa phot le
Jesun a nungzui ding a Peter leh a lawmte a sap dek lai in, amaute zan khovak in len deng in a om uhi. Himahleh a lohsam uhi. Ngamanmi ahi ua, a nek zonna uh ngamat ahi a, nga’ tamna mun leh a mat hun ding chihte a thei lou ahi het kei uhi. Hilele tua zan in bel lohsam uhi.
Tua laitak in Toupa Jesu va kilak a, lithuk lam a len pai ding in va hilh hi. Peter leh a lawmten zankhovak a hihkhin a lohsamsa ahi uh chih gen kawmkawm in Toupa Jesu’ thugen a mang uh a, lohching in ngasa tamtak long 2 dimzen a puak ding, a mat loh uhi. (Lk 5: 1-10)
Tua bang mah in, Jesu a thohnawn nung a van a kahtouhma in tung nawn hi. Hiai hun ah leng nungzuiten zankhovak in len deng mah le uh lohsam uhi. Jesun phalvak in longsik taklam a len deng ding in va hilh a, nungzuiten tua thu mang ua, ngasa lian pipi 153 a man uhi. (John 21: 1 – 11)
Nungzuiten ngasa tampi aman uh chih thukipahhuai himah leh a tawpna ahi kei. Hiai thiltung – lohchinna – pansan in nungzuite leh a diak in Peter in kitelsem a Toupa Jesu theihna leh tua toh kiton a amah kimuh chianna a neih loh hi. Tuamah Pathian’ deihna (purpose) ahi. Pathian apan vualzawlna – siamna leh hihtheihna bang, neih-le-lam bang, Pathian’ deihlam sepna ding a thopna ahi hi.
Leitung thil a lohchinnate pen a tawpna (objective/goal) hilou a, a kalbi lel ahi. Atawpna ding bel Toupa’ muanhuaina tamsem theihbehna, tua dungzui a Amah deihdan zong a Amah ginna a kalsuan a, Amah toh naisem a a kithuahna tungtawn a Amah deihlam sepkhiak ding ahi hi.
Amah deihlam nasep i chihchiang in tangthupha puanzakna ahi hi.
Delhi khopi i tunna san uh nekzonna baihlamzaw hiam siamsinna sangzaw delh ziak chih lel ahih louh a, Pathian’ vualzawlna i tante uh en a zarzou a tutpih maimah ding hilou a, Pathian’ lungtup sepsuahna ding a vanzat ding a thopna ahi uhi.
Maban a Kalsuanna Ding
I gam a Pathian thu hong lutna kum 110 val ahita. Khoheidan, nekzonna leh khosakna himhim ah nakpitak a hamphatna hon tun a, a zarzou mahmahte i hi. Ahihleh tua Pathian thu bang i loh a?
Jesun Gadara mi dawininpai a hihdam a. Dawininte vok sung a lut ding in a phal a, ava lut ngei ua, vokte dil lam manoh a tai in a tuaklut ua, tuihak in a sivek uhi. Hiai a dawininpai’ damnawnna thupha leh vokte’ manthatna mit a mu Gadara miten Jesu tuh a gam ua pan “pawt ding in” a ngen uhi. Jesu’ thilhih thupi mu khalou a sawlkhia ahi kei ua, thillamdang mu gegu a sawlkhia ahi uhi.
Gadara mite bang a Pathian thu i gam apan pawt ding a sawlsawlkha i hikha ding uh e, kivel ni.
Zing thou phet a, mobile phone velmasa pah. Sun hun leh nitak lupnung a ihmutma tan a velvel mai. Pathian thu kigelhna Bible sim sang a social media khoih ding telzaw. Hiai bang gamtatdan in Gadara mite bang a deihtelna a Pathian thu nawlkhin toutou i hi kha ding. Gadara miten khatvei deihtelna a bawlkhelh lai un, eilawi in Pathian’ hoihna zarzou kawmkawm a nisim a Pathian thu nawlkhin ngitnget i hi kei uh maw? “Ka hinna kon pia, Toupa, Nang adin sehtuam hi hen; Ka hunte, nite kon pia, Phatna tawplou-in luang hen” chihtheih a uthuai ngei e maw!
Ni a hong suak a, a hong tum a. A hong suak zel in a tum zel hi. Ahi ding mah a koih in i ngeinaseh maimah. Pathian in ‘vak om hen’ a chih tungtawn in sun leh zan a bawl hi. Tuaman in zing nisuak leh nitum i chihte khawng leng Pathian’ thugen bang a tangtung taktak mah ahi chih taklatna ahi. “Zing khovak in na thupina puang, Sun nisan’ na vangletna” chi a laphuaktu in a phuah bang a niteng hinkhua a thiltungte a Pathian’ khutnung-khutma, a thilhih theihna leh muanhuaina khawng muhtheih gige a uthuai ngei maw!
Pathian om ahi chih i gingta in i thei uhi. Om ahi chihkia hilou in, mun teng a om, bangkim thei ahi chih I gintakdan uh ahi zomah lai hi. I ngaihtuah leh lunggelte, kampau, omdan leh thilhih tuamtuamte tanpha hon thunun leh thuzoh ding tan a Pathian om ahi chih phawk a “Ka deihtelna Nang kon pia, Kei a hi nawn lou ding hi’ng; Ka lung kon pia, Nang a sa, Na mangtutphah hi ding in” chihsam theih a uthuai ngei maw!
Pathian in a zahngaihna thupitak ziak in hon kem a, a itna thupitak ziak in salam leh khalam ah vualzawlna hon vuk a, salam vualzawlna bang houh Delhi saptuamte a tangtam diak I hi uhi. Tua ahih lai in, hiai vualzawlnate pen ei’ tung a hong tun a tawpna himawk lou a, a pesawn-paisawn sakte hih ding mohpuakna toh tonkhawm ahi chih phawkthak a, “Ka sum leh paite kon pia, Paisa san khat zong it ke’ng; Ka lungsim kon pia, zang in, A hatna Na deih bang in” chihsam theih a uthuai ngei maw!
Israelten Jordan lui kan khin a, melmate zou a Kanan gam akihawm khit un Joshua in “kei leh ka inkuantenzaw Toupa nna ahi ka sep ding uh” chi in deihtelna zang a thupukna a puangkhia hi. Tuni a EBCC Delhi kum 30 chinna ziak a kipahthu genna hun I zatna tungtawn in, saptuam mi kuapeuh in “Kei leh ka inkuanten zaw Toupa’ nna ahi ka sep ding uh” chi a kipiakthakna neithei lehang deihhuai I sa mahmah ahi.
Tua ding in Toupan hon makaih in hon ompih chiat hen aw!
