THUPATNA:- Pathian leh mihingte kal ah kizopna chidam leh khantou om theihna ding in mihingte hih ding, Pathian hih ding chih om chiat hi. Tukum a i thupi ua i muh bang un Pathian toh kal a kinaih tuahna dan ah bel ei mihingten Pathian i naih ding uh himasa phot hi. Tua zoh chiang a Pathian in ei hon naih ding chih dan ahi. Tuni a i gennop tuh “Naupan lai a Pathian naihna” chih ahih man in naupang in Pathian a naih theihna ding a panpihtu leh makaihtu poimohna leng gen leng chi i hi:
NAUPANG IN PATHIAN A NAIHNA DING IN: Naupang in a mah a Pathian a naih theih nai louh man in panpihtu ding poimoh hi. Hiai panpihtu hihna leh panpihna nna tuh ahun toh kituak in panpihtu mi tuam tuam poimoh hi. Panpihtu hithei leh panpih thei mi tampite lak a pan tam lou gen ni:
NU LEH PA:- Naupang in Pathian a naihna ding a kok muhtu, a lampi mah mah a tonpihtu leh makaihtu ding pen tuh nu leh pa ahi. Naumin phuahni in bial upa bang sam in naumin Pathian khut a latna leh saptuamte record a gelhlut dia piakna tuh nu leh pa vaihawm ngai ahi. Khristian naulatnate naungek in a sawm hilou in nu leh pa panlakna mah hinawn hi. Hiai tuh naupang Pathian kiang a pina, Pathian naihna lampi masa pen ahi. Nu tam loute gen ka zak a lung hon khoih mah mah tuh “Nau nawi ka piak chiang in Pathian kiang ah ka thumsak zel” a chih uh ahi. A lianten leng an i nek dek chiang ua thumna bang nei zel ihihman un naungek an ipiak ding chiang in leng thumna bang nei zel leng hoih mah mah ding hi. Naungek chidamna ding, khan hoihna ding a hon vualzawl thei Pathian ahihman in. Naungek ihmusak ding a i oih chiang bang in, Pathian la mah toh awi leng huai leng Pathian naihna chi khat hipah ding hi. A hong let chiang a leng mangngilh nawn lou ding hi. Inkuan biakna banah, Pathian thu leh la kisinsaknate tuh naupangte Pathian lam a pina, makaihna leh Pathian biak didan sinsakna, i chih teng teng te uh zong Pathian naihna hipah vek mai uhi. Niteng a a dontu, zan nangawn a, a luppihtu nu leh paten tate Pathian naih pih i nna pi uh ahi.
NAUPANGPAWL NIPI SKUL: Hiai tuh a lawmpi a naupang kum 18 nuailamte Pahian thu a kepna, sinsakna leh makaihna hi a, hotdamna tang nailou naupangte hotdamna lampi kokmuhna hun leh hotdamsa naupangte Jesu Khrist nungzui muan huai hi ding a sinsakna hun leh mun ahi. Hiai hun leh hiai mun tuh naupangte Pathian naih ding dan lampi kokmuh na, naupangte Pathian naih dia kisinsakna mun ahi. Pathian thu zang a hindan siangthou, Pathian laudan siamna, nuleh pa zahtak dan siamna leh om dan hoih, khalam leh salam thilte kisinsakna mun poimoh leh mun manpha ahi. Hiai Sunday School a Beginner apat Senior tan hoihtak a kai mite tuh pianthakna leh khristian hinkhua a buai lou, gammang lou deuh tei tei uhi. Huaiziakin Saptuam in Naupang Sunday School a poimoh ngaih mah mah ahihmanin sinsaktu ding zong mi khat peuh sawl mai lou hi.
NAUPAN LAI A PATHIAN NAIH: Mi tampi upat nung a piangthak ten a gen khak zel uh tuh, “Ka na piangthak hak lua, naupan lai a piangthak na ki hi mah mah leh” chih khawng ahi. Hiai in a gen nop tuh thil hoih lou huaizah na kisem kha lou ding chih bang, Pathian nna tam deuh kisem man ding chih bang, leh inkuan pihte toh manpha tak a na kikhosa khawm baih deuh ding hiven chih khong hi ding hi. Si ding kuan, lupna tung a piangthak man ham hamte kipahpih huai mah mah uhi. Amau leng a kipah mah mah kawm un Toupa nna tam lou bek kisem man leh chi ding uhi. La phuaktu khat in “Ka hondampa toh kituak ding, khutvuakin ka pai ding maw, Khamangthang khat bek pi lou in bang ka chi tel ding a hiam ?” chi in la ngaih mah mah khat na phuak hi. Meikuanga pan suakta ham ham chih zong kipah huai mah, huai sang a kipah huai zaw lai ding tuh Toupa kipahman pe dia hong pai chiang a “Sikha hoih leh muan huai na hih hoih e, na pu kipahna a lut in” hon chih ding mah mah zak uthuai pen pen ding hiveh aw. Hun hoih teng beita, tha hatna teng kiamta,nitum kuan khong a Pathian naih lel ding in Toupan hon chi lou hi. Na hun hoihlai, na melhoih lai, na paklut lai, na tha hat lai, siamna leh pilna manpha tak toh na tut lai in Pathian naih inla, a deihte deihpih inla, a nna ginom leh kuhkaltak in sem in. Hun tui bang kiam in mualkhum zel, Leithil tangtawn daih om lou; Tang tawn thilte kia lam en in, Pathian khut muan huai len in. PATHIAN NAIH DIN KA NAUPANG LAWLAI CHI KEN mihing ten i dam ding tan leh i sihni ding a thei ki om lou vek ahi. Tukum naupangte’ ni tuh Pathian i naih ni uh hi vek ding in Toupan hon zat pih chiat hen.
