THUPATNA: Hihna dan ah tuh nam mawl leh nam tuantual tak tuh ihi uh. Himahleh inkuan kikepna dan leh kimakaihna dan khawng ah Laisiangthou toh kituak tampi i neih khak man un i hampha uhi. Khristian i suahma uapan Pasalte inkuan a lupen, a zom a jite, chih bang kisinsak tawm ngai lou a i theih luat uh, i zat siamsa uh ahihman in zuih haksa lou hi. A leh lam ah Pasalte kisiamsak law kha in jite mitmei ven luat nalam a laisiangthou hon sinsak pen bang zang khial dek i hizaw diam chih in om.
INKUAN BAWLTU: Inkuan bawltu leh pankhetu bel lei leh van leh a sung a om teng teng siamtu PA PATHIAN (Jehovah) ahi. A bawl inkuante ading in a ngaihtuahna, a hun leh kithuahpihna pia in a lung lut mah mah hi. A taksap uh piak ding leng ama mohpuakna mah a koih a, midang hong kigolh ding leng a deih lou Pathian ahi. Inkuan sung thuneihna leh mohpuakna ah ama ban ah Pasalte liansak pen thuneisak pen in, a zom a panpihtu ding in jite koih hi. Pasal leh numei pangkhawm a inkuan bawl ding tuh Pathian tup leh ngim dan ahi. Tulai khovel ah gam khangtou leh changkang Europe gamte khawng in hiai thu kitheihmohbawl in, pasal leh pasal, numei leh numei peuh kiteng in, suan leh pak neihna bang hong kiam ding in kilang hi. Huai kia hilou in Kristian population zong niteng a kiam in Muslim biakna zui niteng in khang tou hi. Huaiziakin sapkangte gam ah a simmoh mah mah uh mivomten tunung kum bang zah hiam chiang in tamzaw hihna la in vaihawmtu leh thuneitu hong hih ding uh gintak huai hi. A siamtu, Pathian zahlouhna tuh manthatna khukpi a hihziak in.
INKUAN A THUNEIHNA: Inkuan khat sung ah i dam kim chiat nak leh Laisiangthou hon sinsak dan in “Pa” tuh thunei pen, lianpen, sang pen leh lu pen ahih ding chih ahi. Inkuan tuh Toupa pat ahihman in a lung zong lut hi. Huaimah melmapa setan in zong thei in lam tuam tuam a soisa in khoih lumlet sek hi. Tulaitak a, a vanzat hiam mah mah leh inkuan bun mah mah tuh sum leh pai, numei leh pasal kal thangtatna, huihkhua tawn a kithuzakna social media leh internet in hon kentel uangtatna chiteng ahi. Hiai teng teng enkol a khisiang ding ichih dek chiang a naupangte siamsinna a kizang, khotang thil poi mohte kizaksakna ban a saptuam in Pathian thugenna leh Pathian la ngaihna, saptuam thu poimoh om bang bang kizaksakna vanzat tang zang ahihman in nu leh paten zong gense lou in kizang zaw hi. Inkuan a thuneihna ‘pa’ kiang a petu gam kumpite hiam hausate hiam hilou in Pathian ahi zaw hi.
INKUAN A PATHIAN NAIHNA DIA PA PANLAKNA: Jacob in a inkuanpihte leh a kiang a om teng teng kiang ah, “Na lak ua om gamdang Pathiante koihman unla, kihih siangthou unla, na puansilhte uh kheng un. I thou ding ua, Bethel ah I paitou ding uh. Ka lungjin lai a hon dawng, ka paina a ka kiang a om zel Pathian ading in maitamka doh ding” a chi hi (Gen.35:2-3). Jacob bang a Pathian hihna theichian in, a tung a Pathian in a thiltuah tungtawn a, ahihsakte a thei chian a, huaite zang in a inkuante kiang ah Pathian hihna a pulak ngam hi. Jacob in a inkuante kiang a kihihsiangthou ding a sawm bang in tulai paten i sawm ngam uh hun ta ahi. Pathian hon piak hotdamna a nei a, a theichiante kian gen thei uhi.
PA PANLAKNA INKUANTEN A MANNA: Huchi in gamdang Pathiante a khut ua om teng teng leh a bil ua bil bah a bah teng teng uh Jacob kiang ah a pia uhi. Jacob in Sekem a tosaw nuai ah a phum hi (Gen.35:4). Jacob in a inkuante leh a kiang a om teng teng kiang a Pathian hihna a pulakte tuh, “Ka lungzin lai a hon dawng, ka paina a ka kiang a om zel Pathian” chi in Pathian a theihdan leh experienced dan tuh a chiang mah mah kil kel mai hi. Huaiziakin a inkuante leh a kiang a om teng teng in zong thumang tak in a lak ua gamdang pathian omte Jacob kiang ah sitnei lou in a pevek mai uhi.
PA PANLAKNA GAH: Apai ua a kim ua khua ten a lau mah mah ua, Jacob tapate a delh kei uhi(Ge.35:5). Jacob Padan-aram gam akipan a hong tun in Pathian a kiang ah a kilak nawn a, a vualzawl hi. Pathian in a kiang ah,”Na min Jacob ahi a; na min Jacob ahi nawn kei ding a, Israel ahi zaw ta ding” a chi hi. Pathian mah in a kiang ah, “Kei Pathian bangkim hih thei ka hi. Chi tampi suang in hong pung in. Chi chih tham ngial leh chi tuam tuam omkhawm leng nang ah hong om ding ua, na khal akipan kumpipate leng a hong pawt ding uhi. Abraham leh Isak kiang a ka gam piak, na kiang ah kon pe ding, Na om louh nung chiang in leng na suante kiang ah leng ka pe zel ding” a chi hi. (Gen. 35: 5, 9-12).
