Thilpiak khatpeuh in manphatna nei chiat dingin gingtak huai hi. Himahleh Missions thilpiak in thilpiak dang tengteng manphatna khupzou ngei ding in ka gingta hi. Aziak ahihleh Jesu thupiak gol sepsuahna dia thilpiak ahihmanin a thupi hi. Missions thilpiak neu leh liat in thupua lou a, a nasep thupi ahihman in a manphatna lian hi. Huai banah Missions thilpiak a kilawp huai mahmah na tuh tawmchik pia zou leng le, a manphatna neudeuh tuanlou hi. Rev. Thangngur in Laa ana phuak a “tui malkhat leh singkhuah khat, thil simmoh chitengte zong, thangvan gam sum a suahtheihna” na chi hi. Khangmasa te’n ah, missions thilpiak dingin, singkhuah, aktui pumkhat leh nih, buhhum, malta, sing leh adangdang na tawikhawm te uh ziakin, tuni in I Saptuam in field tuamtuam, gamtuamtuam ah Toupa’ nna kisemthei hi.
Missionary te ahihleh kipumpiak na toh Toupa’min a sihngap, haksatna thuakngap a kipia ahi uhi. Bang chi zong teng in thuak mah leh uh sunglam a kipahna nei ding uhi. Himahleh a kuankhia theilou te’n I missionary te haksatna enliam ngamtak tak ding ihi uhiam? Amaute I kithuahpih theih bangbang a I kithuahpih ding uhi ahi. Tua banah kithuahpihna I piaktheihlouh, haksatna tampi a phutkhak uh om hi. Huaiziak a I thumpih ding uh I liangkhou ua kinga ahi. Missions thilpiak manphatna Phil. 4:10-20 kikal pansan in enkhawm leng uthuai kasa hi.
- Philippi saptuamte’n Paul a taksap awnghuk sak uhi. Paul kipak lua mahmah ahihman Toupa kiangah kipahthu gen hi. Missions thilpiak in Pathian bilkhawng kha mah mah hi. Missions thilpiak tamlou khakha I piak te ziak a, I missionary te’n Toupa kiangah kipahthu na genzel uhi. Thuk deuh in ngaihtuah leng, I thilpiak neukha kha te Pathian bilbuk a hilhtou aom toh kibang mai hi. A manphatna muchian semsem leng kipahna khitui dai semsem ding hi.
- Mi kuapeuh mah in bang hiam hihhoih/sephoih ki ut chiat hi. Eimah in hihhoih kisa/ semhoih kisa chih sangin, mi’n semhoih honsak ding uh poimoh hi. I sepna ah semkhial chih bang ki ut omlou ding hi. I hinkhua ah thil tampi semkhia zoukei mah le hang, I sep sunsun te bek ah hihhoih leng ka ut hi. Paul in Misidonia a Toupa tangthupha gen a, kal a suannung Phillipi saptuam te chihlouh a pan bangmah mulou hi. Phillipi te’n a poimoh na tak sukha a sem uh ahihman un Paul mahmah inleng sem hoih sa mahmah hi. Enleng I sep ding diktak I sepkhak chiangin ki sem hoih hi. Tua banah midang in Missions thilpiak a piaklouh ziak ua, en pialou hiam, kithadah sak hiam himailou in, I thilpiak in manphatna nei lian semsem ahihdan manghilh louh ding ahi. Kuama’n Paul a kithuahpih louh lai ua, na kithuahpih kha Phillipi saptuamte tuh semhoih kia hilou in, hampha mahmah uh kasa hi.
- Missions thilpiak tuh haichi tang bang a, gahpung thei ahihman in manpha diak hi. Haichi tang khat I phum in, gah tampi piangsak hi. Tuni a I thilpiak tamlou khakha te’n gah suang a Tangtawn sihna a pai ding mi kua hiam in tangtawn hinna na ngah ding, Khalam kisinsakna ding khawng a I thilpiakte kizang kha a, kua hiamkhat Pathian mizat dia sek khiak a om ding chih khong I ngaihtuah chiang in, piaklouh khak ding lauhhuai hi zaw lou hiam? Tu leh tu in a gah mu vek theikei mah le hang, van ah muchiang vek ding ki hilai hi.
- Mihing taksap bei ki omlou hi. Missions thilpiak pia kei leng I taksap bei dingin, kiningching mahmah ding kihi tuan deklou hi. I piak ziaka taksapna nei lian lua bik ding chihna hi tuanlou hi. Himahleh Pathian lunglutna ahihman in, Toupa’n a pia mite a kepdan khat om a hi chih tuh a chiang mahmah hi. Paul in Phillipi saptuamte kiangah na thilpiak ziak un, haksa zek ni uhteh chi zaw lou in, “ka Pathian in Khrist Jesu thupina a hauhna bang in na taksap tengteng uh a honpe ngeingei ding hi” chi zaw hi. I thilpiak ziak a I haksat deuh hun om kha ta ve, Toupa tuh tua I taksap awng hon huksak dingin a muanhuai mahmah hi.
Missions thilpiak manphatna bangzah hiam I genta hi. Missions thilpiak pia loute Toupa’n gawt ding chih hi zenzen lou ahi.. Himahleh Missions thilpiak manphatnate I vel chiang in, piaklouh khak ding lauhhuai banah ah, Toupa vualzawlna I tante toh teh a tawm I piakluat khak ding lauhhuai kasa hi. A ziak bel kipahman san hunchiang in, I hawmthoh lua kha ding uhi. Toupa’ Missions thilpiak a kalsuan thei dingin Saptuam te hon vualzawl hen!
