THUPATNA: Pasalte ut mahmah leng zong ‘Nu’ kihi ngeilou ding hi. Numei tengteng zong ‘NU’ hi veklou hi. Numei khen khat amau deihtelna ziak a nu hilou ding a kibawl, pasal neilou, pasal nei napi a ta nei loute banah nungak lai ta nei nailoute ‘nu’ hi nailou uhi. Pasal nei, ta deih lou hilou napi a nei theilou chihte leng amau apan piang tate chih ding omlou ahihman in tanau nai leh kholakmi khong apan khong lou ngal nu chihna tang khalou, a hehpih huailua khat himok uhi.
NUTE MANPHATNA: Ta nei tengteng, a kum tawm leh tam gen omlou, a let leh neu kiteh lou in, apil-amawl gen louh, a hauh, a zawn leh dam theih leh damtheih louh chih teng teng bang mah in dallou in a ta a pianni apan a ta ziakin automatic in “NU’ hipah ngal mai hi. Hiai tuh kuamah piak tawm hilou, kuamah dal thei zong hisam lou, ta nei khempeuhte hihna leh min, a ngaih mahmah khat ahi. W.M Thackeray in “Naupangte kam ah ‘nu’ chih tuh Pathian tuk in thupi hi” na chi hi. Naungek a ding a poimoh nawitui, alum leh vot a hun geih, a khum, a al ahun geih Pathian in nute tung ah koih khin hi. A pasal a ding a mittaina, lungmuanna, lawm leh panpihtu, a mouthaknate a ding in tanu leh sanggam numei behlapna, a nawtsiat a nu leh pa leh sanggamte a ding in tapa leh sanggam pasal behlapna zong hitou lai hi. Inkuan nihte gawm tuahtu leh kinaisak, kitanausaktu nute aw na man phatna uh na sut ngei uhia? Nak sutlua, nak theih lua a kisaktheih pih maimah houh i hi kha uhia? Nute pheitung leh angnem tuh naungekte a ding a mun lunggulh huaipen pen leh vahna, taina, bitna, muanna leh tawldamna mun ahi. Nute khut tuh naungek lamet leh kinepna tengteng sepkhiakna, a lon khak chiang lel a leng kaplai bang leng a tawp geih na khut manpha ahi. Nu nungzang tuh amah ta a ding in tawldamna leh ihmut limna, muanna leh bitna, mun uthuai pen leh a lunggulh mahmah na mun uh ahi.
NUTE MOHPUAKNA: Nute office tuh insung ahi a Holiday omlou, suty omlou, sun leh zan, dakkal 24 sung ahi mai hi. Ka zouta chi a khawlsan theih louh nna tampi om, sep ngei teng mah niteng a sep thak zel ngai bang, gen ngei teng mah niteng, zing leh nitak teng a chimtak lou a gen thak zelzel ngai, tamvei ka gen law ta chi a daih san theih louh gen thak zel ngai om den ahi. Nute mohpuakna tampite lak apan a tangpi deuhdeuh tamlou a nuai a bang in gen sawm ni.
TATE KEPNA: Insung a i neihte lak ua thupi pen leh manpha pen Pathian in gou a hon chihsak tuh i tate ahi. Kep nuam, don nuam leh a damthei tak nei khate tuh hampha mah mah uhi. Damthei lou, genhak, zan chiang a leng hoih tak a hon ihmu sak theilou chih
bang leng om thei ahihman in, huchibang nei khate bel hehpih huai mahmah nawn uhi. Ahihhang in Toupan a hon piak vek ahi a kuamah a phun thei, leh deihtel thei omlou i hi chih theih ding ahi. Tate nek leh dawn, silh leh ten, siamsinna, Pathian laudan siamna, nu leh pa zahtak dan siam, sang a u zawte zahtak dan siam, omdan hoih, paudan hoih, kamsiam, nekdan, dawn dan sinsak tuh nute mohpuak ahi khol diak hi.
INSUNG KEPNA: Paten inn bawl in ding sak uhi, a sung kepna leh etkolna pen nute mohpuak na ahi. A kilawmna ding, a siangthouna ding, a nopna ding leh a hoihna ding in nute mah in a zun uh a’ a kep uh hong ngai pah hi. Insung mite suakta tak a om chiat theihna ding leh kilungsim uina omlouhna ding in nu pen a zomkhawmtu, a chidam saktu ahi. Insung tuh nu pulpit hi a, a tate thu leh la a pattahna mun, omdan hoih gamtat kilawm a sinsakna mun, Pathian biak ding, lau ding leh zahtak ding ahih dan a sinsakna mun hipah hi. Zawr Harbat in “Nu hoih khat tuh sinsaktu (teacher) zakhat toh kibang hi” chi’n na gen hi. Insung boruak nuam bawltu lianpen tuh nu ahi.
U LEH NAU, VENG LEH PAM: U leh nau kal, beh leh phung kal, sung leh pu kal, insak inkhang, veng leh pam toh kal zong a chidamna ding in nu in kuamah gense lou leh a hoihlam ngen a thil a gen chiang in, insung chidam, u leh nau kal chidam, veng leh pam, insak inkhang kal chidamna hi mok hi. Nu bel a ihmut sung lou ngal tawldam hun a nei lou, mi poimoh, a sik leh tang a ding thei midang kuamah omlou, midang leng va sawl theih leh va zat theih leng hi sam lou mi poimoh ahi.
Inkuan lian leh neu ah nu in poimoh louhna mun neilou a, a neute lak ah zong inkuan neu law na, nu poimoh kei chih om tuan louh bang in inkuan lian leh thupite mah ah zong poimoh veve hi. Anna Javis in, “Nute omlouhna insung tuh vasa bu nei lou toh kibang hi” na chi hial hi. Nute aw na poimohna uh lian in, na manphatna uh gol mahmah hi. Na lungsim uh thahatsak unla, na inkuan uh ding in Toupa muanna toh Pathian min in theihtawp in hong pang un. Insung hong hoih leh khotang leh saptuam hong hoih ding a, i khua i tui, i gam i lei hong nuam mahmah ding hi.
