Kum teng a i zat zelzel uh Pate’ ni a hong tung nawn a, dam a mulaite leh pa’ dampih lai tate hampha. Pate’ ni a pa chi a sap ding nei nawnloute leng leitung pate sang a muanhuai zaw Pathian neite i hihman un lungmuan huai hi. Pate’ ni ah bang chi om leng kilawm leh mapha ding hiam ?
PATE’NI AH PATEN: Kum khat a ni 365 om lak a ni khat ei min a om kha kipahhuai lua hi. Bang gen in bang chi om leng hoih pen ding hiam? Zite leh tate kiang ah bang thugen leng inkuan adia phatuam pen ding hiam?. Sep tuak i sep khak louh, gentuak i gen khak louh leh hohna tuak i hoh khak louhna i phak khak louhna om hiam chih sut in kivel ni. Pa’ sep dia kilawm hetlou sep khak bang, pa gen dia kilawm hetlou gen khak bang leh pa pen hohna dia kilawm hetlou mun khong a muh khak a om gige khong i hi hia chih zong kivel ni. Zi leh tate milak a zahlak leh mualphou tak a koih kha in i om ngei hia? tawp san ni. Nungak-tangvalte a dia nuamlou, mi nupa kal khong subuai leh mahni insung kep ding ngaihsak lou a pa pen pangkha i hihleh tukum pate ni a’ pa hoih, inkuan adia kemtu muanhuai, ittu, deihsaktu leh makaihtu hoih leh manpha hiding in kipan thak ni.
PATE’ NI AH NUTEN: Nuten pate tan ding a kilawm, a phutawk chiang uh i piak khak louhna leh zah ding zah a i zah khak louhna om zenzen leh kum nawn ngak sese lou in, tukum Pate’ ni ah “Maizen !!! U Thang, ka hih ding hih khalou nilouh ka na hi, na hon ngaidam thei diam?” chi’n ngaihdam ngen leng itna toh hon kitenpih paten hon ngaidam thei lawtel ding uhi. Tuamah bang in it ding, zahtak ding, thuman ding leh pa a hihna bang tak a om theihna dia panpihtu leh tung ding tu hiding in tukum Pate’ni ah thupukna thak la in thil hoihlou tawpsan tuakte tawpsan in thilhoih pat thak ngaite kipatthakna ni hisak chiat ni. Kum nawn Pate’ ni i zang khawm lai ding chih kuaman gen ngamlou i hihman un hun lemtang mok beisak kei ni. Kibawl thakna ding, kilep thakna ding, thathak lakna ding deihna toh kum teng a hiai ni poimohte zat a om sek ahi, phattuampih sawm chiat ni maw.
PATE’ NI AH TATEN: Na pa theih gigena suangphuh a na gelh thu hoih thuphate, na kamsiam leh na kam nemte na pan sim kha nawnlou ding ahi chih thei inla, tu hon dampih lai mah in na itna, na deihsakna, na nekngaih dan leh nang hon suangtu a hihna a zak ding in gen inla, a muh ding in lang sak in. Thil khenkhat na utluat, na deih luat leh na duh luat na pan hon hihsak louhte ziak in na pa mudah het ken, na pan nang a ding a hoih ding nang sang a thei zaw thamtham a hihman a hon hih saklou ahi. Tua na phok khiak nai louhte zong a hon sihsan nung chiang in phok khe thak lai ding hiteh. Na zi hon it mahmah na chih zong kikhen le uh chin court a hon hek a hehpihna tellou a Jail bang hon zutsak ding hithei hi. Na pa tung ah na gamtat hoih hetkei leh zong na pan hon it lai veve ding a’ a khitui naptui toh “Ka ta aw, ka it mahmah ka ta aw” hon chichi lai ding hi. Tu chiangchiang na pa tung ah omdan gamtat, sep leh bawl, gen leh sak na khelhna om zenzen leh ngaihdam ngen in thupha tawi inla tukum pate’ ni nou pata kal a ding in chiamteh tham ni manpha, hamsia tengteng beina leh vualzawlna kipatna ni hisak inla malam nawt in, thil manpha tang di na hi.
TUKUM PATE’ NI AH: Kumdang leh nidang a’ leng Pate a na om gige uh ahi, hon sihsan nailou teng. Tukum a ding a PATE’ NI tuni ahi, bang ziak a kumteng a hiai zang sek i hiam chih na ngaihtuah ngei hia? Kuapeuh inkuan sung mi a khial thei ngen i hihman un, khelhnate thupha kitawi tuahna ni, kingaihdamna ni, kilem loute kilemna ni ding in tukum Pate’ ni zang chiat ni. Silh-le-ten, sum-le-pai, suang mantam zungbuhte, dangka-eng bilbah leh khite i kipiak zohlouh man in lung lel kei ni. Huai tengteng sang a manpha zaw na kam apan “Pa kon it lua, pa kon ngai lua” chi lel lechin leng na pa kipak lua in khase zaw zen kha ding hi. Tukum Pate’ ni ah inkuan chih in i pate chiat uh a tan ding ua kilawm pa hihna ziak a zahna, itna, deihsakna leh pahtawina pe thei chiat di’n Toupan hon vualzawl hen.
