Thilsiam amah mitmuh a lang lou him him a om kei; I tanchin i tutna ding mitmuh ah zaw bangkim vuaktang leh kihongsa in a om zaw hi (Heb.4:13).
Sadan a ngaihtuah a, leitung mit toh i et chiang in, kuamah hon mu leng om lou, hon ngaihsak leng om lou, hon thei pha ban leng om lou kisa, hehpihtu bei, ittu leng nei lou, deihsak leh duattu ding leng nei lou kisa a na om hun a om mai thei. Nang kia kimu a, nang dinmun kia en a, na kihehpih luat man a khasia a na kahguk ni leng a om mai thei. Deihsaktute taina leh ittute thuhilhna nangawn muhdahna leh simmohna dan a ngai a, nang leh nang na kikhasiat ni khong zong a om mai thei. Huaite teng teng zong melmapa Setan sawltak muanhuai nang leh kei hon khem ding leh hon kaibah ding a vanzat hiamtakte hi uh chih mangngilh ngei het louh ding ahi.
NA NGAIHTUAHTE:- Nang kia na om a na ngaihtuahte, mi toh na om a na ngaihtuahte, na office a na om a na ngaihtuahte, biakin sung a na om a na ngaihtuahte, sun leh zan jing leh nitak a na ngaihtuahte na gen khiak leh gelh khiak hikeimahleh Pathian in a na theivek hi.A sia apha lungsim a na ngaihtuahte leh suangtuahte teng teng nangawn i Toupa mai ah vuaktang leh kihongsa bang a lang ding hi. Kumpi David in “Toupa aw nang ngentel takin non ensuak a, non thei ta hi.Ka tut leh ka din na thei a, Ka ngaihtuahna gamlapi a kipan in leng na thei hi. Ka pai leh ka kup non entel zel a, ka omdan eng teng na thei vek hi. Ngaiin Toupa aw nang na theih siang vek louh ka lei ah thu a om kei hi.Nang ka nunglam leh ka malam ah non umsuak a, ka tung ah na khut na koih lai hi. Huchitel a theihna kei ding in a lamdang lua a; a sang tel a ka phazou kei hi”(Sam 139:1-6) na chi hi.
NA THILTUAH LEH TANTE:- Leitung ah mi teng teng in thil tuah leh tan khak I nei chiat uhi. Huaite en i sepkhiak bang,en i lohkiak bang leng a om ding. A hoih lam ahih chiang a sit in a tamzaw deuh bang deih himahleh a honpepa Pathian in ei toh kituak, a hon piak ana hi gige zaw hi.Tua na dinmun na phutawk mah hi in na thei hia ? Tua na tan hamphatna leh vangtahnate a tang tak mah ka hi chi in na pom lem thei hia ? Nang a ding hiloupi tang kha dan in na kingai hia ? Hiai pentak zaw midang kuate hiam a ding hizaw veh aw na chih khong a om kha hia ? Tuahphatni chiang a ahiding mah dan a pom pah thei napi, buaina leh haksa tuam tuam hong tun chiang a, kuate hiam ziak bang sa pah pah chih tuh mihingte ngeina ahi. Huai apan ngaihdan chidam zaw leh zangkhai zaw tuh asia, apha hong tung bang bang Toupa theih louh om lou ahihman in Toupan pha asak leh a deih bang bang hizaw hen chi thei leng i tawl dam ding hi. A hau lou dingpi haukha dan a kingai chih lam om khol lou napi, a hau ding kimlai zawng kha dan a iki ngaih mok leh zonna zong lel diak ding, gik diak se ding hi. Toupa Pathian bang kim thei pan na tung tang thu ah buai lou a nang sep khiak leh omdan toh kituak a thukhen ding hizaw hi. Eben-ezer hiai tan honpi ka tung a hoih Toupa ka kipak chini aw.
BANGKIM A HON THEIPA KIANG AH:- Na kiang ah kipahthu ka hon hilh ding a; lauhuai tak leh lamdang pi a bawl ka hihziak in: na thilhihte lamdangtak ahi a; huai tuh ka hinna in a theitel mah mah hi. A guk a bawl a ka om a, lei mun nuainung pen a, kilawmtak a bawl a ka om lai in, ka guh ka tang nang apan sel in a om kei hi. Ka lim kibawl kim nailou na mit in a mu a, na laibu ah ka hiang teng teng gelh vek ahi, nisim a bawl in ka om zel a, khat eng a om nailouh lai in. Pathian aw na ngaihtuahnate kei a ding in manpha hina tel e ! (Sam 139:14-16)
BANGKIM A HON THEIPA KIVEL SAK NI:-Pathian aw ngentel tak in hon ensuak inla ka lung tang thei in, hon chian inla ka ngaihtuahnate thei in. Kei ah gilou salou mawng mawng a om hia, om lou en inla tangtawn lampi ah hon pi in (Sam 139:23-24) Thukhenni chiang a, a mai a ding ve ve ding ihihman un a kikhelma in a mah naih in, kisusiangthou leng, a thangpaihna mulkimhuai apan suahtak sak in i om ngei ding uhi. Salam damlouhna i tuah chiang a leng Doctorte kiang a pai a va ki ensak zel hihang a, tang tawn daih ding damna kim neipa kiang ah va pai in kivel sak chiat ni.
